Os premios á innovación e á calidade do noso comercio veñen cunha contía de 12.500 euros

Recoñecer e visualizar as iniciativas do noso tecido comercial e empresarial para acadar mellores negocios e, tamén, máis decididamente dixitais e innovadores. Este é o gran obxectivo dos Premios do Comercio Galega, cuxa nova edición vén de ser convocada pola Consellería de Economía e Emprego, que tamén busca salientar, con estas distincións, as iniciativas máis destacadas en materia de boas prácticas. O prazo de presentación de contribucións ficará aberto ata o 13 de outubro. Haberá unha dotación total de 12.500 euros.
Os galardóns artéllanse en tres categorías: o Premio Comercio de Galicia, dotado cunha contía de 3.000 euros; o Premio Comercio Provincial, cunha contía de 2.000 euros por provincia; e o Premio Iniciativa Dixital para asociacións de comerciantes, cunha contía de 1.500 euros.
Segundo fai saber a Consellería, o galardóns distinguirán os establecementos, a nivel provincial e autonómico, que “na súa xestión comercial executen accións innovadoras que comporten unha clara diferenciación” e, igualmente, a posta en práctica de medidas eficaces no mantemento de clientes (o que se se coñece como fidelización) e na “personalización do servizo e do produto”. Con este fin., teranse en conta os seguintes parámetros, moitos deles estreitamente ligados ao eido TIC: a transformación dixital, os servizos engadidos á propia oferta comercial, as accións promocionais especiais e o emprego de ferramentas como a web e as redes sociais como canles de comunicación e venda e a integración entre as canles online e offline.
No que respecta ao Premio Iniciativa Dixital para asociacións de comerciantes, elixirase entre as asociacións que “poñan en práctica proxectos tecnolóxicos ligados ao comercio que inclúan presenza na Rede, utilización de novas tecnoloxías e que incrementen o mantemento de clientes e os servizos prestados aos clientes”.