Google e IAB achegan cursos de balde sobre mercadotecnia dixital na USC

Google e IAB Spain van desenvolver tres cursos de balde de mercadotecnia e metodoloxías de promoción dixital na Facultade de Económicas e Empresariais de Compostela. Estes seminarios, dirixidos a titulados universitarios de calquera carreira, ofrecen a oportunidade de formarse no eido da publicidade e a comunicación dixital a través dun curso dunha semana de duración e que se levará a cabo en horario de 9.00 a 18.30 horas. O contido, informa a USC, abrangue áreas temáticas diferentes que van desde fundamentos da tecnoloxía e mundo dixital, SEO, SEM, comercio electrónico, mercadotecnia en redes sociais e dispositivos móbiles, analítica web ou mesmo a elaboración de plans de negocio.
As persoas interesadas en completar este curso terán asemade tres datas alternativas para poder facelo. De feito, Google e IAB Spain teñen previsto celebrar estas sesións formativas en distintas datas do mes de marzo, abril e maio. A información relativa aos contidos desta actividade, así como os datos referidos aos trámites para formalizar a inscrición están xa accesibles a todas as persoas no enderezo electrónico formacionactivate.es. Unha vez rematado o curso, os/as participantes que superen todos os exames recibirán unha certificación da formación recibida expedida pola Asociación da publicidade, a mercadotecnia a comunicación dixital en España (IAB Spain).