Microsoft convoca o concurso de desenvolvemento de aplicacións, Imagine Mobile

Microsoft, a compañía tecnolóxica internacional que estes días está a dar que falar pola súa colaboración con Euskaltel, vén de anunciar a súa intención de convidar aos desenvolvedores a “formar parte da nova experiencia nos teléfonos Windows” a través do concurso Imagine Mobile, aberto para todas as persoas interesadas, con creatividade dabondo para xerar aplicacións orixinais para os devanditos terminais.
O concurso está aberto a todas as persoas creativas e creadoras, dende xente universitaria ata experimentada desenvolvedora que sexa quen de construir novas aplicacións que supoñan unha innovación no mercado e que axuden a mellorar o día a día dos usuarios dos teléfonos Windows, tanto na súa faceta persoal como na profesional.
O xurado estará composto por representantes de Vodafone, Sony Ericsson, Microsoft, a comunidade Mobile Nug, destacados xornalistas e o Centro Microsoft de Innovación en Mobilidade, e poñerá especial atención naquelas aplicacións que innoven en comunicacións, creen novas experiencias de ocio, widgets, etc.
As persoas que resulten gañadoras nesta orixinal competición terán a oportunidade de ser as primeiras en comercializar as súas aplicacións na nova tenda en liña da compañía Windows Marketplace, ademais de acceder a diferentes premios e axudas para o desenvolvemento de aplicacións, tales como contías en metálico, que van dos 3.000 aos 10.000 euros, e distintas ferramentas de desenvolvemento de Microsoft ou videoxogos.
Os concursantes poderán, asemade, comercializar a súas creacións da maneira que o desexen, sen estar comprometidos a facelo a través de Marketplace.
Para David Fernández, Director de Windows Mobile en España, "Windows Mobile non remata no sistema operativo, senón que engloba tamén todo o ecosistema de aplicacións que están en torno a este. Os desenvolvedores son para nós esenciais para seguir enriquecendo a experiencia dos usuarios dos teléfonos Windows con novas e apaixonantes posibilidades".
Todas as persoas interesadas en participar no concurso, poden informarse e inscribirse dende hoxe e ata o 3 de agosto na web oficial do evento e optar a diferentes premios económicos, portais e comunidades para dar a coñecer as súas aplicacións, así como a diversas ferramentas de desenvolvemento para continuar dando forma ás súas ideas, entre outros beneficios.
Esta tenda virtual inaugurarase a finais de setembro, coincidindo co lanzamento do novo sistema operativo Windows Mobile 6.5 e a resolución do concurso.