Código Cero - Diario Tecnolóxico de Galicia

Compostela inaugura o ciclo de conferencias sobre Intelixencia Artificial da RAGC e a Deputación da Coruña

Fernando Sarasketa — 2023-10-20T11:30:00Z


Alberto Bugarín

Como xa adiantamos dende Código Cero, a vindeira semana, do 23 ao 26 de outubro (de 17 a 20:30h) a Real Academia Galega de Ciencias (RAGC), en colaboración coa Deputación da Coruña, celebrará un ciclo de conferencias (Ciclo Avances) baixo o título Intelixencia Artificial (IA). A electricidade do século XXI?, tamén se poderán seguir vía streaming previa inscrición.
A primeira destas charlas será este luns 23 en Santiago, na sede da Confederación de Empresarios de Galicia. Centrarase na evolución da IA do laboratorio á sociedade. Presentarana o presidente da Deputación da Coruña, Valentín González; a vicepresidenta da RAGC, Alicia Estévez; e o coordinador do ciclo, o catedrático de Ciencias da Computación e Intelixencia Artificial Senén Barro, académico da RAGC e director do Centro Singular de Investigación en Tecnoloxías Intelixentes da Universidade de Santiago (CiTIUS).


Isabelle Hupont

A xornada comezará coa intervención de Alberto Bugarín, catedrático da Ciencias da Computación e Intelixencia Artificial da USC e investigador do CiTIUS. Abordará a Intelixencia Artificial desde as súas orixes ata o futuro inmediato. Fará un percorrido por algúns dos fitos máis relevantes das case sete décadas de historia da IA e as investigacións, avances tecnolóxicos e aplicacións que están a transformar a nosa relación coa tecnoloxía e o mundo que nos rodea. Asemade, Bugarín tratará os desenvolvementos máis recentes en áreas como o tratamento da linguaxe natural, a visión por computador ou a condución autónoma. Reflexionará sobre os retos actuais que todas estas perspectivas presentan a nivel tecnolóxico, ético, legal, socioeconómico, cultural ou mesmo de xénero. E especulará sobre o que nos pode traer a Intelixencia Artificial no futuro máis inmediato.


Alejandro Ramos

Logo será a quenda de Isabelle Hupont, científica do Centro Común de Investigación da Comisión Europea, onde explora o aspecto regulatorio da tecnoloxía, contribuíndo a establecer o camiño cara a unha IA e uns mundos dixitais fiábeis e éticos na Unión Europea. Afondará no impacto da Intelixencia Artificial na sociedade desde a perspectiva europea, tratando en particular as súas aplicacións no sector público. Hupont presentará a investigación que se está a levar a cabo no Centro Común de Investigación da Comisión Europea en Sevilla, onde están a estudar o impacto da dixitalización e da IA na sociedade. En relación á Lei de Intelixencia Artificial europea, a AI Act, analizará os seus ámbitos de aplicación, o seu enfoque centrado no risco para as persoas, e os cambios técnicos, organizativos e sociais transformadores que traerá consigo.
Alejandro Ramos é co-fundador e director científico de InVerbis Analytics, unha spin-off da Universidade de Santiago que emprega a IA para desenvolver tecnoloxía que mellore os procesos empresariais. Explicará como a Intelixencia Artificial pasa da investigación ao mercado, que tarefas e desenvolvementos deben levarse a cabo para converter unha investigación académica prometedora nun produto comercialmente viábel.
A xeito de peche, os asistentes poderán manter un debate cos expertos participantes no encontro. Pódese participar de balde en todas as conferencias deste ciclo, de xeito presencial ou en liña, previa inscrición na ligazón expecífica habilitada.

O 90% das unidades inmobiliarias de Lugo están conectadas á fibra óptica de Movistar

Fernando Sarasketa — 2022-08-10T09:14:47Z

Telefónica vén de facer balance da súa presenza en Lugo en materia de fibra óptica FTTH (siglas de fibra até o fogar). Segundo fai saber a operadora, o 90% das unidades inmobiliarias do municipio de Lugo (vivendas unifamiliares, locais, oficinas, edificios de vivendas, etc) están xa conectadas á dita tecnoloxía de Movistar.
Este fito, engade a compañía, logrouse grazas “a un intenso traballo” por parte dos equipos de despregamento de rede de Movistar e aos plans de extensión desta infraestrutura, como o Plan de Extensión da Banda Larga de Nova Xeración (PEBANG) e o Programa de Universalización de Infraestruturas Dixitais para a Cohesión (Único-Banda Larga)), impulsados ambos polo Ministerio de Asuntos Económicos e Transformación Dixital.
A despregadura da rede de fibra, centrada agora nas áreas máis rurais e orográficamente máis complexas, continuará polo menos até decembro do 2023, cando a operadora ten previsto alcanzar case o 92,4 por cento das unidades inmobiliarias de Lugo. As máis apartadas, ás que sexa imposíbel conectar por FTTH, poderán dispor de banda larga vía radio ou satélite.
Os fogares conectados por FTTH poden gozar xa da fibra óptica de Movistar, que ofrece voz con alta calidade nas chamadas e máxima velocidade de conexión a Internet en varios dispositivos (computador, tableta, móbil) de forma simultánea e sen reducir a velocidade de conexión, entre outras vantaxes. Ademais, a operadora destaca que “se o usuario dispón de MovistarPlus+ terá acceso a canles de alta definición e poderá gozar dos seus contidos mentres navega por Internet, ademais de conseguir a máxima velocidade e resposta nos xogos en rede”.

Zendal e Semola entran como accionistas en ChemoSapiens, o Amazon da química con orixe galega

Fernando Sarasketa — 2022-06-06T15:30:00Z


Haxel Ozores, director executivo (CEO) de ChemoSapiens

ChemoSapiens, o marketplace de reactivos químicos para a investigación fundado en 2019 con capital 100% galego, comunicou a formalización dun acordo de investimento co grupo empresarial Zendal (con sede no Porriño e referente mundial no desenvolvemento de produtos biolóxicos e vacinas), e con Semola Tech Ventures (sociedade de investimento impulsado polos fundadores de Mestrelab Research).
Ambas as compañías entran como socios estratéxicos en ChemoSapiens, que en só tres anos logrou desenvolver unha plataforma online baseada nunha solución tecnolóxica propia que permite, en palabras dos seus creadores, “reducir de forma substancial os tempos e custos nos procesos de compra de reactivos químicos de empresas e centros de investigación do sector público”.
A compañía opera desde entón en 4 países, contando entre os seus clientes con máis de 80 empresas e institucións de relevancia e un ritmo de crecemento que supera o 20% mensual.
Segundo informan dende o marketplace galego, o investimento dos dous novos socios permitirá que a compañía “afronte con garantías a súa expansión internacional ao mesmo tempo que se incorporen novas categorías de produto complementarias que maximicen a evolución do negocio”. En palabras de Haxel Ozores, director executivo de ChemoSapiens, “poderemos ofrecer un servizo máis completo, global e eficiente aos nosos clientes, e ter acceso a novos nichos de interese”. Ozores tamén salienta “a experiencia destes novos investidores no sector biotecnolóxico, un factor clave para o noso posicionamento no mercado europeo que nos vai permitir acceder a sinerxías estratéxicas que acelerarán o noso o noso proceso de medre”.
ChemoSapiens, a través da súa plataforma online de reactivos químicos consegue comparar, filtrar e adquirir produtos de diversos provedores internacionais, contribuíndo a optimizar os recursos humanos e económicos dedicados a I+D nas empresas e centros públicos do sector químico, farmacéutico e biotecnolóxico. “A nosa solución tecnolóxica permite que os nosos clientes reduzan o tempo investido no proceso de compra nun 80%, aforrando até nun 35% dos custos, sen reducir a calidade nin dilatar os prazos de entrega”, sinala Haxel Ozores, quen explica que a compañía naceu con ese obxectivo duplo: “Acurtar os tempos da investigación e reducir os seus custos”.

En marcha dende Lugo un equipo da Garda Civil especializado na loita contra ciberdelincuencia

Fernando Sarasketa — 2022-01-04T11:17:42Z

A subdelegada do Goberno, Isabel Rodríguez, anunciou este 3 de decembro a entrada en servizo dun equipo especializado para loitar dende Lugo contra a ciberdelincuencia. Trátase do Equipo @, un grupo da Garda Civil que adica recursos a rastrexar delitos tecnolóxicos e conseguir un ámbito dixital o máis seguro e protexido posíbel. Os obxectivos do grupo déronse a coñecer polo miúdo durante o transcurso dunha visita a Lugo na que Isabel Rodríguez estivo acompañada polo comandante xefe da Comandancia da Garda Civil, Carlos Bacelo.
A subdelegada explicou que a creación do Equipo @ supón un “reforzo na persecución dos ciberdelitos na provincia e advertiu aos cidadáns, especialmente nestas datas de Nadal nas que aumentan de xeito considerábel as compras, da necesidade de utilizar só canles seguras e protexer sempre tanto a información bancaria como os contrasinais e outros datos persoais”.
A subdelegada indicou tamén que “a entrada en servizo do grupo é un importante paso que dá o Ministerio do Interior na loita pola seguridade no ciberespazo, xa que a ciberdelincuencia vai en aumento ao mesmo tempo que o fai o uso das novas tecnoloxías, a través das cales temos facilidades para facer todo tipo de compras, trámites, operacións bancarias ou solicitude de citas médicas”.
Rodríguez indicou que nos dez primeiros meses do ano, de xaneiro a outubro, a cibercriminalidade aumentou na provincia no ámbito da Garda Civil un 43,30%, xa que se rexistraron 509 delitos deste tipo mentres que no mesmo período do ano 2020 foran 379 e advertiu de que máis da metade, o 59,6% foron estafas con cartón de crédito.
O Equipo @ da Garda Civil de Lugo conta na actualidade con tres efectivos, que ampliará nun axente máis en breve. Os seus membros están especializados na loita contra a ciberdelincuencia, en particular nas estafas a través da Rede, que constitúen “un dos principais problemas neste tempo”, indicou a subdelegada, engadindo que estes equipos “foron creados para dar apoio aos postos da Garda Civil, proporcionándolles unha resposta especializada a este tipo de delitos”.
A Unidade ten a súa sede na Comandancia da Garda Civil de Lugo e leva traballando desde hai varias semanas en distintas operacións nas que foron vítimas cidadáns de distintos puntos da provincia.

O Goberno galego activa axudas para emprender en TIC dende o rural

Fernando Sarasketa — 2022-01-03T12:30:00Z

O Goberno activou unha nova edición do programa Galicia Emprende Rural, que achegará axudas por valor de 2 millóns de euros ao redor de 70 proxectos de autónomos e emprendedores, posibilitando a creación de preto de 200 empregos no medio rural. Estes apoios poñen en impulsar iniciativas non agrícolas, como por exemplo centradas nas TIC (Tecnoloxías da Información e a Comunicación).
Con esta nova edición, cuxo prazo de presentación de solicitudes ficará aberto dende este 4 de xaneiro até o 8 de marzo, a Administración galega quere “reforzar a súa aposta polo emprendemento”, e máis en concreto por unha liña desenvolvida polo IGAPE e co-financiada polo FEADER que se dirixe a “estimular o tecido empresarial galego, fomentando o emprego mediante o apoio á creación de proxectos vencellados a actividades non agrícolas en zonas rurais”.
Entre as actuacións industriais prioritarias que o Galicia Emprende Rural busca impulsar figuran as de sectores como automoción, téxtil, aeronáutico, químico, medioambiental, TIC, audiovisual, pedra natural e industrias creativas, entre outras.
O importe das axudas mínimas concedidas por beneficiario é de 20.000 euros e o das máximas é de 45.000. Os investidores que se acollan a esta liña de apoios desenvolverán os seus plans empresariais de negocio en 18 meses e recibirán un adianto do 60% da axuda concedida, logo da notificación da resolución e a acreditación de dito plan.
Ao abeiro das tres anteriores edicións, este programa impulsou 180 proxectos empresariais de emprendedores e autónomos, coa concesión de axudas por importe de 11 millóns de euros vinculadas ao compromiso de creación e mantemento de 453 postos de traballo por parte das iniciativas apoiadas.

Mar Pereira presenta no DES2021 os investimentos da Estratexia Galicia Dixital 2030

Fernando Sarasketa — 2021-05-18T18:28:03Z

Mar Pereira participou este 18 de maio na mesa redonda A xestión óptima dos fondos; perspectiva rexional do Digital Enterprise Show DES2021, que se celebra no IFEMA de Madrid, unha das principais citas internacionais para a análise e intercambio de experiencias sobre transformación dixital dende o punto de vista das empresas. A directora da Axencia para a Modernización Tecnolóxica de Galicia (AMTEGA) fixo saber, entre outras cousas, que a Estratexia Galicia Dixital 2030 implicará uns investimentos públicos de 2.450 millóns de euros, e mobilizará outros 1.600 millóns de euros de procedencia privada.
“Estes máis de 4.000 millóns de euros”, dixo, “suporán o maior investimento en transformación dixital da historia desta Comunidade Autónoma”.
Xunto coa directora da AMTEGA participaron na mesa de debate a conselleira delegada da Axencia para a Administración Dixital da Comunidade de Madrid, Elena Liria Fernández; e o director xeral de Telecomunicacións e Dixitalización do Goberno de Navarra, Guzmán Garmendia Pérez. A mesa estivo moderada polo director de ventas ao sector público de T-Systems, Marius González.
Pereira salientou que a Estratexia Galicia Dixital 2030 establece un marco xeral que permitirá optimizar os diferentes mecanismos de financiamento europeo, así como ferramentas de cooperación, tanto co Goberno de España como coas entidades locais. A planificación galega, engadiu, “está aliñada co marco dixital europeo reflectido nas prioridades dixitais 19-24 e no Digital Compass 2030, así como coa Estratexia España Dixital 2025”.
Segundo fixo saber, Galicia Dixital 2030 concentra as actuacións en 7 eixos estratéxicos: Goberno e administración intelixentes; sociedade dixital e inclusiva; entorno dixital para a saúde e o benestar social; territorio verde, intelixente e resiliente; conectividade dixital no territorio; cultura e turismo intelixentes e economía dixital e sustentábel.
Amais, a axenda desenvolve un eixo transversal, que impulsará a especialización tecnolóxica e centrarase en reforzar as capacidades e infraestruturas dixitais en tecnoloxías disruptivas, con especial foco na Intelixencia Artificial, a ciberseguridade e a conectividade de altas prestacións.
Pereira engadiu que para o logro dos obxectivos, “Galicia empregará e optimizará fondos propios e procedentes dos diferentes instrumentos de financiación da UE”. E explicou: “No caso concreto dos fondos do Plan de Recuperación, Transformación e Resiliencia, a axencia desenvolveu e presentou nos últimos meses iniciativas para aproveitar ao máximo esta financiamento para a transición dixital”.
Neste sentido, a Xunta presentou proxectos ás manifestacións de interese para os fondos comunitarios relacionadas co despregue de banda larga no rural, a dixitalización das pemes, a adopción da Intelixencia Artificial, o reforzo da ciberseguridade ou a xestión intelixente do territorio.

Os recursos para crear as aplicacións máis limpas e evolucionábeis, ao detalle nun novo curso de Vitae

Fernando Sarasketa — 2021-03-24T15:00:00Z

En cuestión de creación de ferramentas e servizos tecnolóxico-informáticos, hai varios factores que cómpre ter en conta para realizarmos un bo traballo, factores que van máis alá dos elementos de base. Falamos do ingrediente da sinxeleza, que sempre debe ir unido aos da transparencia e a claridade. Dito doutro xeito: canto menos incertezas e marxe de dúbidas haxa nun proxecto, mellor que mellor. Mergullarnos neste xeito tan aconsellábel de traballar é o gran obxectivo da 12ª edición do Curso Clean Code: Crear e refacer aplicacións limpas. Vén da man de Vitae Consultores, referente galego e estatal en formación avanzada para profesionais TIC.
Segundo recalcan fontes de Vitae, a claridade non é só boa en si mesma como un método para asegurar que a información non se desvirtúa, nin tampouco a comunicación, senón que tamén achega grandes beneficios para que un servizo ou ferramenta poida evolucionar no tempo e ser optimizada e adaptada por outras persoas.
O novo curso celébrase na Aula Virtual de Vitae os días 26, 27, 28 e 29 de abril.
O punto de partida desta actividade formativa de Vitae está nunha necesidade concreta por parte das empresas e profesionais: a demanda de técnicas áxiles e eficaces de desenvolvemento, recursos que axuden a escribir programas para seren comprendidos, facer simple o complexo.
En termos xerais, serviranos para ampliar ao máximo o noso coñecemento sobre técnicas de código limpo, recursos que, segundo informa Vitae, “axudan a escribir programas sinxelos de entender, que achegan valor e que, ademais, poden evolucionar”.
A consultora, a propósito dos porqués deste curso, lembra que “programar é expresar procesos con detalle nunha linguaxe non ambigua, feita, coma calquera linguaxe, para comunicar verbalmente ou textualmente”. Vitae engade que “ao escribir cómpre pensar no lector, sobre todo porque, en moitas ocasións, os lectores imos ser nós mesmos”. Os obxectivos do obradoiro son, polo tanto, desenvolver aplicacións difíciles de manter, reducir a cantidade de erros e facilitar o seu achado e distinguir as boas e malas prácticas de programación.
O curso está dirixido sobre todo a programadores con experiencia nalgunha linguaxe orientada a obxectos. O requirimento principal é sermos usuarios de editores de código, recomendándose o VSCode.
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores. Entre as empresas e organismos que ten asesorado ou formado atópanse Tecnocom, Abanca, Softek, GADISA, Inditex, Optare, Altia, Gradiant ou SIVSA.

NETA V3A, o primeiro asistente virtual galegofalante ao servizo das persoas maiores, é xa unha realidade

Fernando Sarasketa — 2021-03-12T16:30:00Z

Este 12 de marzo presentáronse por vía telemática os froitos principais do proxecto de innovación NETA V3A impulsado pola empresa galega Balidea (xunto con Atendo, FrutoDS, Ledisson AIT e Gradiant), que propón, a través desta iniciativa, unha nova e revolucionaria faciana da robótica como recurso para incrementar a nosa calidade de vida, poñendo o foco no colectivo de persoas maiores. NETA V3A, en concreto, é un proxecto de sistemas intelixentes amigábeis que inclúe o desenvolvemento dun prototipo de robot asistente e máis un bot conservador que fala galego e castelán e que acompaña ás persoas maiores no seu día a día.
Ademais, Balidea informou de que xa están integrados todos os módulos que conforman a plataforma de software do sistema e desenvolveu, tamén, un planificador que permite a cada usuario personalizar as interaccións co bot/robot, seguindo recomendacións da Atención Centrada na Persoa (ACP).
Finalmente, probouse tanto o prototipo do robot como o funcionamento da aplicación para dispositivos móbiles nun proxecto piloto con persoas usuarias reais. O piloto foi realizado en Vigo entre novembro e decembro de 2020, en plena crise pola pandemia da COVID-19, polo que o recrutado de persoas voluntarias e a xestión supuxo “un reto para todo o consorcio de empresas do proxecto”, explicou Balidea, engadindo que “a pesar destes atrancos, 34 persoas voluntarias con idades comprendidas entre os 56 e os 82 anos participaron nas probas”. O resultado foi que se demostrou a importancia dunha ferramenta como NETA para as persoas maiores, especialmente “en circunstancias como as que estamos a vivir, achegando unha canle de comunicación fácil e segura para manter a interacción con familiares e coa comunidade”.
NETA V3A é unha iniciativa de I+D+i que busca achegar solucións tecnolóxicas para mellorar a calidade de vida das persoas adultas maiores, no marco da convocatoria Conecta PEME da Axencia Galega de Innovación (GAIN).
Á fronte de NETAV3A están as empresas Balidea, Atendo, FrutoDS e Ledisson AIT, con Gradiant como centro tecnolóxico asociado.
Miguel Arias, responsábel técnico do proxecto en Balidea, destacou “o gran reto que supuxo para a empresa desenvolver o primeiro asistente virtual bilingüe, que entende e fala tanto galego como castelán. Era importante para comunicarse cos maiores da nosa comunidade falar no seu idioma”.
Pola súa banda, o especialista en sylver economy Juan Carlos Alcaide falou do “coidado humano amplificado pola tecnoloxía, que se apoia en NETA para prestarlles ás persoas maiores a axuda que necesitan”.
No acto de presentación interviñeron tamén Gisela García Álvarez (CSG), Luis Barros (Atendo), Lorena González (Gradiant), Alberto Montiel (FrutoDS), Alfonso Cuerdo (Ledisson) e Héctor Robles (Atendo).
Robótica amigábel para manter o contacto en tempos de pandemia
Os desenvolvedores de NETA destacan a relevancia deste proxecto no contexto actual, de distanciamento social debido á pandemia da COVID-19, que supuxo “unha dificultade engadida para moitas persoas maiores que viven soas”. A través do proxecto, achégase unha proposta de “robótica social, amigábel e afastada de estereotipos”, para acompañalas e facilitar as súas rutinas diarias, así como mantelas en contacto coas súas redes familiares e demais seres queridos.
Inclúe unha revolucionaria e significativa combinación de tecnoloxías: asistencia por voz, gamificación e Intelixencia Artificial, todo ao servizo de conseguir que “o uso da ferramenta sexa sinxelo e intuitivo” e para “ofrecer unha solución tecnolóxica respectuosa, que apoie a cada persoa no desenvolvemento do seu propio plan de vida, atendendo ás súas decisións persoais”.
O primeiro robot social creado en Galicia
O obxectivo xeral deste proxecto era desenvolver un robot, NETA V3A, como un elemento de apoio para que as persoas estean o maior tempo posíbel vivindo a vida tal e como a queren vivir. Trátase, segundo explica Balidea e o resto de empresas participantes, “do primeiro robot social desenvolvido en Galicia, un asistente virtual bilingüe, co que a persoa usuaria se pode comunicar por voz tanto en galego como en castelán”.
Dispón, ademais, dunha versión para dispositivos móbiles.
Este proxecto intégrase na chamada “economía prateada” (silver econcomy) da que derivarán produtos e servizos para as novas xeracións de adultos maiores.
Está subvencionado pola Axencia Galega de Innovación (GAIN), co apoio da Consellería de Economía, Emprego e Industria, a través do programa Conecta PEME, á súa vez co-financiado polo Fondo de Desenvolvemento Rexional (FEDER) da Unión Europea.

Emigración impulsa en Facebook un novo obradoiro de lingua e cultura galega

Fernando Sarasketa — 2021-02-19T20:05:03Z

O secretario xeral da Emigración, Antonio Rodríguez Miranda, anunciou a través dunha vídeo-conferencia a incorporación dun novo obradoiro formativo ao programa Aula GaliciaAberta dedicado á lingua e cultura galega.
A iniciativa recollerá un total de 25 obradoiros, serán impartidos por Reverso Comunicación e emitiranse a través do Facebook Live de Galicia Aberta, os luns e xoves de 20 a 21 horas dende o próximo 18 de febreiro ata o 13 de maio.
Os obradoiros teñen un estilo de docencia propio e interesante. Por un lado, comezarase cunha exposición inicial de 60 minutos sobre diferentes temas que permitirán avanzar no idioma galego a través da presentación, descrición de persoas, dos lugares, de escenas do pasado, de lendas, de oficios, de celebracións... Para finalizar, o docente responderá ás cuestión que os alumnos vaian trasladando a través da propia plataforma de Facebook.
Todos os interesados poderán ver en directo a presentación dos obradoiro, mais os que non teñan esa posibilidade poderán visualizalo posteriormente nas redes sociais da Secretaría Xeral da Emigración, e mesmo na súa web institucional.
Durante a conferencia que serviu como anuncio desta nova, o secretario xeral da Emigración, Antonio Rodríguez Miranda, destacou a importancia que ten a cultura galega “que sempre ocupou un lugar relevante nas comunidades galegas por todo o mundo”. Ademais explicou que “grazas á comunidade galega do exterior, que deu pulo á creación da Real Academia Galega en 1906, a nosa lingua iniciou o camiño cara á modernidade e mantivo activa a proxección de Galicia no mundo”.

A galega Drones Maritime achegará aos buques as vantaxes dos vehículos aéreos non tripulados

Fernando Sarasketa — 2021-02-12T16:30:00Z

O panorama de empresas innovadoras da nosa terra, concretamente do sector aeronáutico-tecnolóxico, vénse de enriquecer cunha nova incorporación, Drones Maritime, segundo os seus impulsores “unha firma que suporá unha revolución para o ámbito marítimo”. Drones Maritime xurdiu da alianza entre a galega Aerocamaras, entrada en desenvolvemento de drons de vangarda e formación, e Peninsula, provedor de combustíbel mariño. Segundo fixeron saber, a empresa naceu para achegar todas as vantaxes dos drons ás frotas de buques, “dende envíos loxísticos até inspeccións técnicas a todo tipo de embarcacións, dunha forma máis rápida, segura e eficaz que os medios tradicionais”.
Amais, creará unha oferta de servizos de 360 graos realizando transporte, inspeccións e audiovisual en portos e embarcacións, “provocando un impacto inmediato na seguridade, a rapidez e o aforro económico para os propietarios e os operadores de barcos”, explican dende Aerocamaras, que neste novo proxecto achegará a súa experiencia e bagaxe con traballos executados en máis de 15 países no eido internacional.
A nivel de operacións e funcionalidades concretas a desenvolver, Drones Maritime centrarase en traballos como a realización de inspeccións técnicas a barcos con cámaras HD, térmicas e multiespectrales; até a entrega e recepción de documentos e material en embarcacións.
A compañía recentemente creada tamén está a explorar como vehículos aéreos non tripulados máis grandes poderían entregar subministros, mercadorías e pezas de até 200 kg de peso mentres a embarcación permanece en tránsito, “o que aforrará tempo e diñeiro ao propietario e ao operador”.
Jamie Pereira Gil, fundador e CEO de Aerocamaras apuntaba: “Formamos pilotos e operando drons en toda Europa durante máis de 7 anos. A velocidade á que medrou esta industria é abraiante e estamos moi orgullosos de asociarnos cunha empresa como Peninsula. Drones Maritime centrarase no servizo ao cliente, garantindo transportes, inspeccións e servizos audiovisuais marítimos da máis alta calidade. O acordo permítenos continuar co desenvolvemento de aplicacións de drons en escenarios do mundo real e axudar a reducir o risco e aumentar a eficiencia a todas as empresas do sector marítimo”.