Os estudantes de Grao de Enxeñería Informática da USC comezan o curso cunha install party

Non todo vai ser formarse sen socializar, ou formarse sen un toque de divertimento e de lecer. Segundo conta Mancomún, os estudantes do Grao de Enxeñería Informática van ser recibidos os días 28 e 29 de setembro cunha actividade que mestura a práctica, a teoría e a creatividade, e todo iso con feitura de encontro social. Máis polo miúdo, o que lles ten preparada a Oficina de Software Libre da USC (coa axuda do grupo de usuarios de código aberto ligado á dita institución educativa, AUSLUSC) é un obradoiro install party, a desenvolver na Escola Técnica Superior de Enxeñería Informática.
O obxectivo do encontro, amais de exercer de benvida e de posta colectiva en materia, é introducir aos novos estudantes na instalación dos sistemas operativos UbuntuUSC e Galinux nos seus respectivos computadores.
A iniciativa, informa a Oficina, completarase co curso Introdución a Linux, no que os participantes terán a oportunidade de iniciarse no labor en escritorio e en terminal nos sistemas operativos antes instalados. Todas as sesións desenvolveranse nas aulas I5 e I6 da ETSE en horario de 9 a 11 horas, agás o día 1 de outubro no que terá lugar entre as 12 e as 14 horas.