Port Desings leva os seus produtos á Antártida

Port Designs, a firma fabricante de solucións de transporte, protección e ergonomía para ordenadores portátiles, da que sempre damos conta polos seus innovadores produtos, vén de dar que falar de novo na nosa web, mais desta volta por unha iniciativa que a honra: patrocinar a III Edición dos Premios Antárticos de Ciencia, Tecnoloxía e Medio Ambiente, que galardoan proxectos e investigacións relacionados cos citados ámbitos de estudo.
Cada ano, os premiados e un pequeno equipo que inclúe xornalistas e persoal especializado, son obsequiados cunha viaxe á Antártica dun mes de duración, unha experiencia única xa que o acceso a esta impresionante reserva natural de extremas condicións climáticas é moi restrinxido.
Nesta edición, os aventureiros disporán dun macuto ecolóxico da liña Chicago Eco de Port Designs, da que temos falado en Código, así como de diversas fundas de neopreno e nylon para protexer os seus portátiles e dispositivos electrónicos do frío e da humidade.
Os Premios Antárticos naceron en 2007 co obxectivo fundamental de conservar o medio ambiente e evitar a “fuga de cerebros” que se está a vivir no sector da investigación no noso país.
Tan só por isto, Port Designs merece unha mención especial na nosa web, polo seu apoio á organización e polo seu labor de conservación do medio ambiente creando a familia ecolóxica Chicago Eco, fabricada a partir de botellas de plástico recicladas.
Nesta edición do concurso, os accesorios da marca permitiranlle aos viaxeiros transportar os seus portátiles, cámaras e outros dispositivos electrónicos con total seguridade e comodidade, o que lle permitirá vivir esta experiencia nas mellores condicións posibles.
O fundador dos premios, Bruno Alonso, asegura estar encantado cos produtos de Port Designs, “non só polo seu trasfondo ecolóxico, senón tamén pola súa resistencia e calidade, características primordiais dadas as condicións extremas que imos vivir durante a viaxe”.