Código Cero - Diario Tecnolóxico de Galicia

Galiciencia 2022 chega ao seu remate con chuvia de premios

Anxo Sesto — 2022-05-13T19:53:27Z

Galiciencia, a maior feira científica que se celebra na nosa comunidade, promovida pola Tecnópole, clausurou na maña deste venres 23 de maio a súa 17ª edición, baixo o lema da Economía Circular. Ao acto de clausura, no que se fixo entrega dos premios desta edición, asistiron o delegado territorial da Xunta en Ourense, Gabriel Alén; e o director de Tecnópole, Javier Taibo, que anunciou a temática de Galiciencia 2023: Aeronáutica e Aeroespacial.
O primeiro premio
O primeiro premio recaeu no proxecto Pondal nature, cosmética natural, de Carla García Pedrosa e Noa Caride, do CPR Eduardo Pondal de Cangas. O proxecto apoiase na investigación e elaboración de diferentes receitas tradicionais para facer produtos de coidado persoal. Así, elaboraron ata cinco produtos diferentes -xampú, crema de mans, crema facial , bombas de xabón e bálsamo labial-. Este primeiro premio, dotado con 1.000 euros, permitiralles asistir a Exporecerca en Barcelona.
O segundo premio
O segundo equipo clasificado foi o formado por María Lama e Pilar Jorge, do IES Rosalía de Castro de Santiago. O seu proxecto consiste no deseño dunha boneca de reanimación cardiopulmonar, “coa que se poida aprender sen axuda de ninguén”, explican as rapazas. Con este segundo premio reciben 500 euros para participar na Zientzia Azoka de Bilbao.
O terceiro premio
O terceiro premio foi para o proxecto Nuestro súper bioplástico de Sheila Piedras e Manuel Prieda, do CIFP Manuel Antonio de Vigo. Fixeron un bioplástico a base de auga, glicerina, maicena, vinagre, colorante e canela, que se degrada na natureza e se pode destruír con auga. O equipo recibiu 200 euros para a compra de material científico e/ou tecnolóxico para o seu centro escolar.
Outros premios e proxectos
Por outra banda, tamén se entregaron premios a outros proxectos: premio ao proxecto máis innovador para un coche que se controla coa mente; premio ao mellor proxecto liderado por rapazas para Ensaio de biorremediación co fungo Pleurotus Ostreatus sobre mascarillas cirúrxicas; dous premios para as mellores fotos dun concurso de fotografía a través de Instagram, e moito máis.

Gran variedade de propostas entre os gañadores do desafío de Galiciencia 2022

Anxo Sesto — 2022-05-12T19:17:58Z

Galiciencia, a maior feira científica que se celebra na nosa comunidade, estase a desenvolver ata mañá venres no Parque Tencolóxico de Galicia, baixo o lema da Economía Circular. A finalidade desta proposta é espertar as vocacións científicas entre o alumnado de Primaria, Secundaria, Bacharelato e FP. Na xornada deste xoves celebrouse a final do Desafío científico Atrévete coa Economía Circular!, no que participou alumnado de 4º de Primaria e Bacharelato de xeito online.
O gañador da categoría de Primaria foi o equipo As Ecolóxicas, integrado por 3 rapazas pontevedresas que apostaron pola reciclaxe de xoguetes; na categoría de 1º e 3º de Secundaria gañou o equipo El Bicho Científico, formado por dous rapaces de Baiona que optaron por un proxecto baseado na deforestación e a reciclaxe de papel. Xa na categoría de 4º de Secundaria a Bacharelato, gañou o equipo A Trapados, formado por 3 rapaces de Ribeira que, a través dun vídeo, fixeron unha comparativa entre empregar botellas de plástico e botellas reutilizábeis, co fin de fomentar o uso destas últimas.
O alumnado de Secundaria, Bacharelato e FP está a participar en tres obradoiros diferentes. Da liña ao círculo presenta xogos interactivos e educativos baseados na economía circular; no taller Dálle a volta ao usar e tirar, o alumnado converte refugallos domésticos nun líquido valioso, e na actividade O Lixo Vertical estanse a desenvolver experiencias para mentalizar aos rapaces sobre a excesiva produción de lixo. A maiores, alumnado de Secundaria e Bacharelato tamén participan no taller A aventura de voar, que se desenvolve na Aula Newton Galicia instalada en Tecnópole.
A feira remata mañá venres coa entrega de premios aos tres mellores proxectos presentados nesta edición. Haberá tamén un premio especial para o proxecto coa mellor valoración popular, escollido entre todos os participantes na modalidade online.

A Galiciencia xuntará até o venres preto de 2.900 participantes

Anxo Sesto — 2022-05-11T20:33:30Z

Galiciencia, a maior feira científica que se celebra na nosa comunidade, arrancaba na mañá deste mércores 11 de maio no Parque Tecnolóxico de Galicia baixo o lema da Economía Circular. O seu obxectivo principal é espertar as vocacións científicas entre o alumnado de Primaria, Secundaria, Bacharelato e FP. Desenvólvese en colaboración coa Vicepresidencia segunda e Consellería de Economía, Empresa e Innovación da Xunta de Galicia; e co apoio do Ministerio de Ciencia e Innovación. A feira reunirá ata este venres a un total de 2.874 participantes.
O vicepresidente segundo e conselleiro de Economía, Empresa e Innovación en funcións, Francisco Conde, visitou a feira e indicou que se atopa moi contento de retomar a presencialidade neste evento, así como de poder continuar espertando as vocacións científicas na xuventude. Entre os 70 proxectos de Primaria, Secundaria, Bacharelato e FP que participan na feira de xeito presencial, hai multitude de propostas de campos moi diversos (creación dun coche que se controla coa mente, un semáforo para persoas con discapacidade visual-auditiva, unha ventá calefactora, unha boneca de reanimación cardiopulmonar, etc).
A feira compleméntase con actividades que buscan achegar a ciencia e a tecnoloxía aos máis novos de xeito práctico e divertido. Un exemplo disto son os obradoiros de Redeseño Coñecementos!, destinado ás posibilidades da economía circular; e o taller Eco-Deseñar, Bio-Fabricar, sobre a importancia de incorporar o pensamento medioambiental no deseño de produtos que empregamos.
Os rapaces e rapazas de Secundaria e Bacharelato que expoñen os seus proxectos na feira tiveron esta mañá a oportunidade de asistir e participar no programa Efervesciencia da Radio Galega, que conduce Manuel Vicente. Xa na xornada deste xoves 12 de maio, ás 11:00 horas, celebrarase un novo espectáculo de ciencia, que se poderá seguir a través da canle de YouTube da Tecnópole.

Todo listo para o comezo da 17ª edición de Galiciencia

Anxo Sesto — 2022-05-10T18:30:00Z

O Parque Tecnolóxico de Galicia – Tecnópole – promove un ano máis a Galiciencia, a maior feira científica da nosa comunidade que busca achegar a ciencia á sociedade, en particular aos estudantes de Primaria, Secundaria, FP e Bacharelato. Desenvólvese en colaboración coa Consellería de Economía, Empresa e Innovación e co Ministerio de Ciencia e Innovación. O vicepresidente segundo e conselleiro de Economía, Empresa e Innovación en funcións, Francisco Conde, dará mañá mércores, 11 de maio, o pistoletazo de saída da feira, ás 10:00 horas.
Galiciencia regresa á modalidade presencial despois de dous anos en formato online (aínda que tamén se poderá participar a través da rede). Esta 17ª edición prolongarase ata o venres, coa temática da “Economía circular”, na que participarán de xeito presencial un total de 210 rapaces e rapazas de 37 centros educativos diferentes (tanto galegos como de fóra). Na modalidade presencial concorren 50 proxectos de Secundaria, Bacharelato e Fp, e 20 de Primaria. De xeito online participan 17 proxectos de Secundaria, Bacharelato e FP, e 3 de Primaria. Durante estes tres días os equipos seleccionados para amosar os seus traballos científicos expoñeranos nos stands da feira e explicarán as súas propostas ao público. O primeiro premio está dotado con 1.000 euros para que poidan asistir á Exporecerca en Barcelona, a maior feira científica a nivel estatal; o segundo equipo clasificado recibirá 500 euros, o que lles permitirá asistir a Zientzia Azoka, feira científica en Bilbao, e o terceiro clasificado recibirá 200 euros para a compra de material científico.
Premiarase tamén a mellor presentación oral de proxecto, o proxecto máis innovador, o proxecto que contribúa dalgunha maneira á igualdade de xénero... ademais, a feira compleméntase con actividades que buscan achegar a ciencia e a tecnoloxía aos máis novos de xeito práctico e divertido.

O Concerto das Letras Galegas poderá verse en directo a través da Rede e a TVG

Anxo Sesto — 2022-05-10T08:11:12Z

A Biblioteca do Consello de Cultura Galega acolleu na mañá deste luns 9 de maio a rolda de prensa dos actos centrais con que o Consello de Cultura Galega celebra o Día das Letras Galegas deste 2022. A presidenta, Rosario Álvarez, presentou tanto o tradicional Concerto das Letras Galegas (que será emitido en directo a través da TVG e da Internet), como a publicación de homenaxe: a publicación co facsímile do Cancioneiro da loita galega. Xunto a ela atopábanse outras personalidades como Víctor Freixanes, presidente da Real Academia Galega; o autor Xesús Alonso; o voceiro do grupo Zoar, Álex Salgueiro e a compositora contemporánea Carme Rodríguez.
Respecto da publicación, a presidenta argumentou no limiar do libro para a elección do Cancioneiro da loita galega que “Florencio Delgado Gurriarán é tamén o activista cultural que pon as súas armas, incluída a poesía, ao servizo da causa republicana e da causa da cultura galega”. Este libro foi escrito por Florencio xunto cun grupo amplo de poetas e foi publicado polo Partido Galeguista en México en 1943.
Por outra banda, o grupo de cámara Zoar será o encargado desta edición do Concerto das Letras Galegas. Un dos seus integrantes, Álex Salgueiro, indicou que “está pensando homenaxear a persoa de Florencio Delgado pero tamén ao colectivo que formou parte do exilio mexicano”. Por iso, o programa, que se poderá ver tanto a través da Rede e da TVG o propio día 17, como indo ao Teatro Lauro Olmo do Barco de Valdeorras a véspera, está conformado por pezas que fan referencia explícita ao homenaxeado e, por “creacións musicais ligadas á diáspora mexicana”.
En cada edición do Concerto das Letras Galegas hai unha estrea absoluta a partir dunha encarga do CCG. Nesta ocasión, a estrea é a peza Diásporas, composta por Carme Rodríguez (Ribadeo, 1996).

ADICAE organiza unha sesión formativa sobre criptomoedas

Anxo Sesto — 2022-05-09T07:55:41Z

A Asociación de Usuarios de Bancos, Caixas e Seguros – ADICAE – organiza unha sesión formativo sobre criptomoedas o vindeiro mércores 11 de maio ás 18:30h. Á sesión poderase acudir de xeito presencial nas sedes de ADICAE de A Coruña e Vigo, ou inscribíndose para participar a través de vídeo-conferencia (Zoom).
ADICAE lembra que as criptomoedas e os activos dixitais están cada vez máis presentes no día a día, “mais a información que os consumidores reciben non é precisa nin instrutiva”. E engaden: “Na actualidade, arredor de catro millóns de españois invisten nalgún tipo de criptoactivo, sendo escasa a educación financeira da gran maioría. Un exemplo moi claro disto é que case un setenta por cento das persoas que apostaron polas cripotomoedas pensaban que era un produto supervisado pola CNMV (Comisión Nacional de Mercados de Valores). De feito, este órgano supervisor lanzou máis dun aviso recordando que un dos principais riscos nestes investimentos, precisamente, é que non están controladas nin reguladas por ningunha autoridade central, nin estatal, nin europea, nin a nivel mundial”.
O regulamento sobre criptomoedas vaise perfilando en medidas como a regulación da súa publicidade, tributación, posesión, etc. A Comisión Europea presentou en 2020 unha proposta lexislativa sobre criptomoedas e as autoridades anunciaron a súa intención de regular a materia, pero un gran número de consumidores seguen sen saber en que consisten, expoñéndose con isto a estafas, publicidade enganosa e máis riscos que estas supoñen para os pequenos inversores.

A Aula Newton da Tecnópole completa as súas prazas para os centros de Secundaria

Anxo Sesto — 2022-05-06T08:00:00Z

Os centros de Educación Secundaria de Galicia amosaron un elevado interese por participar nas actividades da Aula Newton, localizada no Parque Tecnolóxico de Galicia – Tecnópole (Ourense), o que propiciou que as 21 sesións previstas ata o mes de xuño teñan xa pendurado o cartel de completo para o presente curso escolar.
A Aula Newton Galicia foi inaugurada o 19 de outubro de 2021 e é a única en España. Está dirixida a estudantes de 3º e 4º da ESO e ofrece unha formación en Ciencia, Tecnoloxía, Enxeñería e Matemáticas (siglas de STEM) mediante dinámicas de grupo nas que os estudantes reflexionan, exploran, debaten e colaboran en materias STEM.
Na Aula, que está aberta os venres durante o curso escolar de 10:00 a 14:15 horas, desenvólvense as actividades de Voando con números: unha aventura aérea, que trata sobre unha misión de rescate a través dun plan de voo e simuladores avanzados; e outra actividade complementaria de iniciación ao voo e construción de drons. No primeiro trimestre de actividade da Aula Newton Galicia participaron nas sesións preto de 300 alumnos e alumnas de 9 centros de secundaria galegos. Esta é unha iniciativa pioneira en España que se enmarca no programa autonómico de fomento de vocacións científico-tecnolóxicas Voando alto, sumando vocacións, no que colaboran Boeing e a Xunta de Galicia.
O concepto Newton foi desenvolvido por First Scandinavia e céntrase en que o maior número posíbel de nenos e nenas vivan unha experiencia agradable e gocen dunha sensación de dominio nas materias de ciencias.

Un 80% das persoas que teletraballan preferirían facelo con máis frecuencia

Anxo Sesto — 2022-05-05T08:30:00Z

O Observatorio Nacional de Tecnoloxía e Sociedade (ONTSI) publicou este 4 de maio o informe Flash: Radiografía do traballo a distancia. Nel analízase a evolución do teletraballo en España e céntrase en coñecer as fendas que existen nesta modalidade laboral, así como as preferencias e posibilidades da sociedade española.
O 35% das persoas empregadas en España teñen dispoñibilidade para traballar a distancia uns poucos ou todos os días da semana. Esta modalidade de traballo é ben acollida pola poboación xa que o 78,5% dos que o poden facer piden que se lles amplíe a catro ou máis días á semana.
Non todos os traballos permiten a modalidade a distancia, mais arredor do 80% dos empregos da sector da información, financeiro e comunicacións, permiten o teletraballo. Pola contra, nos sectores primarios e secundarios hai menos labores que poidan facerse a distancia. Tamén existe unha diferenza no que respecta ás comunidades, sendo Ceuta, Cataluña, País Vasco e Madrid as autonomías onde máis se da esta modalidade.
O salario tamén parece abrir unha fenda; os empregados e postos con maior retribución mensual son tamén os que máis posibilidades de teletraballo ofrecen. Das persoas que perciben menos de 1.600 euros ao mes, só o 18,7% poden facelo; aumentan as posibilidades ata case a metade segundo sube a franxa salarial aos 2.500 e 3.000 euros; chegando ata o 60,6% con salarios maiores desa cifra. Por niveis de estudos tamén existen diferenzas: só a un 24% das persoas con bacharelato se lles permite teletraballar, reducíndose a un 6% para quen teñen estudos inferiores á secundaria. Nas FP o dato vai ata o 37,4%, na Universidade ao 54,4% e sobe a un 87,3% nas persoas cun doutorado. No que respecta ás preferencias, atopamos que os fogares monoparentais, as persoas viúvas e as mulleres divorciadas preferirían aumentar o número de días que teletraballan.

O CCG sube á Rede o arquivo completo da revista Teima

Anxo Sesto — 2022-05-03T20:24:45Z

O Consello de Cultura Galega pon a disposición da cidadanía un especial que incorpora os 35 números que conforman a historia da Teima. Unha publicación que se presentou “co obxectivo de informar e analizar criticamente o que preocupa a tódolos homes de Galicia”. Na presentación recoñecían no editorial que “faltaba un medio, unha revista pensada e redactada en galego, que presentase, sintetizase e analizase as diferentes caras das realidades galegas”.
Alén do arquivo completo do semanario, o especial inclúe Teima, case medio século despois, no que Ánxel Vence, antigo director da revista, indica que “foron moitos os que teimaron aquela Teima. Entre os pais fundadores figuraban Carlos Casares, Xosé Manuel Beiras, Daniel Pino, Xan López Facal...” No número de agosto de 1977, período marcado pola axitación política e social tralo remate da ditadura franquista, Teima sacaba do prelo o número 35 que remataba o seu editorial con estas verbas: “A Historia está do lado dos que cremos que inevitablemente haberá un mañá de liberdade, pese a accidentes tan cativos como a posible caída deste semanario. Galicia perde unha voz, e nada mais. Non termos presa”.
Este Proxecto Hemerográfico da dixitalización de publicacións insírese dentro dunha liña de traballo do Consello da Cultura Galega que xa publicou tamén a edición completa de A Nosa Terra e o proxecto Repertorio de prensa da emigración, que cada terceiro xoves de mes difunde novas cabeceiras xurdidas da man de sociedades galegas fundadas na emigración.

Comezou o #RetoEmprego30Días coa influencer Eva Porto

Anxo Sesto — 2022-05-02T08:00:00Z

Máis de 11.000 persoas tomaron parte no #RetoEmprego30Días promovido pola Xunta de Galicia (Consellería de Emprego) en colaboración coa experta galega en recursos humanos e influencer Eva Porto, co obxectivo de contribuír á súa empregabilidade con desafíos diarios de 15 minutos durante un mes. O programa é gratuíto para as persoas participantes, comezou este vindeiro 1 de maio, será en liña e rematará o 30 deste mes.
Entre outras temáticas, o programa incluirá tanto retos sobre currículum vitae, entrevistas de traballo, uso de Linkedin e portais de emprego; como un servizo de orientación laboral que formará ás persoas participantes sobre chaves de éxito na busca de emprego ou a resistencia perante á adversidade.
O desafío vén da man da Xunta de Galicia a través da Fundación Pública Galega de Formación para o traballo e da influencer Eva Porto, que o pasado xaneiro comezou o programa con máis de 13.000 persoas inscritas que amosaron unha satisfacción case máxima. O Goberno galego promociona, a través deste modelo orixinal e adaptado ás novas linguaxes, as chaves para acceder e destacar nun emprego, nun momento no que as demandas de man de obra se atopan en continua evolución.