Vodafone reclama que se suprima de contado a taxa para financiar a RTVE

A operadora Vodafone vén de amosar novamente o seu rexeitamento ao imposto destinado ao financiamento da RTVE, logo de que en abril a CMT desestimase un recurso presentado pola dita empresa, en compañía de Telefónica, contra a devandita taxa. Agora, Vodafone volve á carga esixindo “a eliminación inmediata” do canon, que, como saberemos, diríxese a sufragar os gastos das canles públicas estatais con diñeiro das empresas de telecomunicacións. A xuízo da dita operadora, o imposto é “arbitrario, inoportuno e inaxeitado”.
Son palabras do presidente español da multinacional, Francisco Román, que criticou duramente esta semana unhas cargas fiscais que, lembrou, son tres puntos superiores ás de países como Alemaña ou Reino Unido.
Román fixo estas declaracións durante o seminario de telecomunicacións que se está a celebrar en Santander, na Universidade Internacional Menéndez Pelayo (UIMP) e da man de AMETIC, e do que falamos hai uns días para avanzar as estratexias futuras de Telefónica. Para o presidente de Vodafone España, o sector que representa é clave para a recuperación produtiva de España, a nivel económico e laboral, polo que cómpre que se lle quite da cabeza ao Goberno ver nas operadoras un recurso doado de xeración de taxas “só porque se manexen fluxos altos de diñeiro”. Por certo que este imposto recae a día de hoxe sobre as catro principais empresas de telefonía móbil que traballan no país, representando un 0,9% dos seus ingresos.