R expón as súas metodoloxías no ámbito da xestión de persoal fronte aos empresarios novos

Santiago Vázquez, directivo da operadora galega R, durante a súa intervención nunha xornada de AJE Galicia

A Asociación de Xoves Empresarios de Galicia (AJE Galicia) desenvolveu esta semana unha xornada dirixida a amosar casos reais de metodoloxías eficaces e innovadoras na xestión dos recursos humanos e o que se coñece como alta dirección. A xornada contou coa participación activa dun profesional ligado a unha das empresas galegas de maior prestixio no panorama TIC da nosa terra e alén dela: a operadora R. Falamos do seu director de persoas, Santiago Vázquez, “o máximo responsable da implantación do modelo de xestión baseado na felicidade no ámbito de traballo, cousa pola que a empresa galega xa foi premiada”, informa o colectivo de empresarios novos.
No encontro, cuxo obxectivo foi amosarlles aos responsables de iniciativas de mercado acabadas de chegar as ferramentas precisas para fomentar o talento, Santiago Vázquez fixo un repaso por todos aqueles elementos que temos ao noso alcance, nun contexto xeral de crise que nos afecta a todos, para acadar meirande inspiración e motivación no equipo de traballo. Elementos igual de importantes, sinalou, que unha suba de salarios que en moitos casos preséntase imposible, e máis, recordou, nestes tempos que vivimos. Para corroboralo e para pór de manifesto as súas vantaxes, Vázquez lembrou que “hai estudos que teñen demostrado que as firmas con meirande capacidade de ser líderes acadan unha rendibilidade entre un 9,6 e un 18,2% máis que outras, e ademais teñen unha rotación de persoal un 38% menor; isto demostra que hai factores alén do salario que inflúen no compromiso das persoas que traballan nas nosas empresas”.
Estes elementos, engadiu, resultan imprescindibles en intres de crise, co fin de “construír o ambiente preciso para levar adiante, con éxito, un proxecto empresarial”. Segundo apuntou o directivo da operadora galega, a calidade na dirección cómpre entendela como o potencial das persoas que teñen a outras persoas ao seu cargo para poder inspiralas e sacar delas o mellor, feitos que redundarán longo na satisfacción e no compromiso dos profesionais que constitúen unha empresa. “O éxito da xestión dos directivos”, manifestou, “está determinado nun 85% polos seus niveis de intelixencia emocional, fronte ao 15% do cociente intelectual”.