Código Cero - Diario Tecnolóxico de Galicia

Novo número da nosa edición impresa

Marcus Fernández — 2026-03-13T22:59:00Z

Como todos os meses, chega outro número de Código Cero na súa edición impresa, que se pode achegar de balde nunha completa rede de puntos de distribución, podéndose descargar tamén en formato PDF ou ler en dispositivos móbiles a través da aplicación de quiosco dixital Magzter.
Nesta nova entrega dedicamos unha especial atención a varias iniciativas galegas que xiran ao redor da intelixencia artificial. Tamén abordamos os seguintes temas:
— A AESIA alíase co Instituto das Mulleres para combater a violencia dixital
— O CITIC da UDC imparte novas formacións sobre IA nos eidos da avogacía e o emprendemento
— A UVigo e atlanTTic impulsan unha rede única 5G e 6G de referencia internacional
— Vilagarcía e Ribeira apostan firme polo turismo intelixente
— Rede Aberta conectará Bordeos con Lisboa cunha rede troncal de fibra óptica de alta capacidade
— A Coruña, Ourense e Vigo nas primeiras cidades de España coa 5G avanzada de MasOrange
— Víctor Salgado: “As imaxes hiperrealistas creadas con IA abren unha brecha de privacidade”
— A UDC e a UVigo traballan un proxecto IA contra a desinformación
— A gala anual do CPEIG celebrarase o 12 de xuño en Santiago
— Fernando Suárez lémbranos as fondas raizames da informática na nosa sociedade
— AMTEGA iniciou a implantación dun laboratorio e centro demostrador anti-riscos dixitais
— A aplicación XuntaEu acumula preto de 160.000 descargas
— Entrevistamos a Ana Rute Mendes, desenvolvedora brasileira en Igalia
— As empresas comezaron o ano achegándonos unha completa ración de innovación galega
— Gradiant e o CiTIUS da USC impulsan a fotónica autosuficiente e de baixo consumo
— O Carballiño celebrou con 400 escolares o remate da nova edición de 21 días co galego e +
— Xunta inicia unha xira poñendo o foco nas tecnoloxías en positivo e contra o ciberacoso

Digg suspende temporalmente o seu relanzamento por mor dos bots

Redacción — 2026-03-13T19:30:00Z

A primeiros de ano falamos do rexurdimento de Digg en probas, querendo recuperar o concepto de plataformas de recomendación social que gozaban de grande influencia no pasado pero o proxecto, que comezou cunha comunidade de usuarios activa e cun futuro prometedor, topou obstáculos que hoxe poderiamos considerar insuperables. A propia compañía recoñeceu agora que o relanzamento do servizo non logrou consolidarse no contexto actual de Internet, o que obrigou a tomar decisións difíciles para asegurar a continuidade da iniciativa.
Nun comunicado oficial, Digg anunciou unha redución significativa do seu equipo, un paso que a dirección describe como inevitable tras comprobar as dificultades para atopar un axuste claro entre produto e mercado nun ecosistema dixital profundamente transformado. Segundo explica o conselleiro delegado da empresa, Justin Mezzell, a decisión non responde á capacidade nin ao traballo das persoas que formaban parte do proxecto, senón ás condicións dun Internet moi diferente ao que existía cando a plataforma naceu.
Un dos principais problemas que afrontou Digg foi a proliferación de contas automatizadas e axentes de intelixencia artificial. Tras o lanzamento da beta, a compañía detectou rapidamente publicacións de spam orientadas ao posicionamento en buscadores, motivadas polo feito de que as ligazóns publicadas en Digg aínda conservaban relevancia para Google. En cuestión de horas, a plataforma converteuse nun obxectivo para sistemas automatizados capaces de crear e operar contas a grande escala.
A empresa asegura que chegou a expulsar decenas de miles de contas fraudulentas e que implantou ferramentas internas e servizos externos para combater o problema. Porén, o volume e a sofisticación destas actividades fixeron imposible garantir que os votos, comentarios ou interaccións fosen realmente de usuarios humanos. Nunha plataforma baseada na confianza e na participación da comunidade, esta perda de credibilidade afecta directamente á esencia do servizo.
Desde Digg subliñan que non se trata dun problema exclusivo da súa plataforma, senón dun fenómeno que afecta a toda a Internet. Con todo, recoñecen que o impacto foi especialmente duro nun proxecto cuxo valor principal residía precisamente na curación colectiva de contidos e na autenticidade das interaccións.
A compañía tamén admite que subestimou a forza das plataformas xa consolidadas. Os efectos de rede e a fidelidade das comunidades existentes resultaron moito máis difíciles de superar do previsto. Convencer aos usuarios para abandonar espazos nos que xa teñen establecidas as súas redes sociais e trasladar esas comunidades a unha nova plataforma converteuse nun reto practicamente inasumible.
A pesar destas dificultades, Digg asegura que non abandonará o proxecto. A empresa aposta agora por unha reconstrución da plataforma cun enfoque completamente diferente, afastándose da idea inicial de competir directamente coas redes sociais dominantes. Segundo explican, a nova etapa deberá ofrecer algo realmente distinto para ter posibilidades de prosperar.
Como parte desta nova fase, a compañía anunciou o regreso de Kevin Rose, fundador de Digg en 2004, que volverá incorporarse a tempo completo ao proxecto a partir da primeira semana de abril. Rose continuará colaborando como asesor na firma de capital risco True Ventures, pero centrará a súa actividade principal na redefinición do futuro da plataforma que creou hai máis de dúas décadas.
Mentres se prepara esta nova estratexia, o podcast oficial Diggnation continuará publicándose con periodicidade mensual. A empresa tamén quixo agradecer o apoio tanto do equipo que participou no relanzamento como da comunidade de usuarios que regresou á plataforma durante a fase de probas.
Desde Digg insisten en que a Internet segue precisando espazos nos que se poida confiar tanto no contido como nas persoas que participan nas conversacións. A compañía sostén que continuará traballando para atopar unha fórmula que permita reconstruír esa idea nun escenario dixital radicalmente distinto ao que deu orixe á plataforma.

Recta final para BIXO, a misión biolóxica do UVigo SpaceLab apoiada por Zona Franca

S. P. — 2026-03-13T18:00:00Z

O proxecto BIXO (Bacteriological Intercommunication eXperiment in Orbit) do UVigo SpaceLab entrou na súa última fase. O cubesat de case 3 quilos, deseñado e fabricado por este equipo de estudantes da Universidade de Vigo, está practicamente listo para afrontar a súa primeira misión espacial biolóxica, que conta co apoio e patrocinio da Zona Franca de Vigo.
Da man da UVigo, BIXO levará ao espazo unha bacteria a fin de estudar o seu comportamento durante 9 meses para saber como lle pode afectar a un organismo vivo unha exposición prolongada ao ambiente espacial. Traballará a 440 quilómetros da Terra enviando imaxes e información e farao sendo o satélite máis pequeno con carga biolóxica que se poñerá en órbita, “algo xamais desenvolvido ata o momento e que pode ser clave para futuras misións no espazo con seres humanos”, explicaron os investigadores participantes.
Guillermo Calvo, presidente de UVigo SpaceLab e director técnico do proxecto, Daniel Collarte e Alejandro García, en representación dos máis de 50 estudantes que integran actualmente SpaceLab, presentaron os resultados e a última hora de BIXO ao delegado do Estado na Zona Franca de Vigo, David Regades, a quen explicaron os preparativos finais para o éxito do proxecto.
Sinalaron que será a primeira misión de lanzamento deste equipo interdisciplinar de estudantes de diferentes graos e mestrado da Universidade de Vigo nos Campus de Vigo e Ourense, que xa saben que o seu talento e esforzo ten recompensa.
BIXO será lanzado ao espazo nun foguete desde China, ao gañar o Space Universities Cubesat Challenge, organizado pola Federación Astronáutica Internacional (IAF) e a Sociedade Astronáutica Chinesa (CSA) en 2022, onde competiron con equipos de estudantes doutras 200 universidades. BIXO será lanzado pola Academia Chinesa de Tecnoloxía de Vehículos de Lanzamento.
Esta misión biolóxica supón poñer en órbita un cultivo de bacterias almacenadas nunhas tarxetas microfluídicas dentro dunha cámara presurizada co obxectivo de realizar un seguimento á bacteria para estudar os efectos da exposición prolongada ao ambiente espacial en organismos vivos.
“Unha contribución máis”, dixeron, “aos estudos que están a facer moito equipos de investigación do mundo e axencias espaciais para poder responder á pregunta de se é posíbel enviar vida fóra da Terra”.
No encontro en Zona Franca, David Regades, avanzou que o CZFV renovará o seu apoio ao proxecto da UVigo SpaceLab e aplaudiu este novo desafío “deste grupo de estudantes que nos seguen a demostrar o seu enorme talento, innovación, vocación pola investigación e a súa capacidade de traballo en equipo. A canteira está asegurada e iso é grazas á excelencia da Universidade de Vigo que segue sendo unha referencia”, sinalou o delegado do Estado, que lembrou que o sector aeroespacial “é un aceno de identidade de Zona Franca con xente e empresas moi novas que en moito casos están a ser xa referentes en todo o Estado”.
O equipo de SpaceLab avanzou os pasos que lles quedan agora por diante, entre outros, o desenvolvemento dun estudo estatístico de sensores de radiación, os labores de testeo e validación da cámara que BIXO levará a bordo para enviar información a Terra, ademais da montaxe da estación terrea e, finalmente, a ensamblaxe e a preparación do lanzamento desde China onde confirmaron que estará presente unha representación do equipo vigués.

Facebook reforza as medidas para premiar o contido orixinal e frear as copias na súa plataforma

Redacción — 2026-03-13T17:30:00Z

Meta anunciou novas medidas destinadas a reforzar a presenza de contidos orixinais en Facebook e a limitar a visibilidade de publicacións copiadas ou de escaso valor creativo. A compañía explica que nos últimos meses intensificou as accións contra o spam e contra contas que imitan a creadores, ao tempo que revisou as súas directrices para definir con maior claridade que se considera contido orixinal.
Segundo a empresa de Mark Zuckerberg, estes cambios xa están a ter impacto na actividade da plataforma. Durante a segunda metade de 2025, tanto o número de visualizacións como o tempo de consumo de Reels orixinais en Facebook duplicáronse aproximadamente en comparación co mesmo período de 2024. Este aumento tamén se traduciu nun maior volume de ingresos para os creadores que publican material propio, ao ampliarse as oportunidades de monetización.
A compañía tamén afirma ter intensificado a loita contra a suplantación de identidade. Ao longo de 2025 elimináronse máis de 20 millóns de contas que imitaban a grandes creadores de contido, mentres que as denuncias relacionadas con este tipo de prácticas diminuíron un 33 %.

Directrices máis claras sobre o contido orixinal

Facebook actualizou as súas normas para precisar que publicacións poden considerarse orixinais e, polo tanto, recibir maior visibilidade no Feed e nos Reels. A plataforma considera contido orixinal aquel gravado ou producido directamente polo creador ou polo propietario dun perfil ou páxina.
Tamén poden cualificarse como orixinais os Reels que incorporen material de terceiros sempre que o creador achegue un valor creativo significativo, por exemplo mediante análise, explicacións ou desenvolvementos narrativos novos. Pola contra, vídeos que se limitan a reaccionar con expresións faciais, narrar o que xa aparece en pantalla ou combinar fragmentos doutros contidos sen engadir achegas relevantes serán considerados non orixinais.
Do mesmo xeito, Facebook reducirá a difusión de publicacións que simplemente re-suban material alleo ou que introduzan modificacións mínimas (como engadir bordos, subtítulos ou alterar a velocidade dun vídeo). Estes contidos poderán ser penalizados nas recomendacións e, en casos reiterados, provocar que a conta deixe de ser recomendada ou perda acceso á monetización.
Os creadores que consideren incorrecta unha decisión sobre a orixinalidade dos seus contidos poderán presentar un recurso, segundo explica a compañía, que asegura estar a mellorar continuamente os seus sistemas de detección.

Ferramentas para protexer o traballo dos creadores

Xunto co endurecemento das normas, Facebook está a introducir novas ferramentas para facilitar a defensa da autoría. A plataforma lanzara xa o ano pasado unha función de protección de contidos que permite detectar automaticamente coincidencias cos Reels orixinais dun creador e tomar medidas cando aparecen copias.
Agora Meta está a probar melloras nesta ferramenta para que tamén identifique posibles casos de suplantación de identidade e permita enviar denuncias desde un único panel. A nova funcionalidade comezará a chegar progresivamente aos creadores que empregan o sistema de protección de contidos.
Con estas iniciativas, a empresa afirma querer consolidar Facebook como un espazo onde «a creatividade sexa celebrada e recompensada», reforzando a visibilidade das voces auténticas fronte ás prácticas de copia ou reutilización abusiva de contidos.

Allariz impulsa a súa estratexia dixital cunha nova web sen barreiras

S. P. — 2026-03-13T17:01:16Z

O Concello de Allariz deu este venres 13 de marzo un novo paso na súa modernización tecnolóxica coa presentación da nova faciana do seu portal web, allariz.gal. En palabras do Goberno local, “esta plataforma non é só un cambio estético: nace como unha ferramenta útil que simplifique a relación dos veciños coa administración e, ao mesmo tempo, funcione como o mellor escaparate turístico para quen queira descubrir o noso municipio”.
No acto de presentación, a alcaldesa, Cristina Cid, estivo acompañada pola concelleira de Promoción Económica, María López, e por Pablo Sanmartín, responsable da empresa Dixital Gou, encargada de dar forma ao proxecto.
A renovación, financiada a través dos Fondos Next Generation da Unión Europea dentro do Plan de Sostibilidade Turística, “supón un salto de calidade na estratexia dixital de Allariz”, sinalaron dende o Concello, engadindo que “con este novo deseño, o municipio busca non só ser máis eficiente, senón tamén gañar concorrencia como un destino turístico de referencia, máis accesíbel e conectado”.
O novo deseño pon o foco en que Allariz teñan máis presenza ca nunca en Internet. A sección de Turismo foi redeseñada de raíz, aplicando estratexias de posicionamento (SEO) para “garantir que a nosa riqueza patrimonial, natural e cultural apareza nos primeiros resultados de busca en canto alguén amose interese polo noso municipio”, sinalaron, apuntando que “a maiores a experiencia de usuario mellora cun buscador intelixente que anticipa as necesidades do visitante, permitindo localizar calquera recurso turístico de xeito intuitivo e sen rodeos”.
Sendo conscientes de que a maioría das consultas se fan dende o teléfono, Pablo Sanmartín, de Digital Gou, explicou que a nova web é 100% responsive, o que significa que se adapta perfectamente á pantalla de calquera móbil ou tableta, ofrecendo unha navegación cómoda e segura para a veciñanza.
O novo deseño nace “coa vocación de ser unha ferramenta para todos e todas, sen excepcións”. Por este motivo, integrouse un sistema avanzado de accesibilidade que permite que cada persoa adapte a web ás súas necesidades: desde aumentar o tamaño do texto ata cambiar os contrastes de cor ou resaltar as ligazóns para unha navegación máis clara. Coa eliminación destas barreiras dixitais, o Concello de Allariz reafirma o seu “compromiso cunha administración que non deixa a ninguén atrás”.
En definitiva, sinalaron dende o Executivo local, “esta reforma non é un simple lavado de cara estético, senón unha evolución necesaria para que Allariz estea máis conectada, accesíbel e, sobre todo, capaz de dar unha mellor resposta aos retos do día a día”.
Esta actuación forma parte do PSTD Allariz Destino Sostible que está financiado con recursos que proveñen do PRTR, Plan de Recuperación, Transformación e Resiliencia, no desenvolvemento das actuacións necesarias para a consecución dos obxectivos definidos.

startTIC dará a coñecer os gañadores do seu desafío nunha xornada en Pontevedra

S. P. — 2026-03-13T15:30:00Z

O proxecto startTIC, incubadora de alta tecnoloxía impulsada polo Consorcio da Zona Franca de Vigo, a Cámara de Comercio de Pontevedra, Vigo e Vilagarcía de Arousa e o Centro Tecnolóxico Gradiant, presentará na sede cameral de Pontevedra os proxectos que optan á convocatoria Challenge-Based Social Innovation, integrada na súa liña estratéxica de Innovación Social e Tecnoloxía para Galicia.
Esta convocatoria ten como obxectivo impulsar o desenvolvemento de solucións tecnolóxicas que contribúan a dar resposta a desafíos sociais reais, promovendo a colaboración entre entidades do ámbito social e o ecosistema tecnolóxico galego. Así mesmo, busca fortalecer iniciativas innovadoras con impacto social e territorial na comunidade.
Durante o evento, coa fórmula de Demo Day, daranse a coñecer os proxectos presentados a esta edición da convocatoria e, entre eles, seleccionaranse as iniciativas que serán recoñecidas no marco desta iniciativa.
A xornada será o luns 16 de marzo de 2026, desde as 10.00 horas, na sede pontevedresa da Cámara de Comercio de Pontevedra, Vigo e Vilagarcía (no 54 da rúa Rosalía de Castro, en Pontevedra).
Na inauguración, ás 10.00 horas, intervirán Agustín Reguera, delegado territorial da Xunta en Pontevedra, e Eduardo Barros, vicepresidente terceiro da Cámara PVV. A partir das 12.00 horas, celebrarase a entrega de premios e a clausura, coa presenza de David Regades, delegado do Estado no Consorcio Zona Franca Vigo, Lucía Pedroso, vogal da Cámara PVV, e Fernando Jiménez, xerente de Gradiant.
Esta iniciativa pertence á Incubadora de alta tecnoloxía startTIC de impulso ao sector TIC, cofinanciada ao 60% polo Fondo FEDER no Programa Plurirrexional de España 2021-2027, dentro do proxecto Infraestruturas destinadas a Incubadoras de Alta Tecnoloxía, impulsado pola Fundación INCYDE.

Do Brasil á Coruña: Ana Rute Mendes consolida a súa carreira no software libre en Igalia

Marcus Fernández — 2026-03-13T15:00:00Z

Co gallo do Día Internacional da Muller dende WordPress Coruña e o GPUL tiveron a ben organizar un debate sobre o rol das mulleres no ámbito tecnolóxico, no que participou a desenvolvedora brasileira Ana Rute Mendes, quen actualmente traballa para Igalia na cidade da Coruña.

—Antes de nada, gustaríanos saber como unha brasileira se traslada a Galicia para traballar nunha empresa tecnolóxica. Fuches ti a que quixo mudarse á nosa terra ou o traballo que ías desempeñar precisaba de certa presencialidade?
—Si. Sempre tiven o desexo de pasar un tempo fóra do Brasil e, por razóns políticas, decidín marchar arredor de 2018. Como Igalia axuda co visado de traballo para vir a España, acabamos vindo para aquí un pouco por casualidade. Mudeime sen ter pisado nunca A Coruña antes e quedei encantada!

—A xeito de curiosidade, podes comentarnos como foi o teu achegamento á realidade lingüística galega? Foi unha sorpresa que tivésemos unha lingua de nosa en Galicia?
—Foi unha moi boa sorpresa! Sabía que había unha lingua propia, pero non sabía que era nai da miña lingua nativa, o portugués. Creo que a cultura e a lingua galega axudaron moito á miña adaptación; somos moito máis próximos do que esperaba.

—O teu perfil é bastante curioso, pois aínda que o teu traballo parece propio da enxeñaría informática, a túa formación transcorreu por un itinerario diferente. Que motivou iso? Cres que é preciso derrubar os prexuízos que existen sobre as enxeñarías para atraer ao estudantado feminino?
—Desde nova sempre me interesaron moito a tecnoloxía e os computadores, e meus pais sempre me animaron. Por iso, durante o ensino medio estudei nun instituto similar ás FP de aquí, que foi onde realmente comecei a aprender programación. Xa preto de entrar na universidade, pensei que xa non quería seguir e que non me gustaría traballar na informática; porén, necesitaba traballar para conseguir o meu diploma e ao final sempre comecei a traballar neste ámbito e nunca saín del. Ao principio nun nivel máis alto, con deseño web e front-end, pero volvín afondar na programación cando tiven a miña propia startup, porque necesitaba apañarme e a autonomía de saber programar foi o que me trouxo de volta a esta carreira. Sen dúbida debemos ensinar ás nenas desde novas que estas carreiras son para todo o mundo.

—E como levaches o feito de realizar o teu propio emprendemento empresarial no Brasil? Cres que é un proceso enriquecedor aínda que remates traballando por conta allea?
—Creo que foi o período no que madurei máis rápido na miña carreira. Ao ter un emprendemento é necesario facer un pouco de todo e aprender sobre moitas áreas da empresa, desde a xestión de proxectos até a xestión de persoas, o márketing e as vendas. Ademais, como os recursos sempre eran moi limitados, cómpre ser moi creativa para solucionar problemas e manter a empresa viva. Aínda que non seguín como emprendedora, sen dúbida foi un período que me preparou para poder traballar en calquera tipo de empresa e equipo.

—Precisamente tes experiencia na formación en liña, un tema que non para de colocarse sobre a mesa á hora de deseñar políticas educativas. Cal é a túa postura ao respecto? É precisa unha revolución? Ten sentido afastar aos cativos das pantallas cando no mundo real estamos rodeados delas?
—Creo que é imposible illar as pantallas da aprendizaxe cando estamos todos rodeados delas. Sempre fun partidaria de usar a tecnoloxía ao noso favor e empregala como unha ferramenta que abre posibilidades. Pero, claro, non é un proceso doado: hai que entender os puntos positivos e negativos e crear estratexias sobre como extraer o mellor destas novas tecnoloxías.

—Que che levou a introducirte no mundo do software libre? É algo que xurdiu espontaneamente ou responde a un xeito de entender o mundo pola túa banda?
—Foi un pouco por casualidade. Durante o período da facultade tiña moitos amigos informáticos que formaban parte de grupos como GPUL e identifiqueime moito cos seus valores, polo que comecei a interesarme bastante. Na miña carreira sempre tentei usar Linux e ferramentas abertas, e o que realmente me introduciu no mercado do open source foi participar no programa Outreachy, creado precisamente para axudar a incluír persoas pouco representadas en proxectos de código aberto.

—Como explicarías á xente que é posible facer carreira no mundo do código aberto?
—Non só é posible, senón que son profesionais bastante demandados, sobre todo en proxectos como o Linux Kernel e os motores de navegadores web. Ás veces pode ser un pouco difícil entrar nestes proxectos, pero as comunidades adoitan ser receptivas e hoxe existen programas como Outreachy, Google Summer of Code ou o noso propio Igalia Coding Experience que axudan ás persoas que queren comezar nesta área. Eu diría que unha habilidade moi importante e da que non se fala tanto é a curiosidade: ir detrás de tentar entender como funciona un proxecto que utilizas, como é a comunidade que hai detrás e como podes comezar a contribuír. Moitas persoas comezan colaborando con cousas fóra do código, como traducións, pequenas correccións de erros tipográficos ou documentación, e pouco a pouco van entrando máis na parte de código.

—Pero non só estás nun contorno laboral que xira ao redor do software libre, senón que tamén ten certa escala global. Como levas iso de traballar con compañeiros espallados polo mundo? Podemos dicir que é algo que se normalizou tras a pandemia?
—Gústame moito traballar con persoas de culturas diferentes da miña; faime medrar moito persoalmente e ter máis empatía. Sobre o traballo remoto, creo que achega unha calidade de vida moi boa e permíteme ter máis tempo para a miña vida fóra do traballo. Desde antes da pandemia xa traballaba nunha empresa remota e global, así que no meu caso persoal non cambiou moito, pero vin moitos amigos adaptándose ao traballo remoto por causa da pandemia. É unha mágoa que algunhas grandes empresas estean agora forzando a volta á presencialidade.

—No contexto laboral no que te moves actualmente, segue a padecerse unha falla de diversidade? Percibes cambios nos últimos anos?
—En Igalia esforzámonos por posicionarnos a favor da diversidade e tentamos ser un lugar seguro e inclusivo para persoas de contextos e culturas diferentes. Aínda así, é difícil acadar unha igualdade de xénero elevada: a cantidade de persoas que se presentan para entrar na empresa e que se identifican co xénero masculino segue sendo moito maior que a das outras. Non sabería dicir se está a cambiar; a miña impresión persoal (sen ver cifras) é que hai uns anos houbo un aumento de mulleres na tecnoloxía, pero ultimamente diminuíu de novo ou mantívose pequeno.

—No caso da Coruña pode resultar curioso que os grandes referentes no ámbito da intelixencia artificial sexan mulleres. O feito de que a tecnoloxía sexa cada vez máis transversal pode mudar a visión machista que impera?
—Sen dúbida. As tecnoloxías, especialmente a IA, levan consigo ideoloxías e prexuízos das persoas que as programan, polo que canto máis persoas con contextos diferentes participen na súa creación, máis inclusiva será a tecnoloxía.

—Na túa traxectoria, topaches coa toxicidade que moitos denuncian nos ámbitos máis técnicos? Ou iso xa é cousa do pasado?
—Si, por desgraza aínda acontece e probablemente seguirá acontecendo mentres non teñamos máis igualdade de xénero nos lugares de traballo. En empresas anteriores pasei por situacións desagradables con compañeiros e ex-compañeiros de traballo que só ocorreron por ser eu muller.

—E, de cara o futuro, como te ves? Especializándote no tipo de traballo que fas actualmente ou experimentando nos ámbitos que esperten o teu interese?
—Sempre tiven un perfil bastante xeneralista e o que realmente me move é solucionar problemas, polo que estou sempre experimentando con ferramentas novas e ampliando os meus coñecementos para ter máis autonomía e poder desenvolver cousas novas.

—Xa para rematar, podemos contabilizarte xa como un referente galego no sector tecnolóxico ou tes pensado seguir movéndote polo mundo?
—Non sei se me chamaría referente tecnolóxico, pero gústame moito participar en comunidades e contribuír como podo. Aquí na rexión vin moitas comunidades locais fortalecéndose e gústame poder formar parte diso, aínda que sexa de maneira esporádica. Síntome moi afortunada por ter acabado en A Coruña: fun moi ben recibida e, polo momento, non teño plans de marchar; xa considero este lugar a miña casa.

En marcha un proxecto de cribado automático de retinopatía diabética con IA

S. P. — 2026-03-13T12:00:12Z

O conselleiro de Sanidade, Gómez Caamaño, presentou no Centro de Saúde Virxe da Peregrina o innovador proxecto de cribado automático de retinopatía diabética que, apoiado na intelixencia artificial, comezará a funcionar de xeito inmediato na Área Sanitaria de Pontevedra.
Acompañado polo delegado territorial da Xunta, Agustín Reguera, do director xeral de Asistencia Sanitaria, Alfredo Silva, e do xerente da área sanitaria, José Flores, o titular de Sanidade explicou que a aplicación da IA no diagnóstico da retinopatía diabética permitirá avaliar “de forma áxil e segura a aparición de calquera signo precoz de patoloxía nos pacientes que sofren diabetes e que necesitan un control periódico”.
Deste xeito, os pacientes terán un acceso inmediato aos resultados da proba e, naqueles casos nos que a IA detecte algún signo de sospeita patolóxica, rexistrarase unha consulta co oftalmólogo para a súa valoración.
O conselleiro explicou que “a diferenza é substancial con respecto á situación actual, xa que a día de hoxe practicamente todas as retinografías realizadas en atención primaria son remitidas ao servizo hospitalario de oftalmoloxía para a súa interpretación”.
Entre as vantaxes desta nova ferramenta destacan: a dotación dun sistema de triaxe automatizado; a redución da carga hospitalaria ao evitar derivacións innecesarias ao oftalmólogo; ou a mellora das coberturas de cribado, ao posibilitar que máis persoas realicen as probas.
“Galicia é líder na regulación da intelixencia artificial e na transformación dixital da Sanidade“, salientou Gómez Caamaño, lembrando que a Xunta está a mobilizar un investimento de 1,4 millóns de euros de fondos europeos para incorporar diversas solucións tecnolóxicas ao sistema sanitario público galego.
En concreto, o Servizo Galego de Saúde está a impulsar o emprego da Intelixencia Artificial nos seus cribados de detección de cancro de mama e próstata, en probas de cribado citolóxico ou na valoración de imaxes de radioloxía simple (tórax, patoloxía osteomuscular e columna).

A Deputación de Lugo acolle unha xornada sobre as aplicacións da IA no coidado dos maiores

S. P. — 2026-03-13T11:34:46Z

Pablo Rivera Capón, deputado de Promoción Económica e Social, inaugurou este venres 13 de marzo no Salón de Actos do Pazo de San Marcos (Deputación de Lugo) unha xornada sobre as aplicacións da intelixencia artificial no coidado dos maiores. Baixo o título de O marco da atención ás persoas maiores: análise de experiencias disruptivas e do emprego de sistemas IA, este encontro técnico organizado entre a institución provincial e a Fundación Democracia e Goberno local lucense congregou a máis de 50 profesionais relacionados coa xeriatría e a xerontoloxía.
“Levamos anos apostando por un modelo de servizos sociais baseado na proximidade, na calidade e na equidade. Xestionamos directamente os nosos Centros de Atención a Maiores, investimos en profesionais e coidados; e agora temos a responsabilidade de preguntarnos como a tecnoloxía pode reforzar ese modelo”, destacou Rivera Capón.
Subliñou que na Deputación “traballamos con persoas, maiores que necesitan coidados e familias en situación de vulnerabilidade” nunha provincia “extensa, envellecida e con moitos municipios pequenos e dispersos”. E engadiu: “Nese contexto, a intelixencia artificial ofrécenos posibilidades que hai poucos anos non poderíamos imaxinar, sistemas que axudan a detectar situacións de dependencia antes de que se agraven, ferramentas que melloran a xestión das listas de agarda, algoritmos que optimizan a asignación de recursos en territorios con grandes desequilibrios”.
A intelixencia artificial tamén carrexa, segundo o deputado, preguntas “que non teñen resposta doada, como quen decide o algoritmo ou que pasa coas persoas que quedan fóra dos patróns, ou, tamén, como protexemos a privacidade das persoas vulnerábeis”.
Pola súa banda, o xerente da Fundación Democracia e Goberno Local, José Luis Moreno, destacou que a intelixencia artificial é unha realidade presente no noso día a día, e que na prestación de servizos ás persoas maiores está a conseguir mellorar a súa calidade de vida, seguridade e autonomía, abordando ao mesmo tempo a soidade non desexada e o esgotamento nos coidadores.
Traballadoras sociais, técnicos dos concellos da provincia, persoal dos centros de día, educadores sociais e responsábeis de diferentes entidades e colectivos sociais formáronse durante a mañá deste venres coas seis conferencias e coloquios dirixidos por expertos sobre diferentes sistemas de xestión da atención, IA e dereitos no novo contexto.
A xornada comezou centrada na atención ás persoas maiores, falando da tipoloxía de competencias e a taxonomía de servizos, a súa análise económica e orzamentaria e o modelo de atención da Deputación de Ourense. Conferencias a cargo de Lidia García Martín, doutora de Dereito Administrativo da Universidade de León; Mónica Legaspi Díaz e José Juan Cerdeira Lois, interventora e responsábel da área de Benestar da Deputación de Ourense respectivamente.
Na segunda parte da mañá, Silvia García López, xefa do Servizo de Benestar e Igualdade da Deputación de Lugo expuxo o sistema “alternativo e innovador” de atención aos maiores da institución lucense; José Luis Domínguez Álvarez, doutor en Dereito Administrativo da Universidade de Salamanca, disertou sobre o emprego de sistemas de intelixencia artificial na atención aos maiores, as súas oportunidades e desafíos; e finalmente Anxo Varela Hernández, profesor de Dereito Administrativo da Universidade de Santiago, relatou as garantías dos dereitos fundamentais das persoas maiores na recepción de servizos asistenciais baseados en sistemas de intelixencia artificial.

Perplexity propón o uso dun Mac mini como coordinador de axentes de IA

Redacción — 2026-03-13T11:27:13Z

Perplexity reforza a súa aposta polos axentes de intelixencia artificial coa presentación de Computer, un sistema deseñado para actuar como un traballador dixital de propósito xeral capaz de executar tarefas complexas de forma autónoma. Esta tecnoloxía é unha evolución do modelo tradicional de chat: mentres as conversas con IA se limitan a responder preguntas, os axentes como Computer están pensados para realizar traballos completos e sostidos no tempo.
Computer pode interpretar un obxectivo expresado en linguaxe natural e dividir automaticamente o proceso en múltiples subaxentes que se encargan de investigar, navegar pola web, analizar datos ou conectar diferentes ferramentas. Estes fluxos de traballo poden executarse en paralelo e continuar funcionando durante horas, días ou mesmo meses, mentres o usuario supervisa ou introduce novas instrucións.
O sistema estrutúrase en tres pasos principais. En primeiro lugar, o usuario asigna unha tarefa mediante unha descrición textual. A continuación, Computer encárgase de executar o traballo en segundo plano, realizando investigacións, automatizando accións no navegador ou integrando aplicacións externas. Finalmente, o proceso pode ser iterado e refinado mentres o axente segue operando.
Entre as funcións destacadas está a posibilidade de configurar tarefas recorrentes e sistemas de supervisión continua. Tamén permite realizar investigación en paralelo na web, extraer información de múltiples fontes e sintetizar os resultados nun único fluxo de traballo automatizado. Ademais, Computer pode conectarse con ferramentas populares como Gmail, Slack, Notion ou Calendar, así como con centos de aplicacións adicionais a través de conectores.
A plataforma tamén incorpora capacidades de creación: pode desenvolver aplicacións, sitios web, informes ou outros produtos listos para produción como parte das tarefas asignadas.
A compañía ampliou agora este enfoque cunha serie de novas iniciativas que estenden o concepto de Computer a diferentes contextos. Unha delas é Personal Computer, unha solución que funciona nun Mac mini dedicado e que actúa como proxy dixital do usuario. Este dispositivo pode operar de maneira permanente, conectado ás aplicacións locais e aos servidores seguros de Perplexity, co obxectivo de executar tarefas de forma continua durante as 24 horas do día.
Para garantir a seguridade, o sistema require aprobación para accións sensibles e incorpora un rexistro completo de actividade, ademais dun mecanismo de apagado inmediato que permite interromper o funcionamento do axente en calquera momento.
Perplexity tamén anunciou Computer for Enterprise, versión que permite integrar o sistema cos servizos corporativos xa utilizados polas organizacións, incluíndo plataformas como Snowflake, Salesforce ou HubSpot. O axente pode realizar consultas directas a estas bases de datos, elaborar análises financeiras ou xerar informes estruturados sen intervención manual.
Outra das novidades é Comet Enterprise, unha versión empresarial do navegador con asistente integrado. Este sistema é capaz de comprender o contexto das pestanas abertas e automatizar tarefas repetitivas no propio navegador, ao tempo que ofrece ferramentas de control para os administradores das organizacións. Estes poden definir permisos, limitar accións ou supervisar a actividade mediante rexistros detallados.
Perplexity anunciou tamén unha nova plataforma de API composta por catro servizos: Search, Agent, Embeddings e Sandbox. Estes compoñentes permiten integrar nos produtos de terceiros as mesmas capacidades que utiliza Computer, incluíndo busca con citas verificables, execución de tarefas complexas e contornas seguras de execución.
A compañía tamén incorporou o acceso a fontes profesionais de datos baixo a denominación Premium Sources. Entre os provedores iniciais inclúense Statista, CB Insights e PitchBook, que adoitan empregarse en investigación de mercado e análise empresarial. A integración permite consultar estas bases de datos directamente desde as tarefas de investigación realizadas polo sistema.
Perplexity ampliou igualmente as capacidades de análise coa actualización de Perplexity Finance. Computer pode acceder agora a máis de 40 ferramentas de datos en tempo real baseadas en fontes como os rexistros da SEC, FactSet, S&P Global, Coinbase, LSEG ou Quartr. O sistema pode empregar estes datos para crear paneis interactivos, modelos en Excel ou aplicacións financeiras completas.
Coa expansión destas capacidades, Perplexity formula unha visión na que a intelixencia artificial deixa de ser un simple asistente conversacional para converterse nun sistema capaz de comprender obxectivos, reunir información, utilizar ferramentas e executar tarefas completas de forma autónoma. A empresa resume esta estratexia cunha idea central: a medida que estes sistemas evolucionan, «todo pasa a ser Computer».

Vídeo de presentación de Personal Computer

A UVigo e o Hospital Álvaro Cunqueiro usarán a IA para mellorar o tratamento da apnea do sono

S. P. — 2026-03-13T10:56:55Z

Co obxectivo de optimizar o manexo da apnea do sono, unha doenza que só na Área Sanitaria de Vigo afecta a unhas 10.000 persoas (que están en tratamento co dispositivo CPAP) mediante a aplicación de ferramentas de intelixencia artificial (IA), os docentes e investigadores da Escola de Enxeñaría Industrial da UVigo, Manuel Casal Guisande e María Torres Durán, xunto a outras profesionais da Unidade de Trastornos Respiratorios do Sono do Hospital Álvaro Cunqueiro, integrados todos eles no grupo NeumoVigo do Instituto de Investigación Sanitaria Galicia Sur, traballan desde hai dous anos nos dous ámbitos principais do proxecto Diosa (Design and Intelligence for Obstructive Sleep Apnea).
Estes dous ámbitos son: un centrado na estratificación dos e das pacientes con sospeita de apnea do sono para priorizar aqueles con maior risco, e outr, que pretende predicir que pacientes teñen probabilidades de seren adherentes ao tratamento con CPAP.
Ata o de agora, o proxecto avanzou, segundo as e os investigadores, de xeito significativo na primeira das liñas e “neste intre estamos a piques de iniciar un estudo piloto cunha ferramenta orientada a priorizar pacientes con sospeita de padecer a enfermidade e que adoitan proceder doutros servizos hospitalarios ou da atención primaria e son avaliados na Unidade de Trastornos Respiratorios do Sono do Servizo de Neumoloxía do Hospital Álvaro Cunqueiro de Vigo”, segundo explica Manuel Casal Guisande.
O dito centro hospitalario foi o escenario este xoves 12 de marzo, coincidindo este xoves co Día Mundial do Sono, da presentación entre o persoal clínico do hospital dos avances do proxecto Diosa.
O desenvolvemento do proxecto favoreceu incorporar novas análises, “que nos están permitindo comprender mellor as características da poboación con apnea do sono”, explican os investigadores, que por exemplo, identificaron diferentes perfís de pacientes con particularidades clínicas específicas.
“Un caso especialmente relevante é o das mulleres, que historicamente estiveron infradiagnosticadas. Moitas veces os seus síntomas atribúense a outros factores, como a etapa da menopausa ou trastornos do ánimo, o que pode facer que non se deriven para o estudo con tanta frecuencia como os homes”, explica o docente da EE Industrial da UVigo. A isto engádese o estudo da incorporación de novos indicadores que poden mellorar a avaliación da enfermidade, como a chamada carga hipóxica, que permite cuantificar o impacto real que teñen os episodios de obstrución respiratoria durante o sono. “Neste sentido estamos a desenvolver algoritmos propios para integrar este tipo de información nos modelos de predición”, aclaran as e os investigadores.
IA, tamén para resolver problemas reais da práctica clínica
Mentres aumenta o número de ámbitos no que o uso da IA está a ser cuestionado, os responsábeis de Diosa consideran que “no caso dunha enfermidade como a apnea do sono que é moi prevalente, cunha sintomatoloxía moi suxeita a variacións e que produce nas unidades que a estudan unha carga asistencia moi elevada, ferramentas que axuden a priorizar pacientes ou anticipar certos resultados poden ser moi útiles”. Seguindo este fío Manuel Casal sinala que “no noso caso nunca vimos a intelixencia artificial como un fin en si mesmo, senón como unha ferramenta que pode axudar a resolver problemas reais da práctica clínica”.
O investigador destaca que este proxecto naceu da colaboración de perfís complementario, dunha banda, a inquietude desde a enxeñaría por aplicar técnicas de IA no ámbito da saúde, e por outra, do interese dos clínicos por mellorar a atención a pacientes e avanzar cara un sistema sanitario máis eficiente e menos custoso.
2.000 novos pacientes cada ano
Nunha área sanitaria como a de Vigo que atende cada ano arredor de 2.000 novos pacientes con sospeita de apnea do sono, un proxecto como Diosa, que axude a priorizar mellor os casos e coñecer tamén a súa aceptación entre os profesionais sanitarios, consideran os seus promotores, “é fundamental para a súa futura implantación”. Neste sentido destacan que a ferramenta foi deseñada para empregarse con información dispoñíbel de forma habitual na práctica clínica, “ o que fai que poida integrarse con relativa facilidade no fluxo asistencial habitual, tanto, no ámbito hospitalario, como na atención primaria”, explican.
Explican que nese intre o sistema permite facer predicións para diferentes niveis do índice de apnea-hipopnea, indicador empregado para medir a gravidade da enfermidade, cunha capacidade de discriminación bastante boa, sinalan, engadindo que “en todo caso, é importante subliñar que esta ferramenta non pretende substituír as probas diagnósticas convencionais como a poligrafía cardiorespiratoria ou a polisomnografía en casos seleccionados, que seguen sendo o estándar para confirmar o diagnóstico. O que buscamos é mellorar o paso previo, a decisión sobre que doentes precisan da realización de estudos complementarios e cales deberían ter prioridade para acceder a esas probas, porque na actualidade esa priorización faise fundamentalmente en base a síntomas e consideramos que este sistema de soporte a decisión nos pode permitir optimizar este proceso diagnóstico e o uso dos recursos sanitarios” asegura Manuel Casal.
En canto á posibilidade de empregar esta ferramenta baseada na IA en outras enfermidades, Casal, é claro: “Si, a metodoloxía que empregamos neste proxecto pódese adaptar a outras enfermidades. Ao final, o que desenvolvemos son modelos baseados en datos clínicos que permiten identificar patróns e facer predicións que poden axudar na toma de decisións médicas”.

AMTEGA convoca novas probas para obter a ComDix

S. P. — 2026-03-13T10:26:20Z

A Axencia para a Modernización Tecnolóxica de Galicia (AMTEGA) abre este luns 16 de marzo unha nova convocatoria de probas presenciais de carácter libre para obter a Certificación Galega en Competencias Dixitais (ComDix) de nivel intermedio. As inscricións poderán realizarse ata o 25 de marzo a través da Rede CeMIT.
Esta convocatoria, que ofrece preto de 1.400 prazas, está aberta a toda a cidadanía interesada en acreditar os coñecementos, habilidades e actitudes necesarias para utilizar as tecnoloxías dixitais, tanto a nivel persoal como social ou profesional. As probas realizaranse os días 28, 29 e 30 de abril en horarios de mañá e tarde.
Toda a información específica desta convocatoria pódense consultar na páxina web da rede CeMIT, na que figura o calendario das probas presenciais nas aulas CeMIT de 49 concellos de Galicia, e dende onde se poderán realizar todos os trámites relacionados con esta convocatoria, dende a inscrición ata a consulta de persoas admitidas.
Tras a finalización do prazo de inscrición, e logo da publicación do listado definitivo no caso de que existan prazas vacantes, abrirase un período extraordinario para a súa adxudicación mediante solicitude dos participantes que figuren nos listados de espera.
Os contidos formativos para preparar estas probas de carácter libre están a dispor da cidadanía na plataforma de teleformación da Rede CeMIT. Para obter o certificado ComDix é preciso superar na proba unha enquisa de entre 60 e 70 preguntas tipo test que inclúe a avaliación das 21 competencias que establece o Marco Galego de Competencias Dixitais.
Esta convocatoria é unha das tres publicadas no DOG do pasado 16 de xaneiro, nos niveis de iniciación e intermedio, correspondentes ao primeiro semestre do ano 2026.
Así, estas probas de nivel intermedio seguirán outras de certificación ComDix no nivel Iniciación a finais do mes de xuño. Durante o segundo semestre deste ano 2026 seguiranse convocando de forma periódica estas probas no DOG, tanto nos niveis de Iniciación como Intermedio.

Optare Solutions lanza Augura Tech, a súa nova división transversal e multisectorial

S. P. — 2026-03-13T09:00:00Z

A firma galega Optare Solutions presentou Augura Tech, a súa nova división especializada en solucións de intelixencia artificial, concibida como unha entidade propia dentro do grupo e cun enfoque claramente transversal e multisectorial. A diferenza da actividade tradicional de Optare, cunha forte especialización no sector das telecomunicacións, Augura Tech nace co obxectivo de aplicar a IA á optimización e transformación de procesos de negocio en distintos sectores.
Optare explica que o lanzamento de Augura Tech responde a “unha decisión estratéxica aliñada coa
evolución do mercado e o recoñecemento do crecente papel da intelixencia artificial como panca de eficiencia, escalabilidade e mellora na toma de decisións empresariais, tanto en sector das telecomunicacións como noutros ámbitos, habilitando ademais a xeración de novos produtos baseados nesta tecnoloxía”.
A nova división céntrase “nun uso práctico e consciente da IA, con capacidade de ser medido e avaliado ao detalle, priorizando a soberanía e a privacidade do dato a través do despregamento de modelos en contornas privadas, garantindo así a solvencia técnica en contextos empresariais de alta esixencia”, engaden dende a firma viguesa, apuntando que Augura Tech está integrada por un equipo de profesionais con ampla traxectoria no desenvolvemento de solucións de negocio baseadas no uso de IA axéntica, grandes modelos de linguaxe e técnicas avanzadas de aprendizaxe máquina (machine learning).
A división apoiarase, así mesmo, na experiencia acumulada polo grupo Optare en proxectos complexos de transformación, automatización e mellora de procesos, así como na súa capacidade para operar en contornas empresariais esixentes. Este coñecemento permitirá desenvolver solucións de intelixencia artificial aplicadas, adaptadas ás necesidades específicas de cada negocio e sector.
Coa creación de Augura Tech, Optare Solutions busca reforzar o seu posicionamento como “grupo tecnolóxico en crecemento, capaz de estruturar capacidades especializadas para responder a novas oportunidades do mercado, mantendo unha visión a longo prazo baseada na innovación, a solidez operativa e o desenvolvemento sostíbel”.

Disney+ reforza a súa aposta polo vídeo vertical

Redacción — 2026-03-12T21:00:00Z

A plataforma Disney+ comezou a incorporar nos EE.UU. unha nova funcionalidade pensada para facilitar o descubrimento de películas e series desde o móbil. Trátase de Verts, un feed de vídeo vertical que permite explorar fragmentos de contidos da plataforma mediante desprazamento continuo na pantalla, nun formato inspirado na maneira na que os usuarios consumen vídeo nas redes sociais.
Esta novidade constitúe a primeira fase dun proxecto máis amplo co que Disney pretende evolucionar a experiencia de uso da súa plataforma. A función estará dispoñible inicialmente na aplicación móbil e permitirá aos subscritores acceder a un fluxo dinámico de escenas e momentos destacados de producións presentes no catálogo de Disney+.
Ao tocar a nova icona Verts na barra de navegación da aplicación, o usuario accede a un espazo onde pode desprazarse entre clips verticais de películas e series. Desde ese mesmo feed é posible engadir contidos á lista de reprodución ou iniciar directamente a visualización completa dun título.
Segundo explica a compañía, o obxectivo é facilitar a exploración do amplo catálogo da plataforma (que reúne máis de 100 anos de produción audiovisual) mediante un formato rápido e adaptado ao consumo móbil. O sistema emprega ademais un algoritmo avanzado de recomendación que personaliza os clips mostrados en función dos hábitos de cada usuario.
Disney sinala que o lanzamento actual representa só o inicio dun desenvolvemento máis amplo. A compañía prevé ampliar progresivamente as capacidades de Verts, incorporando novos tipos de contido e formatos narrativos. Entre as posibilidades que se están a explorar figuran a inclusión de vídeos creados por fans ou outros contidos relacionados coas comunidades que rodean ás principais franquías do catálogo.
A longo prazo, Verts aspira a converterse nun elemento central da experiencia diaria dos usuarios dentro de Disney+, reforzando a descuberta de contidos e introducindo novas formas de interacción co universo audiovisual da compañía.

A 12ª xornada Erros x Aprendizaxes encheu PALEXCO de experiencias empresariais innovadoras en primeira persoa

S. P. — 2026-03-12T20:35:57Z

Este 12 de marzo desenvolveuse en PALEXCO (A Coruña) a doceava edición do encontro profesional Erros x Aprendizaxes, no que empresas galegas e españolas do ámbito dixital compartiron experiencias sobre os erros cometidos nos seus procesos de crecemento e as aprendizaxes que lles permitiron avanzar.
Erros x Aprendizaxes é un evento profesional no que directivos e responsábeis de marcas comparten, en primeira persoa, erros reais cometidos nos seus proxectos de ecommerce e como conseguiron transformalos en aprendizaxes clave para o crecemento dos seus negocios.
O evento está organizado pola Deputación da Coruña e o Clúster do Ecommerce Galego.
O obxectivo é contribuír a promover unha cultura de aprendizaxe e innovación, poñendo en valor empresas e proxectos con sede ou impacto en A Coruña e Galicia. Trátase dunha cita aliñada cos obxectivos de apoio á empresa, á dixitalización e á competitividade das empresas do sector dixital galego.
O vicepresidente da Deputación da Coruña, Xosé Regueira Varela, participou na apertura das actividades destacando o valor de espazos que apostan por unha visión honesta do emprendemento e que rompen coa idea dun éxito empresarial sen dificultades.
Regueira sinalou que encontros coma este permiten “desmitificar o éxito e pór sobre a mesa a verdade crúa das campañas fracasadas”, incidindo en que moitas veces os erros “non son fracasos, senón unha sorte de profesores caros”. Subliñou que a diferenza entre abandonar ou avanzar está na capacidade de aprender deses golpes e seguir adiante: “É o que diferencia a quen abandona de quen aproveita eses erros para aprender máis rápido, con menos drama e sen vergoña”, afirmou.
Regueira tamén valorou o carácter colaborativo do encontro, que anima ás empresas a compartir tanto os fallos como os acertos. Segundo explicou, esta dinámica permite “deixar a fachada nas redes e compartir tamén os pantallazos feos”, lembrando que detrás de cada proxecto empresarial que consegue consolidarse adoita haber momentos difíciles que forman parte do proceso.
O encontro
Erros x Aprendizaxes reuniu en PALEXCO responsábeis de marcas de referencia que explicarán, en primeira persoa, como transformaron erros en oportunidades de mellora e innovación. Son a marca de moda feminina Par & Escala; a empresa de distribución de xeo Yo pongo el hielo; a xoiaría Rígido; a cadea hoteleira Alda Hotels; a firma creativa Heimat Atlántica; Joyerías Calvo; a tenda de streetwear e sneakers Cultura Urbana; a compañía tecnolóxica compostelá Dinahosting; a axencia de mercadotecnia dixital Smartclick; e o bufete coruñés Pintos & Salgado, especializado en dereito dixital.

O PEGI penalizará as caixas de botín e outras prácticas adictivas nos videoxogos

Redacción — 2026-03-12T20:30:00Z

: Os xogos de fútbol de EA Sports poderían pasar de PEGI 3 a PEGI 16 (ou PEGI 18) a partir do mes de xuño

O sistema europeo de clasificación por idades de videoxogos PEGI (Pan-European Game Information) ampliará a partir de xuño de 2026 os seus criterios de avaliación para incorporar novas categorías relacionadas cos riscos derivados das interaccións en liña. O obxectivo é ofrecer ás familias unha información máis clara e completa sobre elementos presentes nos xogos, como as compras internas, os obxectos aleatorios de pago ou as funcionalidades de comunicación entre usuarios.
A organización, con sede en Bruxelas, explicou que os xogos que se sometan á súa clasificación desde esa data serán avaliados cun conxunto máis amplo de criterios que terá en conta tanto o contido como determinadas funcionalidades. Entre elas figuran as compras de contidos dentro do propio xogo, os sistemas de recompensas aleatorias de pago, as ferramentas de comunicación entre xogadores ou os mecanismos que incentivan regresar ao xogo con frecuencia.
Segundo PEGI, esta actualización permitirá determinar con maior precisión cando a presenza destes elementos debe implicar unha clasificación por idades máis elevada. A entidade considera que se trata dunha modificación relevante do sistema de clasificación que pretende reforzar a seguridade no ámbito en liña e responder ás preocupacións de moitos pais e nais.

Novas ligazóns entre funcionalidades e clasificación por idades

A actualización tamén introduce unha relación directa entre determinadas funcionalidades e a idade recomendada polo sistema PEGI. Ata agora, a organización xa advertía sobre a presenza de características como as compras internas ou os elementos aleatorios de pago, pero desde agora estes aspectos poderán influír directamente na idade mínima recomendada.
Os xogos que inclúan ofertas de compra limitadas no tempo ou na cantidade terán como mínimo unha clasificación PEGI 12. No caso de incorporar sistemas baseados en cadea de bloques ou NFT, a clasificación será PEGI 18.
Pola súa banda, os xogos que inclúan obxectos aleatorios de pago (como caixas de botín) partirán dunha clasificación PEGI 16, aínda que nalgúns casos poderán chegar a PEGI 18. Isto pode supor un duro golpe para os xogos da serie EA Sports FC, que inclúen a compra de lotes de cartas con xogadores ao chou en Ultimate Team, de xeito que o xogo pasaría de ter un PEGI 3 a, como mínimo, un PEGI 16, presentándose como un risco para a rapazada.
Outro dos criterios ten que ver cos sistemas coñecidos como play-by-appointment, é dicir, aqueles que recompensan aos xogadores por volver ao xogo de maneira regular (por exemplo, misións diarias). Estes mecanismos situaranse en PEGI 7, pero se o xogo penaliza ao usuario por non regresar —por exemplo, reducindo o progreso ou eliminando contido— a clasificación elevarase ata PEGI 12.
Ademais, os xogos que incorporen sistemas de comunicación completamente sen restricións entre xogadores, sen opcións de bloqueo ou denuncia, recibirán unha clasificación PEGI 18.

Novos requisitos de información para as editoras

Coa entrada en vigor destes criterios, as editoras de videoxogos deberán facilitar información adicional cando os seus títulos inclúan algunha destas funcionalidades. Isto permitirá aos administradores do sistema PEGI avaliar con maior detalle como afectan á experiencia de xogo e á clasificación por idades correspondente.
As empresas poden solicitar a clasificación dun título antes do seu anuncio público ou da súa posta á venda, polo que PEGI prevé que os primeiros xogos avaliados segundo estes novos criterios comecen a presentarse a partir do verán deste ano.

Apple prepárase para celebrar os seus 50 anos

Redacción — 2026-03-12T20:00:00Z

Apple anunciou que celebrará o seu 50 aniversario o vindeiro 1 de abril, unha efeméride coa que a compañía pretende lembrar cinco décadas de innovación tecnolóxica e de transformación da maneira na que as persoas se comunican, crean, aprenden e experimentan o mundo.
A empresa fundada en 1976 naceu cunha idea sinxela pero ambiciosa: facer que a tecnoloxía fose persoal. Desde aquel inicio nun pequeno garaxe, Apple converteuse nun dos actores máis influentes da industria tecnolóxica global. Ao longo destas cinco décadas lanzou produtos que marcaron época, desde os primeiros ordenadores Apple II e Macintosh ata dispositivos máis recentes como o iPod, o iPhone, o iPad, o Apple Watch ou o Apple Vision Pro. A estes engádense servizos dixitais que hoxe forman parte da vida cotiá de millóns de usuarios, como App Store, Apple Music, Apple Pay, iCloud ou Apple TV.
Segundo a compañía da mazá, o espírito de pensar diferente que inspirou os seus fundadores continúa a guiar o seu traballo. Ese enfoque, baseado na combinación entre tecnoloxía avanzada e deseño intuitivo, permitiu desenvolver ferramentas que buscan ampliar as capacidades das persoas e facilitar novas formas de expresión, comunicación e creatividade.
Co gallo do aniversario, o director executivo da compañía, Tim Cook, publicou unha carta na páxina web corporativa na que repasa a historia da empresa e agradece o papel das persoas que contribuíron a construír o ecosistema de Apple durante estas cinco décadas. «Pensar diferente sempre estivo no corazón de Apple. É o que nos impulsou a crear produtos que permiten ás persoas expresarse, conectar e crear algo extraordinario», sinala Cook no texto.
A compañía subliña que cada innovación tecnolóxica é só o inicio dunha historia que continúan os propios usuarios, que empregan estas ferramentas para traballar, aprender, emprender ou compartir momentos da súa vida. Desde a creación de empresas ata proxectos creativos, pasando por avances científicos ou experiencias persoais, Apple sostén que o impacto real da tecnoloxía prodúcese cando chega ás mans das persoas.
A celebración do aniversario incluirá diferentes iniciativas nas vindeiras semanas nas que participarán tanto a empresa como a súa comunidade global de usuarios e desenvolvedores. O obxectivo é recoñecer o papel da creatividade e da innovación na evolución da compañía e na influencia que tivo no desenvolvemento da industria tecnolóxica.
Ao mesmo tempo, Apple insiste en que este aniversario non é só unha ocasión para mirar ao pasado. A empresa asegura que continuará centrada no futuro, apostando por novas xeracións de chips propios, software e servizos, así como por tecnoloxías emerxentes como Apple Intelligence. Tamén reafirma os seus compromisos en ámbitos como a protección da privacidade, a accesibilidade dos produtos e a sustentabilidade ambiental.

O XIV Proxecto Didáctico Antonio Fraguas volverá distinguir a investigación escolar arredor da cultura galega

S. P. — 2026-03-12T17:30:00Z

Este xoves 12 de marzo presentouse o XIV Proxecto Didáctico Antonio Fraguas Fraguas, unha iniciativa impulsada pola fundación dedicada ao autor e co que colabora a Xunta de Galicia a través da Secretaría Xeral da Lingua, co obxectivo de poñer en valor o patrimonio lingüístico e cultural galegos desde o ensino e dende a innovación.
Na presentación interviñeron a presidenta da fundación, Concha Losada, e un dos coordinadores do proxecto, Bieito Pérez Outeiriño.
Tamén participou o secretario xeral da Lingua, Valentín García, quen salientou a importancia de motivar ás novas xeracións para impulsaren proxectos a prol do galego. Lembrou que a iniciativa vai dirixida aos centros de ensinanza de Primaria, Secundaria, Bacharelato, Formación Profesional e Educación Especial.
Segundo explicaron, a convocatoria convida ao alumnado, seguindo a liña trazada polo labor docente e científico de Antonio Fraguas, a realizar pescudas sobre o patrimonio etnográfico, antropolóxico, lingüístico, xeográfico, histórico e artístico galego.
Valentín García fixo fincapé en que un capítulo do traballo dedicarase a abordar algún aspecto lingüístico “xa sexa a toponimia, antroponimia, léxico ou fraseoloxía”.
No marco desta convocatoria, os centros escolares realizarán proxectos orientados á educación patrimonial, ao coñecemento da lingua e do medio e á valorización dos máis diversos elementos do noso acervo cultural.
Establécense dúas modalidades, unha para Primaria e outra para Secundaria. Así, o xurado escollerá un proxecto de cada unha delas que deberá ser desenvolvido durante o seguinte curso escolar e ao que se destinará na súa totalidade a dotación do premio, 7.000€. Nesta liña, inclúese a adquisición de material escolar ou o equipamento destinado ao seu desenvolvemento, así como a elaboración dos elementos que reflictan o traballo realizado, presentados en lingua galega e no formato axeitado para a súa exposición.
Cómpre destacar que serán valoradas as accións que fomenten a educación en igualdade, o coñecemento do patrimonio material e inmaterial relacionado co Camiño de Santiago, a orixinalidade e a diversificación temática respecto dos proxectos premiados nas edicións anteriores. Así mesmo, considérase mérito a participación da comunidade escolar no seu conxunto (alumnado, profesorado, persoal non docente, familias) e a implicación da poboación.
A presentación pública e a exposición dos traballos resultantes terá lugar no Museo do Pobo Galego no derradeiro trimestre de 2027, "nun ano moi especial que coincide co cincuenta aniversario do Museo", como apuntou a presidenta da Fundación Antonio Fraguas Fraguas. Concha Losada subliñou ademais a "oportunidade que supón para o alumnado o feito de participar desta iniciativa que permite, por unha banda, achegarse de maneira activa ao coñecemento e á investigación do patrimonio cultural da súa contorna, pero tamén compartir os resultados dese traballo coa sociedade, reforzando entre as e os escolares a importancia de transmitir publicamente ese patrimonio cultural dun xeito claro, rigoroso e atractivo".
O prazo para presentar candidaturas para a convocatoria 2026-2027 estará aberto até o 25 de maio deste ano. O xurado emitirá o seu ditame na segunda quincena do mes de xuño.
Desde a organización, agardan "con ilusión" a recepción de propostas e confían en manter a calidade das últimas convocatorias nas que, como apuntaba un dos coordinadores, Bieito Pérez Outeiriño, "se recibiron e resultaron premiados proxectos moi interesantes que destacaban polo bo traballo en equipo que había detrás tanto do profesorado como do alumnado".
Na edición anterior resultaron galardoados os traballos Viva o entroido vivo! Lingua, festa e comunidade, presentado conxuntamente polos CEIP Lamas de Abade e Apóstolo Santiago de Santiago de Compostela, e Pérez Viondi da Estrada; e A sustentabilidade das artes de pesca a través do proceso de encascado de redes: o caso de Burela, presentado polo IES Monte Castelo de Burela.

Minsait impulsa dende Galicia unha revolucionaria xeración de servizos públicos máis intelixentes

S. P. — 2026-03-12T17:30:00Z

A firma tecnolóxica Minsait (Indra Group), consultora con forte presenza en Galicia (ten sedes en Santiago e A Coruña, con máis dun milleiro de empregadas/os) participou este xoves 12 de marzo no encontro Retos/aposta da Transformación Dixital nas AAPP de Galicia: goberno do dato, IA e ciberseguridade, organizado por Socinfo Digital en Santiago (Galicia), para abordar os desafíos e oportunidades que expón a aplicación da IA no ámbito das administracións públicas.
A compañía mostrou como a IA pode converterse “nun verdadeiro habilitador da modernización do sector público, desde un enfoque consciente, seguro e aliñado coas necesidades reais dos cidadáns”. En palabras de José Luis Albo, director de AAPP de Minsait en Galicia, “as administracións galegas están nun momento decisivo para dar un salto cualitativo en dixitalización e habilitar solucións que lles permitan gañar axilidade e eficiencia sen renunciar á seguridade nin á confianza do cidadán”. Engadiu que “Galicia está a demostrar unha enorme madurez dixital e queremos acompañar este progreso con solucións que acheguen eficiencia, seguridade e confianza”.
Tamén lembrou que en Galicia “traballamos moi de preto coas institucións para acompañalas nese proceso de transformación, achegando tecnoloxía, coñecemento do sector público e unha visión a longo prazo que garanta resultados sostíbeis”.
Durante a súa intervención, Albo puxo o foco en IndraMind, a súa proposta de intelixencia artificial soberana deseñada para integrar capacidades avanzadas de IA de forma transversal nos procesos críticos de organizacións públicas e privadas. No caso das administracións, dixo, “IndraMind permite evolucionar desde modelos tradicionais de dixitalización cara a un uso máis soberano e intelixente do dato, a automatización de procesos complexos e a mellora na toma de decisións, mantendo sempre o control sobre as operacións, a rastrexabilidade e a soberanía tecnolóxica”.
Apuntou tamén que o seu deseño permite integrar diferentes modelos de IA (incluídos modelos xenerativos) de forma segura, gobernada e aliñada cos marcos regulamentarios europeos, asegurando que os datos críticos fiquen baixo control das propias institucións, un enfoque holístico uqe responde á crecente complexidade da xestión pública e á necesidade cada vez maior de garantir servizos dixitais robustos, inclusivos e de confianza para todos”.
A compañía tecnolóxica subliñou que a dixitalización “xa non consiste unicamente en transformar procesos analóxicos en servizos dixitais, senón en garantir que as administracións operen sobre un dato ben gobernado, seguro e baixo control propio”. Manifestou que a IA “amplifica tanto os acertos como os erros, e por iso o goberno do dato e a soberanía tecnolóxica convertéronse en piares esenciais para asegurar que as decisións públicas sexan baseadas en información de confianza e plenamente aliñada co interese xeral; por iso, o importante non é só aplicar IA, senón facelo desde contornas que reforcen a transparencia, a rastrexabilidade e a autonomía das institucións”.
Para Fernanda Cruz, responsábel de Desenvolvemento de Negocio de IndraMind, “a clave non está só en aplicar intelixencia artificial, senón en facelo de maneira consciente e útil para o servizo público”. Explicou que IndraMind nace para axudar ás administracións para incorporar a IA no seu día a día, mellorando a eficiencia interna, a calidade do servizo ao cidadán e a capacidade de anticipación, sempre desde un enfoque ético, “Con ese obxectivo, IndraMind converte a complexidade das ameazas modernas en decisións públicas máis rápidas, actuando como o sistema nervioso da seguridade cidadá ao integrar nun único cadro operativo cámaras e vixilancia, sensores, ciberintelixencia, control de accesos, capacidades counter‑UAS, datos satelitais e coordinación operativa en case tempo real”, sinalou Cruz.
Compromiso e presenza de Indra Group en Galicia
Indra Group mantén en Galicia o que nas súas palabras “constitúe un dos seus ecosistemas tecnolóxicos e de talento máis sólidos e estratéxicos de toda España”. Con máis de 1.630 profesionais repartidos polos seus oito centros na nosa xeografía (incluído un Centro de Excelencia en Santiago e polos especializados en Vigo) a compañía actúa a través de Minsait como socio tecnolóxico de referencia da Xunta e das principais institucións e empresas galegas.
A súa presenza combina “capacidades avanzadas en intelixencia artificial, defensa, vixilancia electrónica, sistemas anti-drons, modernización da administración e dixitalización de servizos públicos, en colaboración con universidades, centros tecnolóxicos e máis de 15 centros de FP para impulsar talento altamente cualificado”, informaron fontes do grupo, subliñando que a aposta de Indra Group por Galicia é “estrutural e de longo prazo, cunha folla de ruta que reforza o seu papel como tractor de innovación e soberanía tecnolóxica”.
A compañía habilitou un plan estratéxico para a Galicia que prevé superar os 2.000 profesionais en 2026, despregar investimentos en I+D por 50 millóns de euros e consolidar novos polos de alta tecnoloxía aeroespacial, defensa e microelectrónica (incluída a súa participación en SPARC Foundry ou a súa actividade en sistemas UAV e centros de ensaios en voo).
“Todo iso”, sinalan fontes de Indra, “converte a Galicia nun nodo clave para o crecemento do grupo e nun laboratorio real onde desenvolver solucións punteiras que fortalecen o tecido empresarial, xeran emprego cualificado e elevan a proxección internacional da comunidade”.

A Xunta transforma o modelo de Administración para ofrecer recursos e servizos adaptados ás necesidades da cidadanía

Redacción — 2026-03-12T16:30:00Z

A Xunta de Galicia está a reformular o seu modelo de relación coa cidadanía co obxectivo de facelo máis eficaz, máis personalizado, máis accesible e máis seguro, segundo explicou hoxe o director da AMTEGA, Damián Rey. O responsable autonómico participou esta mañá no encontro Retos e apostas da transformación dixital nas Administracións Públicas de Galicia: goberno do dato e ciberseguridade, organizado pola revista da Sociedade da Información Dixital (SOCINFO).
No centro desta nova estratexia sitúase o Nodo de Información Cidadán (Citizen Data Hub), unha plataforma que emprega tecnoloxías de goberno do dato e intelixencia artificial para identificar as necesidades e intereses de cada persoa e ofrecerlle de maneira proactiva e personalizada os recursos e servizos que precisa.
O director da Axencia autonómica subliñou que este sistema garante a seguridade da cidadanía e dos seus datos e que, en todos os casos, xestiona o consentimento das persoas para poder recibir este tipo de servizos proactivos.
A iniciativa busca que a cidadanía perciba a Administración como un sistema integrado de xestión, en lugar dun conxunto fragmentado de departamentos. O Nodo de Información Cidadá sitúa ás persoas no centro da acción administrativa, permite coñecer mellor as súas necesidades e intereses e facilita unha xestión máis eficiente dos recursos e servizos públicos.
Na actualidade, a Xunta xa presta servizos proactivos seguindo este modelo en ámbitos como a tarxeta benvida para familias que teñan ou adopten un fillo ou unha filla, a renovación das licenzas de caza ou pesca fluvial, a declaración do censo de animais en explotacións gandeiras ou a declaración da colleita de uva. O propósito é estender progresivamente este sistema ao conxunto de trámites e procedementos administrativos.

Incorporación de avances tecnolóxicos na Atriga

Pola súa banda, a directora da Axencia Tributaria de Galicia (Atriga), Sonia Lafont, destacou a evolución continua do organismo e a incorporación progresiva de avances tecnolóxicos na administración tributaria. Segundo indicou, estes avances céntranse, por unha banda, na cidadanía, promovendo o coñecemento das obrigas tributarias e facilitando o seu cumprimento, e por outra, na detección de irregularidades e na loita contra a fraude.
Lafont explicou que a tecnoloxía permite ofrecer atención ao contribuínte por distintas vías: presencial, telefónica e telemática. Neste sentido, a Atriga conta cunha páxina web específica e traballa tamén na implantación de asistentes virtuais. Ademais, anunciou que nas próximas semanas estará dispoñible unha nova Oficina Virtual Tributaria (OVT), deseñada para ser máis rápida e sinxela que a actual.
A directora da Atriga tamén fixo fincapé na ampliación constante dos medios de pagamento, co obxectivo de facilitar o cumprimento das obrigas tributarias. Entre as opcións dispoñibles figuran a domiciliación bancaria, a transferencia, o Bizum, o xiro postal ou o pagamento a través das PDA dos carteiros rurais.
No encontro celebrado esta mañá tamén participou o xefe da Subárea de Seguridade da AMTEGA, Gustavo Herva, que abordou a situación e os retos da ciberseguridade na Administración autonómica.

Naturgy investiu 217 millóns en 2025 no reforzo e dixitalización das súas redes en Galicia

S. P. — 2026-03-12T16:00:00Z


Mónica Puente, directora de Redes Electricidade España de Naturgy

UFD, a distribuidora de electricidade de grupo Naturgy, investiu 217 millóns en 2025 na dixitalización e mellora das súas máis de 61.300 quilómetros de rede en Galicia, un incremento do 18% con respecto á media de investimento dos últimos cinco anos.
Segundo explica a operadora eléctrica, “esta cifra é o 53% de todos os investimentos que a compañía destinou durante o pasado ano ás súas redes eléctricas a nivel nacional”.
Desde 2021, “os investimentos de UFD superaron os 913 millóns de euros na Comunidade, co foco posto na mellora da calidade de servizo aos seus clientes e o fortalecemento da infraestrutura”, engadiu Naturgy, detallando que estes investimentos estiveron orientadas principalmente a avanzar en dixitalización, fomentar a innovación e a implementación de tecnoloxías avanzadas en telemedida e telexestión dos puntos de subministración, así como no telecontrol e a sensórica das redes.
Ademais, UFD está a investir en ampliar a capacidade da súa rede para dar entrada a nova demanda e continuar mellorando a subministración dos seus 1,6 millóns de clientes na Comunidade. Unha parte dos investimentos realizados en dixitalización foron financiadas pola Unión Europea a través do Programa NextGenerationEU, no marco do Plan de Recuperación, Transformación e Resiliencia elaborado polo Goberno de España.
Nun plano máis concreto, o traballo realizado pola compañía permitiu “a mellora da calidade do servizo medida a través do tempo de interrupción equivalente á potencia instalada (TIEPI)”. Este indicador en Galicia é un 14% mellor que hai cinco anos, ata situarse nun tempo de interrupción media do servizo de 43,8 minutos en 2025, “o que ilustra unha mellora constante cara a os ambiciosos obxectivos de calidade marcados pola compañía”, engadiu esta.
“UFD volveu situar os seus investimentos en 2025 no nivel máximo que nos permite o regulador e a nosa vocación é seguir facéndoo nos próximos anos para mellorar a resiliencia da nosa infraestrutura, ampliar a súa capacidade e avanzar en dixitalización”, afirmou Mónica Puente, directora de Redes Electricidade España de Naturgy.
En 2025, entre outras actuacións de mellora das súas instalacións, na provincia da Coruña a compañía adecuou a subestación de Tambre, instalou novas posicións na subestación de Palmeira, en Ribeira, e ademais renovou a liña de alta tensión Vilar do Colo-Eume. Na provincia de Pontevedra, adecuou as subestacións de Lalín, Atios, A Estrada e Vilagarcía; e soterrou parte da liña de alta tensión Mourente-Pontesampaio.
Ademais, a compañía adecuou as subestacións do Barco de Valdeorras (Ourense) e de Chantada (Lugo), executou a primeira fase de liña de alta tensión de Lugo a Fibranor e reforzou diversas liñas de media tensión nestas dúas provincias, como as de Monterrei, Xunqueira de Espadañedo e Castrelo do Val (Ourense) e Navia de Suarna e Becerreá (Lugo).
Durante 2026, a compañía seguirá evolucionando a súa Plataforma Dixital de Servizos como espazo onde os usuarios poden realizar todas as súas xestións desde calquera dispositivo, a calquera hora e desde calquera lugar, e como principal punto de contacto entre os diversos axentes do sistema eléctrico.

Samantha Hudson e María Barrier chegan ao Carballo Interplay con Bimboficadas

S. P. — 2026-03-12T15:30:00Z

Samantha Hudson e María Barrier, integrantes de Bimboficadas, faranse cargo este ano de Rajando con..., un dos formatos clásicos do festival de contidos dixitais Carballo Interplay, levando ao escenario a esencia do seu podcast nun espectáculo que só poderá gozarse en directo.
A actividade terá lugar o venres 17 de abril ás 22.00 horas no Mercado de Carballo, no marco da
13ª edición do festival, que se celebrará do 16 ao 19 de abril de 2026.
Segundo informou a organización do CIP, “será a primeira vez que Samantha Hudson e María Barrier achegan a Galicia este proxecto sonoro”, que se suma a unha programación da que xa forma parte Pop y Muerte, o podcast conducido por Kiko Amat e Benja Villegas, que poderá escoitarse en directo o sábado 18 de abril ás 22.30 horas, tamén no Mercado de Carballo.
“Con estes primeiros anuncios, o festival comeza a debuxar unha nova edición marcada pola presenza dalgunhas das voces máis populares e estimulantes do panorama dixital actual”, engadiu a organización.
Sen filtros
Samantha Hudson, artista e icona da xeración Z, e María Barrier, xornalista e actriz, son as creadoras de Bimboficadas, un podcast nacido da súa amizade e da súa complicidade, no que combinan humor, ironía e unha ollada crítica moi persoal.
“A súa participación no festival fará que Rajando con... incorpore a esencia deste formato, que revisita con retranca e sen filtros cuestións de actualidade como a identidade de xénero, a precariedade laboral, a saúde mental ou os debates da esfera pública a través da sátira, a cultura pop e o comentario social”, informaron dende a organización do festival de Carballo.
Carballo Interplay está organizado polo Concello de Carballo e Turismo de Carballo con produción e dirección de Cósmica. Conta co apoio da Xunta de Galicia, a través de AGADIC, e da Deputación da Coruña.
Carballo Interplay é un festival de pensamento e contidos dixitais que, desde Galicia, veu consolidándose como un espazo pioneiro para impulsar novas linguaxes audiovisuais na Internet a través de proxeccións, encontros, directos e actividades abertas ao público.
Xunto á súa programación, mantén unha aposta sostida polo ecosistema creativo en galego mediante iniciativas específicas como o Premio á Creación Dixital Galega, dirixido a canles e proxectos publicados na nosa lingua en plataformas como YouTube, TikTok ou Instagram, e o Premio á Produción de Contido Dixital en Galego. Nos últimos anos, o festival vén reforzando estes recoñecementos para dar visibilidade, profesionalizar e acompañar creadoras e creadores que desenvolven contidos en galego na Rede, ampliando ademais o abano de formatos admitidos e evidenciando o crecente interese da mocidade por crear e consumir Internet na súa propia lingua.

A Universidade de Vigo oferta unha microcredencial sobre LinkedIn

Redacción — 2026-03-12T15:00:00Z

A rede profesional LinkedIn —ferramenta estratéxica para xerar negocio, reforzar a reputación profesional e establecer relacións directas con responsables de decisión no ámbito empresarial— está a trasladarse ao ámbito académico, como amosa a nova microcredencial impulsada pola Universidade de Vigo centrada no posicionamento profesional e nas estratexias B2B nesta plataforma.
A formación, titulada LinkedIn Accelerator: Posicionamento e autoridade profesional, está promovida polo Centro de Posgrao e Formación Permanente da Universidade de Vigo e conta co respaldo institucional do seu reitor, Manuel Joaquín Reigosa Roger. O programa busca achegar ao alumnado novas competencias vinculadas ao márketing dixital B2B, á construción da reputación profesional e á creación de sistemas de captación de oportunidades de negocio en contornas dixitais.
Durante a microcredencial, os participantes aprenderán a desenvolver unha presenza profesional sólida na plataforma, fortalecer a súa autoridade nun sector determinado e transformar a visibilidade en relacións profesionais e oportunidades reais de negocio. A iniciativa pretende responder a unha realidade cada vez máis presente no tecido empresarial, onde o uso estratéxico das redes profesionais se converte nun elemento clave para acceder a novos mercados e clientes.
Destaca o feito de que un dos docentes do programa será o emprendedor galego de 22 anos Martín Arosa, fundador da empresa ZipGenial e referente no uso de LinkedIn para a captación de oportunidades comerciais e o desenvolvemento de marca persoal. ZipGenial, deseña estratexias baseadas no posicionamento de autoridade dos líderes empresariais, na creación de contido estratéxico e na xeración de conversacións comerciais cualificadas con potenciais clientes. O obxectivo é converter a visibilidade dixital en resultados empresariais medibles.
A incorporación deste tipo de coñecementos ao ámbito universitario evidencia tamén o interese crecente das institucións académicas por integrar nas aulas novas competencias vinculadas ao emprendemento dixital e ás dinámicas da economía conectada.

A Xunta presenta a candidatura para que Santiago de Compostela sexa en 2028 Cidade Europea da Ciencia

Redacción — 2026-03-12T15:00:00Z

: Imaxe de amaianos

A Xunta de Galicia formalizou hoxe a súa candidatura para que Santiago de Compostela poida ser designada cidade europea da ciencia no ano 2028. Deste xeito, a Consellería de Educación, Ciencia, Universidades e FP culmina un traballo desenvolvido durante meses co obxectivo de acadar un novo fito para a I+G+i, a investigación e a innovación feitas na Comunidade. Trátase dun ámbito que o Executivo autonómico considera prioritario na súa acción de goberno.
Como explicou o conselleiro Román Rodríguez, «iniciamos un procedemento esixente, xa que se trata dunha convocatoria moi competitiva e, polo tanto, dun obxectivo difícil de acadar. Con todo, cómpre intentalo porque, de conseguilo, permitiría reforzar a visibilidade do sobresaínte traballo científico que se desenvolve na nosa Comunidade, cada vez máis recoñecido a nivel internacional». Ademais, sinalou que «a obtención desta distinción levaría aparellada a captación de novos investimentos».
Estes fondos beneficiarían tanto a capital galega como as cidades de Vigo e da Coruña. De feito, a candidatura liderada pola Xunta conta como socios galegos coa cidade compostelá e coas universidades de Santiago, Vigo e A Coruña, que poderían desenvolver actividades nos seus campus dentro da programación. Tamén participa a Asociación Galega de Comunicación de Cultura Científica e Tecnolóxica.
Ata o momento, España non conseguiu ningunha declaración de cidade europea da ciencia, polo que, se a candidatura da Xunta obtivese o visto bo, Santiago converteríase na primeira.

Obradoiros, festivais e actividades educativas

O proxecto, que leva por nome Ways, emprega o concepto do Camiño de Santiago para conectar a cidadanía coa ciencia, inspirándose no espírito de intercambio e mobilidade que caracteriza a Ruta Xacobea. Con este propósito, proponse converter a iniciativa nun percorrido europeo que una tres rexións: Galicia (España), Pomorskie (Polonia) e Emilia-Romagna (Italia), a través das cidades de Santiago, Gdynia, Rávena e Módena.
A Comisión Europea é a institución encargada da convocatoria, denominada Science Comes to Town, que acada a súa terceira edición. A través dela financia iniciativas que achegan a ciencia á sociedade. Apoia a organización de eventos públicos como festivais, obradoiros ou actividades educativas co obxectivo de promover a cultura científica, fomentar o interese pola investigación e fortalecer a relación entre ciencia e cidadanía. Este é precisamente un dos obxectivos do Plan galego de investigación e innovación aprobado pola Xunta de Galicia o pasado ano e dotado con máis de 1.300 millóns de euros.

Os novos auriculares de JBL prometen ata 80 horas de autonomía

Redacción — 2026-03-12T14:30:00Z

JBL presentou os novos auriculares JBL Live 780NC, un modelo circumaural deseñado para ofrecer unha experiencia de escoita prolongada combinando audio de alta resolución, cancelación de ruído adaptativa e unha autonomía que pode chegar ata as 80 horas de reprodución.
Os auriculares incorporan transdutores dinámicos de 40 milímetros compatibles con audio de alta resolución tanto en conexión sen fíos como mediante cable. O novo modelo ofrece un son máis nítido, detallado e cun maior rango dinámico, reforzado pola tecnoloxía JBL Spatial Sound, que permite recrear unha sensación tridimensional a partir de contido estéreo.
Outro dos elementos centrais do dispositivo é a tecnoloxía True Adaptive Noise Cancelling 2.0, baseada nun sistema de seis micrófonos que analiza continuamente o contorno acústico do usuario. Estes sensores permiten capturar e filtrar os ruídos ambientais en tempo real, axustando automaticamente a intensidade da cancelación para reducir distraccións. A aplicación JBL Headphones permite ademais modificar o nivel de son ambiente que se deixa pasar.
O modelo integra tamén dous micrófonos con beamforming e o sistema Perfect Calls 2.0, apoiado por algoritmos de cancelación de ruído adestrados con intelixencia artificial. Esta combinación permite mellorar a claridade das chamadas eliminando ruídos de fondo como tráfico, vento ou zunidos.
Os JBL Live 780NC inclúen Bluetooth 6.0 con soporte para LE Audio e conexión multipunto, o que permite emparellar dous dispositivos á vez e alternar entre eles sen interromper a reprodución. Ademais, poden conectarse a fontes de audio mediante cable de 3,5 milímetros ou USB-C mantendo as súas funcións principais grazas ao sistema Smart Tx.
A personalización da experiencia sonora complétase coa tecnoloxía Personi-Fi 3.0, que permite adaptar o perfil de audio ás características auditivas do usuario mediante ferramentas interactivas dispoñibles na aplicación oficial de JBL. Desde esta mesma aplicación tamén se poden configurar os controis táctiles, o ecualizador ou os axustes das chamadas.
A batería é outro dos puntos destacados dos auriculares, con ata 80 horas de reprodución coa cancelación de ruído desactivada, ou ata 50 horas coa función activada. Ademais, unha carga rápida de cinco minutos proporciona aproximadamente catro horas adicionais de escoita.
Os auriculares teñen un peso de 260 gramos, incorporan un deseño encartable pensado para facilitar o transporte e estarán dispoñibles en varias cores (azul, verde, champaña, negro e branco). O prezo recomendado sitúase en 179,99 euros, mentres que a xeración anterior, os JBL Live 770NC, con ata 65 horas de autonomía, teñen un prezo de venda recomendado de 129,99 euros, o que fai que manteñan o seu atractivo.

: Os novos auriculares de JBL combinan prestacións avanzadas cunha boa autonomía