Satdata Telecom achega a súa tecnoloxía para prever a contaminación do mar

O pasado martes, 2 de marzo, daba comezo en Vilagarcía de Arousa a Feira Internacional de Acuicultura de Galicia, ACUI, un evento no que se dan cita anualmente as empresas máis importantes do mundo en materia de industria acuícola, un campo no que Galicia é punteira a nivel internacional.
Nesta Feira, que remata hoxe mesmo, a empresa galega Satdata Telecom atopou a oportunidade única de presentar o seu Proxecto ZIGSEA, un sistema de radioboias que avalía a calidade da auga do mar, trasmite os valores a través de tecnoloxía de radiocomunicacións en tempo real a un centro de recollida de datos e constitúe un procedemento de prevención precoz en alertas sanitarias, tales como unha marea vermella ou unha contaminación por residuos, entre outras.
Satdata Telecom achegoulle a este proxecto (desenvolvido en colaboración co ITG, Instituto Tecnolóxico de Galicia, a empresa Marine Instruments e o Grupo de Tecnoloxía Electrónica e Comunicacións da Universidade da Coruña), a tecnoloxía necesaria para a recollida e transmisión de datos en tempo real, que significou a gran vantaxe do sistema.
Esta recollida, segundo informan os seus desenvolvedores, é posible grazas a múltiples sensores instalados na boia, que detectan parámetros tales como temperatura da auga, a salinidade, o PH, as toxinas… así como a unha rede inarámica que transmite os valores recollidos en tempo real, enviándoos primeiro ao banco de boias, onde se aglutinan os datos de todas as boias operativas, e posteriormente ao centro de control.
Ata o momento a recollida de datos facíaa persoal técnico in situ, o que significaba a imposibilidade de dispoñer de resultados nun tempo axeitado, de modo que se podían estar a efectuar capturas por parte dos mariscadores, pescadores ou acuicultores en condicións de alerta sanitaria. A tecnoloxía logrou que a alerta sanitaria poida detectarse no momento exacto de producirse, de modo que as capturas poidan paralizarse inmediatamente.
Os enxeñeiros de Satdata Telecom, deseñaron, ademais, un cadro de mando específico cun interface que permite ao analista interpretalo visualmente.