Código Cero - Diario Tecnolóxico de Galicia

A Xunta vai investir preto de 10 millóns de euros no desenvolvemento do Plan Avanza

Raquel Noya — 2007-10-01T13:54:17Z

No marco do Plano Estratéxico Galego da Sociedade da Información (PEGSI), o documento que guía as políticas de novas tecnoloxías da Xunta de Galicia, o conselleiro de Innovación e Industria da Xunta de Galicia, Fernando Blanco, mailo secretario de Estado de Telecomunicacións e para a Sociedade da Información, Francisco Ros, veñen de asinar unha serie de acordos para o desenvolvemento dos seguintes programas: Cidades Dixitais, Peme Dixital, Cidadanía Dixital e difusión do DNI electrónico, nos que se investirán 9,75 millóns de euros este ano.
A esta cantidade, achegada de xeito conxunto pola Xunta, o Ministerio de Industria e distintas entidades locais, hai que engadirlle o destinado polo Ministerio de Industria á concesión de Préstamos Avanza en Galicia, que suma máis de 55 millóns de euros á cantidade inicial.
Cidades Dixitais
Este programa ten como finalidade a introdución da sociedade da información na vida cotiá dos cidadáns e conta cun financiamento de 2,54 millóns de euros para o período 2007-2008. As actuacións neste senso vanse centrar nos servizos e aplicacións de administración electrónica, servizos dixitais dirixidos a cidadáns e empresas do entorno local, formación e difusión das novas tecnoloxías.
Peme Dixital
O Programa Peme DIXITAL, está orientado a incrementar o grao de adopción das Tecnoloxías da Información e a Comunicación (TIC) nas pequenas e medianas empresas, aumentar a implantación do negocio electrónico e impulsar a implantación da factura electrónica. As actuacións previstas para este ano contarán cun financiamento total de 3,16 millóns de euros.
Cidadanía Dixital
O principal obxectivo deste programa é incrementar o número de usuarios de Internet en Galicia. O financiamento das actuacións de Cidadanía Dixital para o ano 2007 elévase a 2,66 millóns de euros.
Difusión do DNI Electrónico
O programa de difusión do DNI Electrónico busca aumentar o grao de concienciación, formación e sensibilización dos cidadáns, empresas e administracións públicas en materia de identidade dixital, así como estimular a incorporación da seguridade nas organizacións como factor crítico para o aumento da súa competitividade, promovendo para iso a adopción das mellores prácticas.
Este programa conta cun financiamento de 740.000 euros na nosa comunidade.
Préstamos Avanza
Este programa ten o obxectivo de impulsar a incorporación das tecnoloxías da información e das comunicacións á sociedade. Son préstamos de ámbito estatal e non están divididos por autonomías pero pese a iso, estímase que “o Ministerio de Industria achegue máis de 55,37 millóns de euros en Galicia neste concepto”.

Grande éxito da versión rosa do Microsoft Zune

Marcus Fernández — 2007-05-24T16:06:28Z

En 2006 xurdiu unha auténtica febre no sector tecnolóxico que levaba ós fabricantes a sacar versións en cor rosa dos seus dispositivos, no que aseguraban que era un xeito de achegar ó público feminino ós produtos coidando a súa estética, o que parecía sorprendente polo seu minimalismo, pero agora Microsoft confirma esta aposta ó anunciar que a versión rosa pálido do seu reprodutor Zune (que saíu nos EE.UU. a comezos de mes) está superando en vendas ás versións branca e marrón.
Hai que indicar que no mercado dos reprodutores baseados en disco duro Microsoft xa está nunha segunda posición en vendas, superándoo só Apple co iPod, polo que supera as expectativas que había sobre o produto, dado que Microsoft non tiña experiencia neste sector, que viña estando dominado por outros fabricantes. Parece así que a campaña de comercialización inicial do Zune é todo un éxito e a aposta pola variedade cromática (que continuará mellorando, estreando un modelo vermello no verán, xunto cunha edición especial inspirada no videoxogo Halo 3) todo un acerto.

Comeza a Semana do Audiovisual Galego e o seu itinerario de proxeccións pola nosa terra

Raquel Noya — 2007-04-30T13:24:00Z

Dende hoxe, día 30 de abril e até o vindeiro 5 de maio, a Academia Galega do Audiovisual celebra a Semana do Audiovisual Galego e, como en toda celebración que se prece, nesta non faltarán nin a fartura nin a troula, mais, iso si, de cinema (que é ben saudable). Polo tanto, a institución vainos agasallar cunha “degustación” de proxeccións audiovisuais nas principais cidades e vilas galegas, un soño feito realidade para os seareiros do cine feito na casa. De feito, a meirande parte das produccións que se emitirán, optan ós galardóns dos Premios Mestre Mateo 06 nas distintas categorías.
Tralo acto inaugural celebrado esta mesma mañá no IES Marco do Camballón en Vila de Cruces, ó que asistiron Manuel Sanmartín en representación da serie de televisión Libro de Familia, e Agustín Díaz por 25 anos de Autonomía, terán lugar (ó longo de toda a semana) as distintas proxeccións nas sés da Fundación Caixa Galicia de toda a Comunidade e nos Institutos de Ensinanza Secundaria dalgunhas vilas.
A Academia Galega do Audiovisual dedica toda esta semana a promover os Premios Mestre Mateo 06 exhibindo 24 producións e varias montaxes de programas de TV. Longametraxes, curtas de ficción e animación, series e programas de TV, documentais e producións de publicidade, percorrerán simultaneamente as cidades de A Coruña, Lugo, Ourense, Pontevedra, Santiago de Compostela e Vigo, e as vilas pontevedresas de A Guarda, Lalín, O Grove, Tui, Vila de Cruces, Vilanova de Arousa e Vilaxoán de Arousa; as ourensáns de Allariz, A Rúa, o Barco de Valedoras e Xinzo de Limia; as coruñesas de As Pontes de García Rodríguez e Culleredo; e as luguesas de Burela, Ribadeo, A Pontenova e Monforte de Lemos.
Con este circuíto -coordinado pola distribuidora Mr. Misto Films e patrocinado pola Consellería de Cultura e Deporte, a Dirección Xeral de Comunicación Audiovisual (da Secretaría Xeral de Comunicación) e a Fundación Caixa Galicia-, a AGA proxectará parte das producións audiovisuais que optan ós Premios Mestre Mateo deste ano. Calcúlase que máis de 5.000 persoas terán acceso durante máis de 100 horas de proxección audiovisual a coñecer parte daqueles traballos finalistas para os Premios, que se entregarán na Gala que terá lugar no Colón Caixa Galicia da Coruña o 9 de maio.
As proxeccións:

En Vigo proxectarase o documental O Barco da Memoria e a curtametraxe de animación A Promesa.
En Pontevedra poderemos ver Omar Martínez e a produción publicitaria Cabreiroá.
En Santiago de Compostela proxectaranse De Profundis e A Bruxa Catuxa e contarase coa presenxa de Paco Lodeiro.
En Lugo poderemos disfrutar do documental A dedo. Historias de autostopistas.
Na Coruña pasarase o documental Linatakalam e a crutametraxe de ficción Bos Días.
En Ourense poderemos deleitarnos con 2050, e Bos Días.
Entre as proxeccións que se levarán a cabo nos centros de educación secundaria, en Lalín terá lugar a emisión de De Bares e O ladrón de Bonecas, no Grove Linatakalam e Bos Días, en Vilanova de Arousa, Cicatrices e no Grove, proxectaranse unha serie de curtas de animación que animarán a festividade do día primeiro de maio.

Proposta de encontro de lectores galegos arredor de Twitter

Fernando Sarasketa — 2007-04-26T16:17:00Z

Falamos hai días nesta mesma web do fenómeno Twitter, unha especie de volta de torca máis nas posibilidades da comunicación total que achega a Web 2.0 e que nos permite dicir a todo o mundo e de xeito inmediato que é o que estamos a facer en cada intre da nosa vida (sempre que teñamos algo que contar, claro), e todo iso a través do emprego do móbil e dun espazo propio en liña habilitado no Twitter. A ferramenta, fóra dos seus aspectos negativos (que os ten, como por exemplo o feito de que contribúa en certos casos a incrementar a dependencia tecnolóxica), semella achegar amplas posibilidades na divulgación de cuestión vinculadas á cultura e ó lecer. Asemade, pode ser proveitosa afianzando ligazóns entre colectivos ou grupos de internautas con semellantes arelas e/ou afeccións. Esa é a idea principal desta interesante proposta que atopamos no blog de Martin Pawley (vía Chuza!) e que vai dirixida a todos aqueles internautas que len literatura na nosa lingua.
Deste xeito, o Twitter, ademais de ser unha ligazón máis para os lectores (a unir ás que xa existen), tamén fomentaría o debate, a achega de opinións, a presentación de críticas e, en última instancia, contribuiría a dinamizar a mesma práctica da lectura na nosa terra.
A proposta xurdiu con motivo do Día do Libro e probablemente reciba nos vindeiros días un importante pulo por parte dos internautas galegos, sobre todo tendo en conta que xa está preto o Día das Letras Galegas.

Aberto dende hoxe o prazo de inscrición para Curtocircuito 07

Raquel Noya — 2007-04-02T19:53:12Z

O Festival Internacional de Curtametraxes de Santiago de Compostela Curtocircuito, está a piques de comezar a súa andaina (na sección oficial) por cuarto ano consecutivo. Dende hoxe e até o vindeiro 30 de Xuño, a sección oficial Compostela Curtocircuito, estará aberta a curtametraxistas de todo o mundo que desexen participar enviando as súas curtas (de non máis de 25 minutos) ou micromovies (de ata 30 segundos) que poden ser realizadas con calquera ferramenta ou tecnoloxía audiovisual. Nesta edición, o concurso presenta grandes novidades como o Premio á mellor Curtametraxe Galega e a inscrición en liña a través da páxina Short Film Depot, aínda que sen dúbida a gran novidade por excelencia que presenta este ano Curtocircuíto 07, é o incremento da contía dos premios (para satisfacción dos participantes), que quedarán da seguinte maneira:
- A Mellor Curtametraxe de Ficción e a Mellor Curtametraxe de Animación recibirán 3.600 €.
- A Mellor Curtametraxe Documental e Mellor Curtametraxe de Videocreación recibirán 3.000 €.
- A Mellor Curtametraxe Galega recibirá un premio de 1.500 €.
- O Premio Anacos á Mellor Micromovie, galardoarase con 2.000 €.
Coma tódolos anos, de entre os traballos recibidos, un Comité de Selección escollerá algúns para proxectalos nas rúas e prazas da zona monumental compostelá ó longo dos meses de xullo e agosto, dentro da sección Curtocircuíto na Rúa; os asistentes a estas proxeccións poderán votar a súa curta favorita e outorgar o Premio do Público, dotado con 1.500 € máis un trofeo (mailo mérito de ser o que máis gusta na Capital).
Tódalas curtas enviadas a concurso, participarán automaticamente no II Mercado Internacional de Curtametraxes, outra das seccións de Curtocircuíto que terá lugar do 18 ó 20 de Outubro e no que teñen cabida todas aquelas obras que excedan a duración permitida ou que non chegaron a tempo para a sección oficial. O prazo de inscrición deste Mercado remata o vindeiro 12 de setembro de 2007 e nel poden participar películas de ata 59 minutos de duración.

A UNESCO crea un portal de compartición de recursos educativos

Raquel Noya — 2007-03-19T13:24:55Z

A Organización de Nacións Unidas para a Educación, a Ciencia e a Cultura (UNESCO) vén de crear en Internet unha plataforma aberta que achega recursos de formación a educadores e alumnos e que ofrece un espazo no que estes poidan compartir contidos.
Entre os temas dos programas e recursos cos que conta a devandita plataforma, figuran, entre outros, a alfabetización, a informática, as actividades empresariais, o medio ambiente ou o desenvolvemento comunitario. A meirande parte destes programas son de licenza aberta, o que permite o libre acceso ós mesmos cando se empregan para actividades sen fins lucrativos como a ensinanza, o aprendizaxe e a investigación.
A plataforma foi concibida para dar conta de todo o material elaborado polos copartícipes no proxecto, como organismos das Nacións Unidas, gobernos e organizacións non gobernamentais coa finalidade de facerlle chegar o coñecemento ós grupos de poboación máis desfavorecidos.
Por ende, os recursos dispoñibles na web están destinados a satisfacer as necesidades específicas dos responsables da elaboración de políticas, dos especialistas en desenvolvemento e dos de educación.

Apple e Apple Corps (o selo de The Beatles) soterran as armas

Fernando Sarasketa — 2007-02-06T21:11:12Z

“Algo non acaba de encaixar con isto da mazá”. Probablemente non sexamos precisamente catro gatos os que chegamos á devandita reflexión (ou semellante), logo de descubrir que un mesmo nome, “Apple”, servía para designar dúas cousas ben distintas, practicamente opostas (ou se cadra non tanto): por unha banda os vellos vinilos, os CDs e todo o merchandising de The Beatles e, pola outra, os produtos Mac. Ó principio, até houbo quen pensaba que se trataba dunha mesma cousa, e que o dos computadores e demais tecnoloxía constituía unha estratexia de diversificación de mercado dos guedelludos de Liverpool. Pero non: non era mesma cousa nin servían para o mesmo. Unha vez sabido isto, a pregunta que case todos nos fixemos foi: como é que se eu quero montar unha cadea de hoteis que se chamen “Hilton” véxome ó momento coa xustiza chamando á miña porta e, porén, a casa de Steve Jobs pode usar a sagrada etiqueta de The Beatles cando lle pete?
O caso é que si que houbo liorta legal, e foi un enfrontamento en capítulos, que recibiu azos hai uns poucos anos cando a discográfica acusou á compañía informática de meterse no que consideraba un terreo que, por tradición, non lle pertencía: o negocio da música, concretamente a través de iTunes. Porén, este tirapuxa semella que vén de chegar ó seu fin, logo de que (polo menos sobre o papel) ámbalas empresas chegasen a un acordo.
A través deste “tratado de paz”, Apple será a propietaria de tódalas marcas rexistradas vinculadas á mazá e venderá baixo licenza certas marcas a Apple Corps (propiedade de Paul McCartney, Ringo Starr, a viúva de John Lennon -Yoko Ono- e os herdeiros de George Harrison) para o seu uso permanente. O acordo tamén pode traer consigo boas novas para os usuarios de iTunes, xa que até o de agora e por mor das malas relacións entre as dúas empresas, non estaban accesibles as cancións do grupo no dito servizo de descarga. A casa Apple Corps, logo da sinatura do acordo, anunciou que os temas venderanse na Rede nun futuro próximo.

Chega o día do apagón proposto por Alianza polo Planeta.

Raquel Noya — 2007-01-31T21:23:30Z

O grupo ecoloxista francés Alianza polo Planeta, a fin de chamar a atención do problema do estrago enerxético global, promoveu a nivel mundial e a través da Rede a desconexión de todo o sistema eléctrico (durante cinco minutos). O apagón, que terá lugar este xoves, 1 de febreiro entre as oito menos cinco e as oito da tarde, hora francesa, deixará a unha gran parte do mundo sen poder facer uso dos aparellos eléctricos pero coa satisfación de ter participado no aforro de enerxía do planeta e paliar así (ainda que de xeito simbólico) os danos medioambientais causados ata o de agora.
Alianza polo Planeta é un organismo formado por diferentes ONGs, asociacións medioambientais, xurídicas, sociais e humanitarias entre outras, que escolleu esta data por coincidir co día no que un grupo de expertos intergobernamentais vai presentar en París un novo informe das Nacións Unidas sobre a evolución do clima. Segundo informa o manifesto do grupo ecoloxista, “a situación do medio ambiente a nivel mundial é desastrosa, e o dano que se lle está a facer ó planeta reflíctese nos máis desfavorecidos. Por iso é urxente tomar medidas lucidas e valentes para asegurar o futuro das vindeiras xeracións, a terra e tódalas especies que viven nela”.

O Goberno di que 1.638 poboacións rurais galegas xa teñen acceso a banda ampla dende o inicio do seu Programa de Extensión

Fernando Sarasketa — 2007-01-24T22:05:21Z

O Goberno español vén de facer reconto en Santiago de todo o acadado en materia de asegurar nas poboacións rurais un dereito fundamental dos cidadáns: o de ter as ferramentas precisas (ben engraxadas e eficaces) para acceder á Sociedade da Información. Como era de agardar, a mensaxe ten un aquel de visión positiva das cousas, polo que aconsellamos que a información se vexa a certa distancia ou de esguello: a banda ampla, di o Ministerio de Industria, xa chega a máis de 5.200 poboacións rurais en España, das que 1.638 pertencen a Galiza. Asemade, teñen acceso a ela 5,4 millóns de cidadáns de todo o estado español grazas ó Programa de Extensión do dito departamento.
As cifras, que se refiren á aplicación do plano dende o seu arrinque até o pasado 19 de xaneiro, complétanse coa seguinte porcentaxe: máis do 37% das pobación onde se habilitou banda ampla acceden por vez primeira ós servizos de Internet de alta velocidade, “mentres que para o resto estamos a falar de ampliacións de cobertura”. Cómpre sinalar que o pograma do Ministerio de Industria está a beneficiar ás seguintes Comunidades: Galiza, Andalucía, Asturias, Aragón, Baleares, Canarias, Cantabria, Comunidade Valenciá, Castela-A Mancha, Castela e León e Murcia. Neste intre, o plan do Ministerio xa cubriu (sinala o Goberno) o 36,33% dos seus obxectivos (en termos territoriais). Precisamente, estes datos foron presentados durante o transcurso da xuntanza do Comité de Seguimento do Programa celebrado este mércores 24 en Compostela. O Ministerio aproveitou a ocasión (a circunstancia xeográfica) para achegar datos sobre a nosa terra: “En Galicia, o número de pobacións ás que xa chegou a banda ancha dende os comezos do programa até o 19 de xaneiro ascende a 1.638, o que supón que xa se cubriu o 34,84% do total. Deste xeito, xa contan con banda ampla 1.014.697 cidadáns galegos, o 83,48% dos beneficiados polo programa”.