Deportistas galegos participan nun vídeo en liña contra a represión do goberno chinés

Segundo vén de publicar Xornalgalicia.com, Amnistía Internacional, logo de pedirlle ás autoridades chinesas que poñan fin de inmediato “ás medidas represivas contra os defensores e defensoras dos dereitos humanos en Pequín e noutras partes de China”, editou un vídeo no que destacados deportistas galegos explican, a modo de denuncia social, a situación actual dos dereitos humanos no país asiático.
O ciclista Óscar Pereiro, o ex ciclista Álvaro Pino e o xogador do Real Club Celta de Vigo, Roberto Lago, son algunhas das facianas que podemos ver dende onte, mércores 2 de abril, no vídeo que elaborou Amnistía de Vigo (dispoñible en galego e castelán) para “favorecer o establecemento dunha sociedade pacífica e comprometida co mantemento da dignidade humana”, e que actualmente se pode ver tanto na web do organismo como no popular sitio de vídeos en Internet, YouTube.

Nas imaxes, os devanditos deportistas len frases alusivas ao Olimpismo como creador dun estilo de vida baseado no respecto polos principios éticos universais, ao obxectivo de crear un mundo mellor e máis pacífico, ao desenvolvemento e respecto dos dereitos humanos... e asemade revelan datos arrepiantes sobre a situación actual dos dereitos dos cidadáns en China. O vídeo remata coa frase: “Cos dereitos humanos non se xoga. E ti, a que xogas?”.
Nós dende aquí apoiamos a iniciativa de AI e denunciamos publicamente o noso descontento con calquera tipo de actuacións que vulneren os dereitos fundamentais dos homes e das mulleres de calquera recuncho do planeta.