AGESTIC pon de manifesto a nosa puxante creatividade TIC cos seus premios

A Asociación Galega de Empresas TIC, AGESTIC, fixo entrega este venres en Santiago dos seus Premios INNOVA-G, os pertencentes á súa edición 2011, uns galardóns dos que falamos polo miúdo os días pasados, entre outras cousas para facer un pouquiño de autoloubanza, e que veñen de pór de manifesto unha serie de boas novas para o sector produtivo galego. Entre estas boas novas cómpre salientar a seguinte: as empresas do eido TIC deste o noso recanto do noroeste xeográfico non teñen nada que envexar, nin por creatividade nin por potencialidade de mercado, ao que se fai dende os supostos centros principais de innovación e economía.

Moitos foron os representantes do sector TIC galego que acudiron ao acto de entrega dos Premios INNOVA-G 2011

Os galardóns deste ano, que incluíron dúas Mencións de Honra, para nós e para os nosos compañeiros de EGANET, foron entregados nun acto celebrado na sede da rúa do Vilar de NovaCaixaGalicia que operou, en boa medida, como un resumo do máis representativo do noso sector TIC.
En boa medida, serviu para reunir nun mesmo lugar, o novo edificio da entidade financeira en Compostela, a unha boa parte dos principais responsábeis do noso tecido tecnolóxico-dixital, tanto procedentes dos ámbitos empresarial e investigador como do público. Como exemplos desta representatividade da que estamos a falar, dicir que no acto de entrega de galardóns participaron activamente, amais dos representantes das empresas e entidades finalistas e gañadoras, José María López Bourio, presidente de AGESTIC, Andrés Hermida, director xeral de Promoción do Emprego, e Mar Pereira, secretaría xeral de Modernización.
Por certo que os premios contaron coa axuda da Xunta da Galicia, da ESEI da Universidade de Vigo, do Grupo FEMXA e da devandita entidade financeira galega.
Os premios, entregados a partir das 12.30 horas, foron convocados co arela de recoñecer o traballo ben feito desenvolvido dende Galicia en materia tecnolóxico-dixital. Nesta edición, como puidemos saber, foron dar ás empresas e institucións que citamos de seguido, recoñecementos aos que cómpre engadir as devanditas Mencións de Honra dedicadas a Código Cero e EGANET, en boa medida polo seu labor e compromiso de divulgación tecnolóxico-dixital e pola súa loita continua contra a fenda dixital no país.