WekAb.com, ao detalle o vindeiro 15 de abril no Centro Demostrador TIC

O Centro Demostrador TIC de AMTEGA vai acoller o día 15 de abril unha nova sesión práctica con tecnoloxía innovadora. Trátase dunha cita para profesionais galegos con WekAb, plataforma en liña especializada no ámbito da formación e, segundo os responsables do Centro, de gran potencial para facilitar o contacto entre expertos e formadores con empresas centradas no ensino. A sesión desenvolverase en horario de 10.00 a 12.00 horas. A plataforma WekAb, sinálase, basea unha boa parte do seu empuxe nunha metodoloxía áxil e nun factor prestixio acumulado que achega fiabilidade.
“Os profesionais do ámbito da formación”, engade o Centro Demostrador, “poden darse a coñecer, xerar reputación, formarse e ser accesibles para as empresas do eido docente”. Trátase dun proxecto cualificado como IEBT (Iniciativa de Emprego de Base Tecnolóxica) pola Xunta de Galicia que actualmente participa no programa Galicia Open Future de Telefónica, en colaboración coa Axencia para a Modernización Tecnolóxica de Galicia (AMTEGA), a Axencia Galega de Innovación (GAIN) e o IGAPE.
A sesión demostradora está especialmente deseñada para formadores de formación continua e ocupacional, profesionais sénior por conta propia ou allea que queiran dedicarse á formación como actividade complementaria. Para participar nesta actividade cómpre inscribirse na web do CDTIC.

info portfolio