Dá comezo a I xornada tecnolóxica de Vindeira (VTT)

A primeira hora desta mañá, o director xeral de I+D+i da Xunta de Galicia, Ricardo Capilla Pueyo, achegouse ata Ferrol para abrir a I Xornada Vindeira Transferencia Tecnolóxica (VTT), e, acompañado do presidente de Vindeira, Antonio Rodríguez del Corral, déronlle a benvida ás persoas asistentes.
A Plataforma Tecnolóxica Galega das TIC, Vindeira, en colaboración coa Fundación para o Fomento da Calidade Industrial e o Desenvolvemento Tecnolóxico de Galicia, celebra este evento para promover a transferencia tecnolóxica na sociedade galega, e poñer en contacto aos axentes de investigación e ás empresas TIC do noso país.
Ao longo da xornada, que se está a desenvolver no salón de actos do CIS Galicia, as tres universidades galegas e os Centros Tecnolóxicos de Galicia, mostrarán as súas capacidades tecnolóxicas, e diversas empresas exporán cadansúas propostas empresariais, promovidas por Vindeira.
Máis polo miúdo, na primeira parte da xornada, tal e como achega o programa, intervirán as tres universidades galegas revelando as súas capacidades tecnolóxicas, e despois dun descanso para café, intervirán os axentes de transferencia: os Centros Tecnolóxicos CESGA, CITIC e GRADIANT.
A xornada da mañá rematará coa intervención do representante do SERGAS, Javier Quiles del Río, que presentará as vantaxes da súa Plataforma de Innovación, e pechará as intervencións de antes do xantar.
Pola tarde, a coordinadora técnica CIS Galicia, Ana Isabel Fernández Fraga, dará a coñecer o Servizo de Transferencia Tecnolóxica de Galactea-Plus para dar paso, a continuación, ás distintas propostas empresariais promovidas por Vindeira, dos eidos do fogar do futuro, a saúde, os servizos en mobilidade e do software.
A xornada concluirá a partir das 17:00 horas coa exposición por parte dos convidados, das conclusións ás que se chegaron.