Galiciaempleo.net supera a liña dos 50.000 currículos no seu segundo aniversario

O portal galego de emprego e formación en Internet, Galiciaempleo.net, vén de acadar os 50.000 currículos pendurados, polo que, ó longo de todo o mes, vai conmemoralo levando a cabo distintas actividades para potenciar o emprego entre a mocidade de Galicia. Galiciaempleo.net é o primeiro portal da comunidade que trata de fomentar o achegamento entre empresas da nosa terra e candidatos galegos, co obxectivo de reducir a taxa de paro existente, sobre todo entre a poboación máis nova.
Na actualidade conta con 200 ofertas activas, que están vixentes ata un máximo de 60 días. Asemade, conta cunha base de datos de 1.200 empresas e de 50.000 candidatos a postos de traballo en Galicia.
Tras consolidarse na Rede e facerse cun posto salientable no sector das webs de emprego, o obxectivo máis prioritario deste servizo é agora crear unha rede de portais rexionais a nivel español, xunto con outras páxinas como www.madridempleo.net, www.euskadiempleo.net ou www.andaluciaempleo.net...
Para celebrar o seu éxito logo de dous anos de “vida”, o portal de emprego de Galicia vai convidar @s moz@s galeg@s a cinco festas nas que colaborará na procura activa de emprego por parte dos máis novos. As devanditas festas terán lugar en:
- Ourense (Pub Xtravanzza, o 18 de outubro)
- Vigo (Pub El Ensanche, o 18 de outubro)
- Santiago (Pub Leblón, o 25 de outubro)
- A Coruña (Pub Los Elefantes, o 25 de outubro)
- Lugo (Pub Puro Teatro, o 27 de outubro).
Asemade, con motivo do seu aniversario Galiciaempleo sorteará unha fin de semana para dúas persoas nun balneario e mensaxes a móbiles de balde recomendando a cinco amigos.