Activage culminou tres anos de piloto xerando tecnoloxías eficaces para o envellecemento saudable

Os responsables de Activage, o proxecto de envecellecemento saudable e empoderamento da terceira idade a través das novas tecnoloxías co-impulsado por Televés, o SERGAS e Cruz Vermella, presentaron este outono os froitos acadados pola iniciativa, uns resultados que “non fan máis que demostrar que a tecnoloxía non só pode promover un envellecemento activo, senón que pode facelo de forma rendible e eficaz, ao optimizar e desconxestionar de forma intelixente o uso dos servizos sociais”. O balance, que culmina tres anos de experiencia piloto, confirma o que unha parte do noso tecido investigador e empresarial agoiraba: que estamos ante o maior proxecto europeo sobre IoT (Internet das Cousas polas súas siglas en inglés) para incrementar a calidade de vida das persoas maiores.

Presentación virtual dos resultados do proxecto piloto

O pasado mércores 21 de outubro o proxecto celebrou o evento de clausura. Ao seu abeiro foron presentados os principais resultados obtidos tras tres anos de experiencia piloto-multicéntrica, onde participaron 9 autonomías de 7 países, entre os que se atopa España con Galicia, Madrid e Valencia. Os principais resultados da xornada revelaron que a tecnoloxía e o uso intelixente dos obxectos conectados son “capaces de mellorar a calidade de vida das persoas maiores a través dunha serie de indicadores”.
Dividido en catro bloques, o acto foi guiado pola presentadora Ainhoa Arbizu cos principais representantes do proxecto e a Comisión Europea, e coas declaracións e testemuños de varios usuarios, familiares e coidadores dos países membros ao proxecto.
Cun investimento total de 25 millóns de euros e enmarcado no programa europeo Horizon 2020, a meta final de Activage é “aumentar os anos de vida saudable e autónoma da cidadanía europea, cun impacto positivo na súa calidade de vida, o aforro no sistema de benestar social e a xeración de innovación local”. A iniciativa quere saír ao paso, botando man das máis avanzadas innovacións, dun dos grandes desafíos do mundo desenvolvido e, tamén, dos países da UE: afrontar o relevante medre que vai experimentar nos vindeiros anos a poboación de persoas maiores de 65 anos.
Sobre a base do proxecto púxose de manifesto na súa orixe o seguinte dato a ter e conta: o actual sistema de coidado dos maiores non é nin efectivo nin sustentable. De feito, segundo datos de Eurostat, prevese que a taxa de dependencia por razón de idade aumente do 31,7% ao 51,6% en 2060, “algo que o actual sistema de coidado de maiores non pode asumir”, recordouse no acto celebrado a semana pasada, onde tamén se puxo o foco nas tecnoloxías que abrangue Activage, que aproveita as oportunidades da Internet das Cousas e o desenvolvemento dixital para “crear novas formas de asistencia e seguimento da terceira idade, adaptando a súa contorna actual a unha de maior seguridade”. Deste xeito, explicouse, “búscase minimizar os efectos do investimento da pirámide demográfica á vez que suavizar a carga de gasto social que carrexarán as necesidades en materia de servizos dunha poboación envellecida”.
Os resultados
Activage permitiu incrementar a seguridade das persoas maiores en Europa favorecendo o mantemento da súa independencia e participación social, así como reducindo o impacto negativo e o deterioro que implican as doenzas crónicas. O proxecto contou coa participación de máis de 8.000 usuarios (persoas maiores, familiares, coidadores e profesionais sanitarios) e demostrou, en palabras das entidades implicadas, unha mellora no día a día dos seus usuarios mediante a análise da súa calidade de vida (a través dunha serie de indicadores que medían a súa resposta basal e final), dun importante nivel de aceptación da tecnoloxía e dunha moi positiva relación custo-efectividade.
Segundo declaracións de Manuel Alcina, un dos usuarios de Activage en Valencia: “O feito de que a miña familia saiba como estou e onde estou outórgame tranquilidade e liberdade para poder aproveitar mellor o meu tempo. Sen dúbida, unha das maiores vantaxes do proxecto é que nunca estou só”.
Novas oportunidades e retos na era post-COVID-19
As entidades impulsoras de Activage lembraron que os resultados e conclusións fixéronse aínda máis evidentes durante a crise sanitaria da COVID-19, unha etapa “na que o confinamento en varios países europeos obrigou a millóns de familias a distanciarse de familiares que podían necesitar dun seguimento/visitas regulares”. Durante a pandemia, as tecnoloxías de Activage aseguraron aos seus usuarios asistencia sociosanitaria remota, a adaptación de actividades de aire libre a exercicios no interior, eventos sociais virtuais e contacto constante cos familiares/coidadores. Así, o servizo de monitoraxe da actividade diaria de Activage, por exemplo, permitiu aos coidadores e familiares facer seguimento das actividades, reaccións e estado de saúde destes usuarios en todo momento.
Por outra banda, durante a presentación de resultados do proxecto, anunciouse a creación de Activage.org, unha asociación que continuará co labor xerado promovendo e impulsando a ampliación de servizos e tecnoloxías para o envellecemento activo e saudable en Europa e en todo o mundo. A súa misión é “crear o primeiro mercado dixital europeo de solucións e servizos para a vida independente e o benestar das persoas maiores, aproveitando a constante evolución do ecosistema, servizos e estándares de Activage”.
España como motor de Activage
A nivel global, o consorcio de Activage inclúe a 49 socios de nove países distintos. Industria, organizacións dedicadas á investigación, entidades públicas, universidades e compañías de novas tecnoloxías forman parte deste conglomerado.
En España, varias empresas e organizacións de diferentes partes da península sumáronse ao proxecto. En Galicia: Cruz Vermella Española, o Servizo Galego de Saúde e Televés.