32 concellos galegos xa teñen intención de adherirse á Rede CeMIT
martes, 29 de xuño do 2010
A Rede CeMIT da
Xunta de Galicia, que entre outras cousas integra as aulas públicas de acceso a
Internet existentes na nosa Comunidade para achegar as novas tecnoloxías e
Internet ao maior número de núcleos posibles, vén de recibir a petición de
adhesión dun total de 32 concellos galegos dos 42 que estaban integrados na
antiga Rede de Dinamización da Sociedade da Información.
Este antigo proxecto, que comezou en xaneiro de 2007 en 98
entidades, entre concellos, asociacións e centros comarcais, estaba a día de
hoxe presente en 42 municipios galegos porén a intención do Executivo é conseguir
que a Rede CeMIT se estenda ao maior número de concellos posible dun xeito sostible
e perdurable no tempo, grazas, segundo afirman, “ao aforro en alugueres e evitando duplicidades de centros da Xunta que
ofertan o mesmo servizo”.
Outra novidade que achega a Rede CeMIT respecto da antiga
Rede de Dinamización é, segundo afirman dende a Xunta, “que se promoverá a incorporación dos municipios interesados en dar este
servizo baixo un criterio de
concorrencia competitiva e non atendendo
ao criterio único da Administración autonómica”.
O novo modelo de xestión posibilitará a posta en marcha de
novos centros e a contratación de máis axentes TIC para apoiar difusión das
novas tecnoloxías en todo o territorio galego. Precisamente, estes obxectivos
están recollidos nun convenio asinado o pasado 30 de abril entre a Secretaría
Xeral de Modernización e Innovación Tecnolóxica e a Federación Galega de
Municipios e Provincias (Fegamp).
Como temos
apuntado noutras ocasións en Código Cero, os municipios interesados en
incorporarse á Rede CeMIT deberán dispoñer dun local que cumpra os requisitos
técnicos precisos e a Xunta achegará ao concello unha contía equivalente ao 80
por cento do salario do axente TIC e ocuparase de dotar de equipamento informático
ao centro e do mantemento técnico do mesmo. Ademais, a Administración
autonómica facilitará unha ampla carta de servizos a través do Plan de
Alfabetización Dixiltal, presentado o pasado 5 de abril.
A Secretaría Xeral de Modernización e Innovación Tecnolóxica
xa se puxo en contacto cos concellos pertencentes á antiga Rede de Dinamización
para comunicarlles o remate dese proxecto ao tempo que se lles informa das
vantaxes do novo modelo e do procedemento a seguir para a adhesión á nova Rede.
