Telecinco comeza a cobrar polas súas series en liña

Telecinco está a dar un curioso paso na Internet, pois ante o predominio dos contidos de balde, decidiron combinar tal fórmula coa do pagamento, comezando pola popular serie Sin tetas no hay paraíso, de xeito que ofrecen a preestrea de episodios por 1,74 euros (IVE incluído) ou a visualización dos últimos capítulos emitidos por 1,04 euros, o que permite a súa reprodución en alta calidade (aptos para verse a pantalla completa, multiplicando por 5 a calidade con respecto ao resto de vídeos de telecinco.es) e sen anuncios, aínda que esta última opción só afecta aos episodios do luns e o martes, que pasan a ser de balde a partires do mércores. De feito, todos os vídeos serán sempre de balde 2 días despois da súa emisión por televisión, no que supón un modelo de explotación a través da Internet bastante complexo e confuso.
Os pagamentos dos episodios farase a través de mensaxes SMS Premium, e os bonos adquiridos só serán válidos durante 48 horas e dende o ordenador no que se solicitaron. É de agardar que de cara ao último episodio da serie a opción da preestrea poida levar a moita xente a querer coñecer o final antes que os espectadores tradicionais, tras o que poderemos saber se este experimento de Telecinco deu bo resultado ou queda no esquecemento.