Código Cero - Diario Tecnolóxico de Galicia

A Coruña acolle un foro para analizar o papel de Galicia como potencia tecnolóxica e industrial

Redacción — 2026-06-15T09:30:00Z

A Coruña converterase os días 16 e 17 de xuño nun punto de encontro para representantes institucionais, directivos empresariais e especialistas en innovación co gallo da quinta edición do Foro Económico Español: La Galicia que viene, organizado por El Español, Invertia, Quincemil e Treintayseis no Auditorio Afundación e de acceso gratuíto previa inscrición.
Aínda que o evento abordará cuestións políticas, económicas e turísticas, a tecnoloxía, a innovación e a transformación industrial concentrarán boa parte do protagonismo da programación. O encontro servirá para debater sobre o posicionamento de Galicia en ámbitos estratéxicos como a intelixencia artificial, a computación cuántica, a soberanía do dato, a transición enerxética ou a industria aeroespacial.
Un dos momentos máis destacados da primeira xornada será a conversación centrada na oportunidade de Galicia para liderar o desenvolvemento tecnolóxico, na que participarán o director de NTT Data en Galicia e Asturias, Alberto Borrego, e o director xeral da Axencia Española de Supervisión da Intelixencia Artificial (AESIA), Alberto Gago. A sesión permitirá analizar o impacto da intelixencia artificial na economía e as posibilidades que se abren para o ecosistema tecnolóxico galego.
A mañá do mércores estará dedicada principalmente á industria, a innovación e as tecnoloxías emerxentes. O programa inclúe unha análise do potencial da eólica mariña en Galicia, así como o papel da comunidade como futuro nodo enerxético e industrial. Tamén se abordarán cuestións relacionadas coa seguridade enerxética, a competitividade empresarial e o financiamento da transformación tecnolóxica.
O Centro Tecnolóxico ITG terá unha presenza destacada ao participar en varias sesións centradas na enerxía, a xestión do dato e a computación cuántica. Entre elas figura unha conversación sobre soberanía e trazabilidade da información empresarial ante a nova regulación europea, así como unha intervención dedicada aos retos que a computación cuántica expón para a ciberseguridade e os sistemas actuais de protección criptográfica.
A intelixencia artificial volverá ocupar un espazo relevante cunha sesión específica sobre IA avanzada, na que participará Julia Díaz, responsable de Data Science de Repsol. A programación tecnolóxica completarase cunha intervención de Alén Space para abordar as oportunidades da industria espacial galega e a crecente presenza da comunidade no desenvolvemento de satélites e tecnoloxías vinculadas ao sector aeroespacial.
A innovación aplicada ao ámbito sanitario tamén contará cun espazo propio a través dunha conversa sobre medicina e transformación tecnolóxica nos servizos de saúde.

Anthropic pecha a villa dos seus modelos de IA máis avanzados

Redacción — 2026-06-15T09:15:19Z

Poucos días despois do lanzamento comercial de Claude Fable 5 e Claude Mythos 5, Anthropic anuncia a suspensión inmediata do acceso aos mencionados modelos tras recibir unha directiva de control de exportación emitida polo Goberno dos Estados Unidos por razóns de seguridade nacional. A medida afecta a todos os usuarios destes modelos, tanto dentro como fóra do país, incluídos os propios empregados de Anthropic que non sexan cidadáns estadounidenses.
Segundo explicou a empresa, a orde foi recibida o 12 de xuño e obriga a desactivar completamente ambos os modelos para garantir o cumprimento da normativa. O resto dos modelos da compañía seguirán funcionando con normalidade.
Anthropic asegura que a comunicación oficial non inclúe detalles concretos sobre os riscos detectados. A súa interpretación é que as autoridades consideran que se identificou un método para eludir ou jailbreakear os mecanismos de seguridade de Fable 5. A compañía afirma ter revisado a demostración desta técnica e conclúe que só permitía descubrir un número reducido de vulnerabilidades menores xa coñecidas previamente, sen que os resultados observados superasen as capacidades dispoñibles noutros modelos de acceso público.
A empresa defende que Fable 5 foi sometido antes do seu lanzamento a miles de horas de probas de seguridade realizadas en colaboración con organismos gobernamentais estadounidenses e británicos, organizacións externas e equipos internos. Esas avaliacións, segundo sostén, demostraron que os mecanismos de protección do modelo eran máis efectivos que os presentes en sistemas anteriores.
Anthropic recoñece que a resistencia absoluta aos jailbreaks non parece tecnicamente alcanzable na actualidade para ningún provedor de modelos de intelixencia artificial. Por ese motivo adoptou unha estratexia de defensa en profundidade baseada en dificultar a creación de métodos de evasión amplos, limitar o impacto dos ataques máis específicos e reforzar a monitorización para detectar posibles abusos. Nese marco tamén se encadra a conservación durante 30 días dos datos dos clientes que utilizan Fable 5, unha medida que, segundo a compañía, facilita a investigación e mitigación de vulnerabilidades.
O comunicado sostén que ata o momento non recibiu probas documentadas dun jailbreak capaz de producir resultados perigosos. Anthropic asegura que a evidencia facilitada polas autoridades consiste nun método específico e limitado que, esencialmente, pide ao modelo analizar unha base de código e corrixir erros de software. A compañía afirma que revisou o informe que considera a base da decisión gobernamental e concluíu que as capacidades demostradas están amplamente dispoñibles noutros sistemas comerciais, citando expresamente GPT-5.5 de OpenAI.
A empresa manifesta o seu desacordo coa decisión das autoridades e considera que a identificación dun posible jailbreak limitado non debería ser motivo suficiente para retirar un modelo comercial utilizado por centos de millóns de persoas. Tamén advirte de que, se este criterio se aplicase de maneira uniforme a todo o sector, podería frear practicamente a despregadura de novos modelos avanzados de intelixencia artificial.
Anthropic sinala que apoia a existencia de mecanismos gobernamentais para impedir lanzamentos considerados inseguros, pero defende que esas actuacións deben desenvolverse mediante procedementos transparentes, claros e baseados en feitos técnicos verificables. Na súa opinión, a decisión adoptada neste caso non cumpre eses principios.
Mentres traballa para recuperar o acceso aos modelos afectados, a empresa pide desculpas polos problemas ocasionados aos clientes e asegura que considera a situación resultado dun malentendido.
Non faltan voces críticas que consideran que a situación actual foi provocada en boa medida pola propia Anthropic, que utilizou a política do medo para vender os seus novos modelos de IA, e agora que as autoridades poñen limitacións ao seu acceso queren corrixir a imaxe proxectada.
Dende Europa o acontecido tamén reforza a idea de conseguir certo nivel de soberanía tecnolóxica, xa que a posibilidade de que os EE.UU. limite a exportación das súas tecnoloxías de fronteira situaríanos nunha clara situación de desvantaxe competitiva, o que agora pode verse como algo palpable.

O Departamento de Xustiza dos EE.UU. avala a fusión entre Paramount Skydance e Warner Bros. Discovery

Redacción — 2026-06-12T21:00:00Z

O Departamento de Xustiza dos Estados Unidos pechou a súa investigación sobre a adquisición de Warner Bros. Discovery (WBD) por parte de Paramount Skydance sen presentar obxeccións, ao concluír que a operación non prexudicará a competencia nin aos consumidores estadounidenses. A decisión chega tras unha investigación de oito meses na que se analizaron máis de dous millóns de documentos e abundante información achegada tanto polas empresas implicadas como por terceiros do sector audiovisual.
O organismo antimonopolio examinou o impacto da operación en tres ámbitos principais: os servizos de vídeo baixo demanda por subscrición, a televisión lineal tradicional e a produción e distribución cinematográfica para salas. A conclusión foi que a integración das dúas compañías non reducirá a competencia en ningún destes mercados e mesmo podería reforzala.
A análise produciuse despois dun proceso de ofertas rivais para adquirir Warner Bros. Discovery. En decembro de 2025, Netflix alcanzara un acordo para facerse coa compañía, pero posteriormente Paramount presentou unha oferta pública de adquisición en efectivo. O Departamento de Xustiza revisou ambas as propostas e considera que esta competencia entre potenciais compradores achegou información valiosa para avaliar o futuro do sector.
No mercado do streaming, os investigadores concluíron que a entidade resultante terá unha posición significativamente inferior á dos líderes actuais. Segundo o informe, Paramount+ e os servizos HBO Max e Discovery+ contan cunha base de subscritores menor que a dos tres maiores operadores do sector. A integración permitiría crear unha oferta máis sólida capaz de exercer maior presión competitiva fronte ás plataformas dominantes.
Tamén se estudou a posibilidade de que o novo grupo optase por reservar en exclusiva os seus contidos e propiedades intelectuais para as súas propias plataformas. Porén, a investigación sinala que ambas as empresas manteñen historicamente unha ampla política de licenzas e non atopou indicios de que esa estratexia vaia cambiar tras a fusión.
A avaliación da televisión lineal estivo marcada polo continuo descenso do consumo de paquetes tradicionais de cable e satélite. O regulador destaca que a migración cara ao streaming reduciu os ingresos das cadeas convencionais e incrementou a competencia polos dereitos de retransmisión en directo, especialmente deportivos e informativos. Neste escenario, conclúe que a operación non diminúe a competencia existente.
A produción cinematográfica foi outro dos aspectos analizados. O Departamento de Xustiza considera que a competencia segue sendo intensa grazas á presenza de grandes estudios tradicionais como Disney, Sony, Universal, Lionsgate ou MGM, así como á crecente relevancia de empresas independentes como A24, NEON e Blumhouse. Tamén subliña a entrada de actores tecnolóxicos como Netflix e Apple na distribución para salas.
O organismo tamén examinou as preocupacións expresadas por algúns competidores e representantes do sector audiovisual, incluíndo posibles efectos negativos sobre o emprego creativo. A investigación concluíu que non existen probas suficientes para prever unha redución da produción de contidos e, en consecuencia, tampouco unha diminución significativa da demanda de traballadores vinculados á industria.
O Departamento de Xustiza sostén que a industria do cine e da televisión atravesa unha etapa de forte transformación e considera que a adquisición de Warner Bros. Discovery por Paramount Skydance pode contribuír a incrementar a competencia fronte aos maiores actores do mercado audiovisual estadounidense.

A saída a Bolsa de SpaceX converte a Musk no primeiro billonario da historia

Redacción — 2026-06-12T19:26:29Z

: Parodia xerada con IA

A fortuna de Elon Musk alcanzou por primeira vez o billón de dólares, converténdoo na primeira persoa da historia en superar ese limiar patrimonial como consecuencia da suba das accións de SpaceX poucas horas despois da súa estrea na Bolsa (considerada a meirande saída a Bolsa da historia). Segundo unha análise de Bloomberg, o patrimonio do empresario de 54 anos duplica xa a suma das fortunas de Jeff Bezos e Bernard Arnault, que hai apenas dous anos disputaban con el o posto de persoa máis rica do mundo.
A meirande parte desta riqueza non está dispoñible en efectivo, senón vinculada ás participacións de Musk en empresas como Tesla e SpaceX. A venda dunha parte significativa destes activos podería afectar gravemente á súa valoración bolsista, polo que a súa capacidade de gasto real é moito máis limitada do que suxire a cifra total do seu patrimonio.
SpaceX foi o principal motor do crecemento recente da fortuna do empresario. Os seus activos superan en máis de 200.000 millóns de dólares todo o gasto acumulado pola NASA desde a súa creación en 1958.
A documentación da saída a bolsa de SpaceX contempla incentivos adicionais vinculados a obxectivos extraordinariamente ambiciosos, entre eles a creación dunha colonia humana permanente en Marte con polo menos un millón de habitantes.
De cumprirse esas metas, o paquete de compensación previsto para Musk podería engadir ata 760.000 millóns de dólares adicionais á súa fortuna, ampliando aínda máis unha diferenza patrimonial que xa non ten precedentes na historia moderna.

O FIFA volve da man de Netflix

Redacción — 2026-06-12T18:30:00Z

Netflix anunciou o lanzamento de FIFA World Cup: Launch Edition, un novo videoxogo oficial do Mundial de Fútbol de 2026 que está dispoñible en exclusiva a través de Netflix Games. A proposta aposta por partidas rápidas e accesibles, permitindo que ata catro persoas xoguen xuntas empregando os seus teléfonos móbiles como mandos mentres a acción se desenvolve no televisor.
O título preséntase como unha experiencia máis sinxela e inmediata ca as simulacións futbolísticas tradicionais. Para comezar unha partida só é preciso iniciar o xogo na televisión, escanear un código QR co móbil e utilizar a pantalla táctil para realizar pases e disparos. O obxectivo é facilitar o acceso tanto a afeccionados habituais dos videoxogos como a persoas sen experiencia previa.
Coincidindo co inicio da Copa do Mundo masculina da FIFA 2026, o xogo permitirá escoller calquera das 48 seleccións participantes no torneo, competir nos 16 estadios oficiais e controlar calquera dos 1.248 futbolistas convocados para a competición. Netflix destaca que a intención é trasladar ao salón da casa a emoción de seguir os partidos en directo e compartir a experiencia con amigos e familiares.
A edición inicial, denominada Launch Edition, concíbese como o punto de partida dun proxecto que irá evolucionando co paso do tempo. Nesta primeira versión priorízase unha xogabilidade directa e centrada na diversión inmediata, aproveitando o ambiente xerado arredor do Mundial.
O videoxogo forma parte da aposta de Netflix polos xogos para televisión. Actualmente esta funcionalidade está dispoñible en vinte países, entre eles España, Estados Unidos, Canadá, Reino Unido, Francia, Alemaña, Italia, México, Australia, Brasil ou Suíza. A plataforma tamén iniciou unha fase limitada de probas en Brasil.
FIFA World Cup: Launch Edition está incluído sen custo adicional para os subscritores de Netflix e pode localizarse na sección de xogos da aplicación para o televisor.
Cómpre salientar que, aínda que este sexa o auténtico videoxogo oficial da FIFA, está tecnicamente moi lonxe das entregas dos FIFA de EA Sports, ata o punto de que esta entrega non estaría nin sequera á altura dos xogos para as primeiras PlayStation, aínda que tampouco parece pretender compararse aos xogos de consola, buscando unha experiencia moito máis ocasional.

Vídeo promocional do FIFA World Cup: Launch Edition

InnovaTech FP premia proxectos galegos centrados en IA e dixitalización

Redacción — 2026-06-12T11:33:20Z

O programa InnovaTech FP consolidouse como un dos principais escaparates da innovación tecnolóxica desenvolvida nos centros de Formación Profesional galegos. Así o destacou o conselleiro de Educación, Ciencia, Universidades e FP, Román Rodríguez, durante a entrega dos premios da terceira edición do certame, celebrada esta mañá en Culleredo, onde salientou que a iniciativa xa deu lugar á primeira patente da FP galega e mesmo á creación dunha empresa.
A edición deste ano bateu récords de participación, con 254 equipos inscritos e máis de 1.250 persoas implicadas entre alumnado e profesorado. Os participantes traballaron na resolución de 20 retos formulados por empresas de distintos sectores produtivos, dos que resultaron premiados 14 centros educativos galegos.
Entre os proxectos galardoados con maior compoñente TIC figura o desenvolvido polo IES de Teis para L'Oréal, unha plataforma de xestión para salóns de peiteado baseada en intelixencia artificial capaz de automatizar reservas, xestionar axendas mediante voz e xerar contidos para redes sociais.
Tamén foi recoñecida a plataforma Retail-Flow, creada polo IES García Barbón e o CIFP A Carballeira-Marcos Valcárcel para elPulpo, que emprega códigos QR e triangulación Wi-Fi para medir a rendibilidade do mobiliario comercial e optimizar a disposición dos produtos nas tendas.
O CIFP Universidade Laboral obtivo outro dos premios grazas a unha plataforma web con intelixencia artificial destinada a impulsar o turismo deportivo mediante a creación automática de paquetes que combinan eventos, aloxamento e actividades complementarias.
A dixitalización de procesos industriais tamén estivo presente entre os traballos premiados. O CIFP Montecelo desenvolveu para Repsol un sistema de trazabilidade baseado na Internet das Cousas e RFID para localizar equipos e ferramentas en tempo real, mentres que o CIFP Ferrolterra foi distinguido por unha plataforma de software que garante a trazabilidade integral nunha fábrica de mobiliario de alta gama mediante códigos QR.
A visión artificial foi outra das tecnoloxías con maior protagonismo. O IES Politécnico de Vigo resultou premiado por un sistema capaz de detectar automaticamente a acumulación de residuos en membranas de ultrafiltración para activar procesos de limpeza, mentres que o IES Manuel Chamoso Lamas desenvolveu unha solución orientada á detección de defectos en chapas de aceiro mediante intelixencia artificial.
O CIFP A Carballeira-Marcos Valcárcel destacou especialmente nesta edición ao recibir varios galardóns, entre eles o correspondente a unha plataforma intelixente de vixilancia do tráfico marítimo que emprega intelixencia artificial e xeolocalización para detectar anomalías e protexer zonas sensibles do litoral galego. O mesmo centro foi premiado tamén por unha aplicación móbil baseada en visión artificial e IA xenerativa para crear receitas personalizadas a partir de algas.
Outras solucións distinguidas incorporan tecnoloxías como sensores intelixentes, comunicacións LoRaWAN, xeolocalización, RFID ou navegación autónoma para robots móbiles, como o sistema de medición de caudais desenvolvido polo CIFP Politécnico de Santiago ou o carro de ferramentas autónomo do CIFP Ferrolterra.
As 20 propostas premiadas pasarán agora a formar parte da área de emprendemento industrial do Centro Galego da Innovación da FP Eduardo Barreiros, onde recibirán apoio para a súa incubación e aceleración co obxectivo de favorecer a creación de novas empresas innovadoras e de base tecnolóxica.

Nova edición das sesións formativas Finanzas para todos na Rede CeMIT

Redacción — 2026-06-12T09:46:12Z

A Axencia para a Modernización Tecnolóxica de Galicia (AMTEGA), en colaboración co Banco de España, impulsa unha nova edición da iniciativa Finanzas para todos, destinada a mellorar a educación financeira da cidadanía e fortalecer a súa capacidade para adoptar decisións económicas seguras, responsables e ben fundamentadas.
As sesións darán comezo o vindeiro 17 de xuño na aula CeMIT de Celanova e desenvolveranse ata outubro nas aulas CeMIT de Abegondo, Ribeira, Vilagarcía de Arousa e A Coruña (Centro Cívico de Eirís). Como en edicións anteriores, o programa organízase en dous itinerarios formativos, compostos por dúas sesións cada un e cunha duración total de 7,5 horas.
O primeiro itinerario estará dedicado á xestión das finanzas persoais. Nel trataranse aspectos como a elaboración dun orzamento, a identificación e clasificación de ingresos e gastos, o aforro, o investimento e o endebedamento. O obxectivo é facilitar a adquisición de hábitos financeiros máis seguros e responsables.
A formación incluirá tamén actividades prácticas sobre o uso de contas bancarias, tarxetas e distintos medios de pagamento. Do mesmo xeito, reservarase un espazo específico á prevención da ciberdelincuencia, con recomendacións para realizar operacións financeiras dixitais con maiores garantías de seguridade.
O segundo itinerario permitirá profundar nos contidos abordados previamente, contribuíndo a reforzar a confianza da cidadanía na xestión das súas finanzas persoais.
As sesións apoiaranse no uso de ferramentas dixitais, como LibreOffice e distintos simuladores, para fomentar unha aprendizaxe práctica e mellorar as competencias dixitais dos asistentes. Tamén se promoverá o aproveitamento das tecnoloxías dixitais para elaborar orzamentos, analizar gastos e comparar servizos financeiros, sen esquecer a concienciación sobre os riscos asociados ás decisións económicas do día a día.
As persoas interesadas poden consultar a programación completa e formalizar a súa inscrición vía web.

O novo lector de libros electrónicos de Boox engade compatibilidade con lapis

Redacción — 2026-06-11T20:30:00Z

Boox presentou o Go 6 (Gen II), a segunda xeración do seu lector electrónico de 6 polgadas, que incorpora por primeira vez compatibilidade cun lapis dixital para tomar notas, realizar anotacións e subliñar contidos. O dispositivo mantén a súa orientación á mobilidade, pero amplía as súas funcións máis alá da lectura grazas á integración dunha aplicación nativa de notas.
O novo modelo xa pode reservarse a través da tenda oficial europea de Boox cun prezo de 199,99 euros na súa versión estándar (as primeiras unidades prevese que comecen a enviarse arredor do 24 de xuño). Tamén se comercializa un paquete que inclúe o lapis InkSense Plus por 232,99 euros durante o período promocional (fronte ao seu prezo habitual de 245,98 euros).
A principal novidade do Go 6 (Gen II) é a compatibilidade co lapis InkSense Plus (á venda por separado a un prezo de 45,99 euros), que permite escribir notas manuscritas, crear listaxes de tarefas, destacar fragmentos de texto ou engadir anotacións aos libros. A función compleméntase cunha aplicación específica para notas integrada no sistema.
O trebello estrea ademais un deseño renovado inspirado na forma dunha maleta, cunha traseira que incorpora regos texturizados e curvas suaves para mellorar a suxeición. Está dispoñible en catro cores: Plum, Stone, Shell e Custard.
O lector pesa preto de 160 gramos e ten un grosor de 6,8 milímetros, dimensións que facilitan o seu transporte nun peto ou nun bolso pequeno. A pantalla monocroma E Ink de 6 polgadas ofrece unha resolución de 1.448 x 1.072 píxeles e unha densidade de 300 píxeles por polgada, co obxectivo de reproducir o aspecto visual do papel impreso. Conta tamén con iluminación frontal regulable en tonalidades cálidas e frías.
Entre as melloras técnicas destaca o aumento da memoria RAM ata os 3 GB, mentres que o almacenamento interno mantense en 32 GB, ampliables mediante tarxetas microSD. O dispositivo funciona con Android 11 e integra acceso á tenda Google Play para instalar aplicacións de terceiros. Inclúe Wi-Fi de dobre banda (2,4 e 5 GHz), Bluetooth 5.0, porto USB-C e batería de 1.500 mAh.

Vídeo promocional do lector Boox Go 6 (Gen II)

Confirman que o Trump Mobile T1 é un móbil chinés pintado de dourado

Redacción — 2026-06-11T15:00:00Z

Unha análise técnica realizada de forma conxunta por iFixit e NBC News sobre o smartphone Trump Mobile T1 conclúe que o dispositivo é, na práctica, unha versión case idéntica do HTC U24 Pro lanzado en 2024, con cambios fundamentalmente estéticos. O estudo combina escaneos por tomografía computarizada, inspección non destrutiva e desmontaxe completa do terminal.
A colaboración entre ambas as entidades foi clave para obter acceso ao dispositivo e contextualizar a súa análise, permitindo comparar directamente o T1 cun HTC U24 Pro e verificar ata que punto existían diferenzas reais entre ambos modelos. As primeiras inspeccións visuais xa apuntaban a unha coincidencia case total na disposición de cámara, estrutura e deseño xeral.
Os escaneos previos á apertura do terminal mostraron unha coincidencia practicamente exacta entre a arquitectura interna dos dous dispositivos. A análise confirmou que a disposición dos compoñentes, a distribución da placa base e a localización dos elementos estruturais son idénticas, o que reforza a hipótese de que ambos teléfonos proceden dunha mesma base de deseño.
As diferenzas identificadas limítanse a modificacións superficiais. Entre elas figura un lixeiro cambio na posición aparente do flash traseiro, que non responde a unha reorganización real dos compoñentes, senón ao uso dun cable flex máis longo que altera a percepción do seu emprazamento. Tamén se detecta un patrón diferente na perforación da grella do altofalante, aínda que os compoñentes acústicos e a súa colocación permanecen inalterados.
No interior, a placa base do T1 é practicamente idéntica á do HTC U24 Pro, baseada no procesador Qualcomm Snapdragon 7 Gen 3. As diferenzas redúcense ao subministro de memoria e almacenamento, con variacións no provedor do encapsulado, algo habitual en producións que dependen de cadeas de subministración flexibles.
A batería constitúe unha das poucas modificacións técnicas relevantes. O T1 incorpora unha unidade de 19,35 Wh fronte aos 17,23 Wh do modelo de HTC, cun tamaño similar pero maior capacidade nominal. Esta batería está fabricada por Newlix Mfg Inc., unha empresa rexistrada nas Filipinas en 2025. Ademais, o dispositivo limita a carga rápida a 30 watts, mentres que o U24 Pro alcanza os 60 watts, diferenza que tamén se reflicte no cargador incluído.
O uso dunha batería de fabricación filipina contrasta coa tendencia dominante na industria, onde China concentra a maior parte da produción de células para dispositivos electrónicos. A análise sinala que este detalle podería estar relacionado cun volume de produción máis reducido do habitual no mercado global de smartphones.
Os investigadores tamén apuntan a que parte da montaxe podería realizarse en Estados Unidos, con integración de compoñentes como módulos de cámara, batería ou elementos de conexión. Porén, sublíñase que esta fase final non sería suficiente para cualificar o dispositivo como fabricado nos Estados Unidos segundo os criterios industriais habituais.

Vídeo no que afondan no Trump Mobile T1

Ribadeo acolle unha xornada sobre saúde laboral e intelixencia artificial

Redacción — 2026-06-11T12:00:00Z

A xerente do Instituto de Seguridade e Saúde Laboral de Galicia (Issga), Adela Quinzá-Torroja, participou hoxe en Ribadeo na inauguración da xornada técnica Transformación dixital e intelixencia artificial: unha mirada desde a saúde laboral, organizada polo Laboratorio de Riscos Psicosociais do Issga e a Universidade de Santiago de Compostela (USC). O encontro reuniu a 65 participantes procedentes de diferentes ámbitos profesionais e institucionais. Durante a súa intervención, a responsable do Issga destacou a necesidade de anticiparse aos novos riscos psicosociais para garantir contornos de traballo saudables e sostibles, ao tempo que puxo en valor o papel que desempeña o Laboratorio de Riscos Psicosociais neste ámbito.
Quinzá-Torroja subliñou que esta cuestión resulta especialmente relevante ante a crecente incorporación das tecnoloxías dixitais e da intelixencia artificial aos procesos produtivos. Segundo explicou, estas transformacións abren novas oportunidades, pero tamén presentan desafíos relacionados coa xestión das persoas, a adaptación das organizacións, a retención do talento e a protección da saúde laboral. Por iso, incidiu na utilidade de iniciativas como esta xornada para favorecer contornos de traballo máis saudables e adaptados ás novas realidades tecnolóxicas.
A actividade está orientada principalmente a persoal directivo, responsables de recursos humanos, profesionais da prevención de riscos laborais e outras persoas interesadas nesta materia. Ademais da súa vertente formativa, constitúe un espazo de reflexión e coordinación entre distintos actores clave, co obxectivo de impulsar a integración da saúde psicosocial nas políticas laborais e preventivas de maneira transversal.
O Laboratorio de Riscos Psicosociais, impulsor desta xornada, enmárcase na Estratexia de Seguridade e Saúde no Traballo de Galicia: Horizonte 2027. Trátase dunha iniciativa conxunta da Xunta e da USC creada para promover a transferencia de coñecemento científico neste ámbito e contribuír á mellora da saúde psicosocial das persoas traballadoras nas empresas galegas desde unha perspectiva integral. Para iso desenvolve actividades de investigación, formación, sensibilización e colaboración técnica, entre as que se inclúe esta xornada.