Código Cero - Diario Tecnolóxico de Galicia

Abertas as inscricións para os obradoiros da nova edición de Carballo Interplay

Sandra Rivadulla — 2021-07-27T16:00:00Z

O Festival de Contidos Dixitais Carballo Interplay celebrará a súa oitava edición do 8 ao 11 de setembro. As inscricións para o seu programa formativo xa están abertas dende este 27 de xullo.
Nesta ocasión, o Festival inclúe un Taller Kamikaze de creatividade audiovisual "extrema" de tres días completos para 12 persoas e un obradoiro de creación de contido dixital para as xeracións Y e Z con responsábeis do medio de alcance global Freeda. Esta actividade celebrarase o xoves 9 de setembro de 17:00 a 20:00 no Pazo da Cultura de Carballo e nela poderán participar un máximo de 20 persoas.
A experiencia audiovisual kamikaze quedará reservada para os días 30 e 31 agosto e 1 setembro, en horario intensivo de 10:00 a 20:00 horas. As persoas que participen no obradoiro deberán idear, gravar e postproducir capítulos de serie Dinosauro, os cales se estrearán unha semana máis tarde no festival. A este acto virán profesionais do sector como Alfonso Zarauza, Lucía Regueiro, Antón Varela, Iago López, Leticia T. Blanco ou Javi Camino. Os interesados poderán preinscribirse antes do 16 agosto.
Pola súa parte, o 9 de setembro, as directoras de contidos de Freeda: Raquel García Trigueros e Clara Amechazurra Falagán, ofrecerán un obradoiro de 3 horas de duración sobre a creación de contido dixital para as xeracións Y e Z. As persoas que participen neste obradoiro coñecerán todos os recursos que emprega Freeda para crear o contido inspiracional e feminista que difunde a través das redes sociais. Os interesados nesta formación, poderán inscribirse antes do 23 de agosto.
Cómpre mencionar, que na súa oitava edición, o festival pretende dotar con 3.000 euros ao ganador do premio do mellor proxecto de webserie en galego. A data límite para presentarse a esta actividade é este sábado, 31 de xullo. Os proxectos deben ser creacións audiovisuais propias e orixinais.

Telefónica modernizará as redes de comunicación de Nueva Pescanova

Sandra Rivadulla — 2021-07-27T15:00:00Z

Telefónica modernizará as redes de comunicación de Nueva Pescanova, unha das grandes empresas pesqueiras de Vigo e do territorio galego e estatal. En concreto, a operadora de telecomunicacións levará a cabo unha virtualización integral de todas as redes da compañía de alimentación.
Así, estas redes poderán xestionarse en remoto, aumentar a súa eficiencia e dispoñer de múltiples funcionalidades automatizadas. O obxectivo consiste en realizar este traballo en 16 sedes que Pescanova ten en España.
Cómpre mencionar que Nueva Pescanova, conta con máis de 900 millóns de euros de facturación, 10.000 empregados traballando en catro continentes e máis de 60 buques faenando no hemisferio sur. Polo tanto, a adxudicación a Telefónica das súas redes de comunicación prodúcese despois de gañar o concurso aberto pola multinacional pesqueira.

Telefónica e Pontevedra xuntan forzas a prol da empregabilidade dixital

Sandra Rivadulla — 2021-07-21T20:05:33Z


Detalla da fachada do Consistorio antigo de Pontevedra

A Fundación Telefónica e o Concello de Pontevedra asina ron un acordo para fomentar a especialización nos perfís máis demandados do mercado laboral actual. Deseñador web ou especialista en mercadotecnia (marketing) dixital son algunhas das profesións máis demandadas en Pontevedra, segundo os datos das principais bolsas de emprego.
Así, ambas institucións avanzan un paso máis para afrontar os novos desafíos da sociedade e orientarse cara o sector dixital. Desta forma, o alcalde da localidade, Miguel Anxo Fernández Lores, sinalou que “o acordo que presentan é o primeiro paso dunha colaboración longa e frutífera”. Do mesmo xeito, Joan Cruz, de Fundación Telefónica, afirma que “levan moitos anos traballando pola mellora da empregabilidade a través de competencias dixitais, que son ferramentas clave para contribuír a reactivar a economía e xerar emprego”.
Por medio do programa de formación dixital e gratuíto, Conecta Emprego, calquera persoa interesada en deseño e programación poderá mellorar as súas competencias tecnolóxicas en programación, deseño de videoxogos, desenvolvemento de páxinas web en Wordpress e creación de contidos dixitais. A duración do curso será de entre 20 e 40 horas. Ademais, estes contan con actividades prácticas.
Cómpre mencionar que o programa xa beneficiou durante 2020 a 204.880 persoas de 9 países, alcanzando case os 3 millóns de horas de formación impartidas. En España, os beneficiarios foron 51.478, cifra que se prevé aumentar este ano.
Polo momento, as inscricións xa están abertas e dispoñibles ata o 30 de setembro de 2021. Non obstante, Conecta ten dúas ferramentas dixitais de asesoramento profesional gratuítas, o Mapa do Emprego e o Orientador Profesional Virtual para traballar de maneira personalizada.

O plan de fibra óptica de Mos xa achegou cobertura aos cen primeiros domicilios

Sandra Rivadulla — 2021-07-20T18:00:00Z

O Concello de Mos informou dos novos avances dados no termo municipal en materia de implantación de fibra óptica avanzada, avances que implican, en palabras do Goberno local, “o desbloqueo da problemática na implantación do Internet de banda longa por parte da operadora R no municipio”. Así o informaron a alcaldesa de Mos, Nidia Arévalo, e o concelleiro de Novas Tecnoloxías, Leo Costas, quen se achegaron ata algunha das vivendas recentemente conectadas para consultar cos/as beneficiarios/as a satisfacción ante o servizo.
A conexión destes domicilios é froito dos traballos desenvolvidos en maio e xuño por parte de R, que deron coberura ás 100 primeiras vivendas do programa de extensión da banda larga de nova xeración en Mos. A estas cen residencias iranse engadindo outras ao longo dos meses vindeiros, até completar un programa que inclúe 2.200 vivendas e 6.000 habitantes.
Estes primeiros 100 domicilios dotados de servizo de conexión á Internet de banda larga distribúense por diferentes zonas dalgúns dos barrios das parroquias de Cela, Pereiras e Tameiga. En Cela realizouse instalación en zonas dos barrios de Atín e Arufe, en Pereiras nalgunhas zonas dos barrios de Roublín, Casal, Casalmorto e Campo de Eiró. E na parroquia de Tameiga en Puxeiros, ao inicio da Estrada Generoso Domínguez.
A finais de verán quedará acometida outra gran parte da instalación que permitirá conectarse a máis de 500 vivendas. Mes a mes iranse producindo ampliacións de rede e instalación de novos tramos de fibra.
Rexedora local e concelleiro informaron de que Telefónica está a traballando paralelamente. Agora mesmo, sinalaron, esta operadora atópase traballando en Louriñó, parroquia de Torroso, realizando labores de preparación da liña para logo instalala. Nidia Arévalo e Leo Costas remataron animando á poboación a que se conecte se así o desexa á fibra óptica e que, se queren máis información ou teñen dúbidas ao respecto, se acheguen ata o Concello onde se lles atenderá aportándolles todos os detalles que precisen.

Compartaxi, a aplicación para compartir taxi, xa está dispoñíbel en Vigo

Sandra Rivadulla — 2021-07-15T20:37:44Z

Compartaxi, a aplicación para compartir taxi, xa está dispoñíbel en Vigo. A ferramenta será presentada tamén na Coruña este venres 16 de xullo.
En termos xerais, a ferramenta para dispositivos Compartaxi permite tanto pedir como compartir un taxi, abaratando o seu custo. O alcalde da cidade viguesa, Abel Caballero, destacou na presentación do desembarco na localidade da ferramenta “a importancia dun modelo moderno e distinto de prestar un servizo no que se aproveita máis o espazo e se abarata para os usuarios, ao tempo que posibilita aumentar o traballo”.
O alcalde explicou o papel “primordial” do taxi na cidade e dedicou unhas verbas a Manuel Chorén – presidente ata entón da Central Radio Taxi-, a quen definiu como “un home de gran importancia nesta cidade, polo seu traballo e a forma de dirixir unha profesión tan importante”. Doutra banda, os promotores sinalaron á cidade de Vigo coma una das cidades punteiras de España para levar a cabo negocios de esta índole.

O Carballo Interplay recupera a xornada profesional con Portugal como país convidado

Sandra Rivadulla — 2021-07-14T11:50:48Z

O Carballo Interplay, que celebrará a súa oitava edición do 8 ao 11 de setembro, recupera a programación profesional (o Día PRO) con Portugal como país convidado. Así, o Festival de Contidos Dixitais da vila bergantiñá pretende abrir espazos de diálogo e fomentar alianzas entre creadoras/es, produtoras e plataformas de Portugal, Galicia e España.
O Día PRO do Interplay 2021 será o venres 10 de setembro no Pazo da Cultura de Carballo. A xornada estará dividida en dúas partes: haberá presentacións e debates e, a maiores, establecerase un punto de encontro para que creadoras/es, empresas produtoras das diferentes comunidades e países.
En xeral, participarán persoas coñecidas no ámbito das telecomunicacións. Destacan, por exemplo, Alberto Fernández, director de contidos dixitais de RTVE; Raquel García Trigueros, directora de contidos e marketing en Freeda España, Clara Amechazurra Falagán, directora de contidos en Freeda España, Rogério Gomes, xestor de proxecto en RTP Lab, e José Pereira, director da área de Innovación e Negocio da CRTVG.
Cabe mencionar que á última hora da mañá, participarán nos coloquios distintas produtoras e creadores de contidos dixitais de Portugal (convidados ao Carballo Interplay coa colaboración do Clúster Audiovisual de Galicia). Estes presentarán as súas apostas de presente e futuro. Ademais, á primeira hora da tarde, a directora de política audiovisual da AGADIC, Dolores Meijomín, explicará o seu programa anual de subvencións, que consiste nunha liña de axuda a proxectos de webserie en versión orixinal galega.
O encontro PRO comezará ás 16:30 horas. Nel, os creadores de contido poderán presentar os seus proxectos a produtoras e distribuidoras galegas, españolas e portuguesas como RTP Lab, CRTVG, Playz (RTVE), Freeda, Gaita Filmes, Abano Producións, Miramemira, Maruxiña Film Company, Cósmica Producións, Portocabo, VOZ Audiovisual, Promenade, Galo Bravo, PiXbee, MT 360 / ManyTakes, Wonder Maria Films, Ankylosaur ou Todos.
As persoas interesadas en participar neste último espazo de encontro poden facelo de xeito gratuíto a través do formulario, antes do 16 de agosto. Os demais poden solicitar a súa acreditación ata o 31 de agosto. O festival contará cun premio de 3.000 euros para a produción de tres vídeos da serie do proxecto premiado.

Dodro, Rois e Padrón formarán a mocidade local en elaboración de páxinas web

Sandra Rivadulla — 2021-07-07T11:10:35Z

Os Concellos de Dodro, Rois e Padrón organizan un obradoiro de emprego xuventude 2021, unha formación que pon o foco nun ámbito de gran importancia no mercado laboral e empresarial: a elaboración de páxinas web.
O obradoiro de emprego Xuventude en Acción 2021 está financiado pola Consellería de Emprego e Igualdade e a Unión Europea, a través do Fondo Social Europeo, Programa Operativo de Emprego Xuvenil.
O obxectivo consiste en facilitar a incorporación ao mercado laboral de mozos e mozas de entre 18 e 30 anos que estean desempregados. Os tres concellos promoven o obradoiro, co fin de formar a 15 alumnos/as traballadores durante un ano na confección e publicación de páxinas web.
Os máis novos deben estar inscritos no Programa de Garantía Xuvenil e no Servizo de Emprego Público cos códigos 340, 320 e 370. De feito, o alumnado deberá ter o Graduado de ESO ou o certificado de Competencias clave de nivel 2 e estar censado en Rois, Padrón ou Dodro.
O prazo para inscribirse no Servizo Público de Emprego con estes códigos remata 8 de xullo de 2021

As pinturas rupestres de Penedo Gordo e Penedo do Gato-Lobarzán xa se poden visitar virtualmente

Sandra Rivadulla — 2021-07-05T15:30:00Z

As pinturas rupestres esquemáticas prehistóricas situadas en Penedo Gordo e Penedo do Gato-Lobarzán (Ourense) xa se poden visitar virtualmente. Para iso, un equipo multidisciplinar da Universidade de Vigo lanza unha plataforma en liña que integra múltiples recursos que permiten somerxerse no coñecemento destes xacementos.
A iniciativa, realizada no marco do proxecto Inou 2020 PreMedia. Creación dun contorno virtual para a interpretación patrimonial de sitios con pintura rupestre esquemática da comarca de Monterrei, estivo financiada pola Universidade de Vigo e a Deputación de Ourense, ademais de colaborar coa DXXG. Esta comprende dúas liñas de traballo. Dunha banda, aparece PreMedia 1, coordinada por Beatriz Comendador, profesora da Facultade de Historia, mentres que doutro, créase PreMedia 2, liderada por Fátima Braña, profesora da Área de Antropoloxía Social e Cultural.
Beatriz Comendador explica que o obxectivo é “difundir dous enclaves do val do Támega dende a UVigo, localizados fóra do ámbito xeográfico tradicionalmente tratado nos estudos sobre a arte rupestre galega, peninsular e europea, mediante visitas virtuais con diversos recursos interpretativos”. Ademais, engade que “pénsase que será de utilidade para todas as persoas que queiran coñecer estes lugares e achegarse ás manifestacións de pintura rupestre, xa que poden acceder de xeito doado dende os seus dispositivos e explorar os lugares e os contidos divulgativos, decidindo que queren ver e canto tempo dedicarlle. Tamén pode ser de grande utilidade para facer percorridos virtuais dende os centros educativos”.
No caso do Penedo Gordo, a plataforma integrouse a información xerada na intervención arqueolóxica de 2018-2019, financiada pola Xunta de Galicia. Sen embargo, en canto a Lobarzán, fíxose unha intervención específica de limpeza e documentación e integrouse o levantamento topográfico feito polo Clube de Espeleoloxía A Trapa (Cetra) en 2019.
En xeral, optouse por xerar un contorno de accesibilidade en liña multiplataforma que integrase tanto os recursos de carácter interpretativo derivados da propia documentación arqueolóxica dos sitios (fotografías/fotogrametrías tratadas e calcos) coma os elementos novos xerados para a visita virtual (fotografías 360º de bóveda completa e voos de dron). Tamén creáronse textos en galego e en castelán coa información dos puntos da visita e outras informacións sobre os depósitos arqueolóxicos asociados, non visíbeis alí. A maiores, enriqueceuse a plataforma coa incorporación de breves imaxes animadas xeradas expresamente para evocar diferentes momentos temporais dos lugares recollidos e creáronse contidos musicais específicos.

As nosas universidades impulsan a transformación da mobilidade urbana en sustentábel e intelixente

Sandra Rivadulla — 2021-07-05T14:30:00Z

O proxecto MaGIST pretende diminuír o impacto ambiental, facendo máis sustentábel a mobilidade urbana. Para acadalo está a mobilizar os sistemas intelixentes de transporte que desenvolven investigadores da USC, UVigo, UDC e da Universidade Carlos III de Madrid. Segundo explican, “os problemas relacionados co tráfico rodado son unha das maiores preocupacións nas cidades, e por tanto retos chave dos Sistemas Intelixentes de Transporte (ITS) urbano modernos”.
O obxectivo do proxecto MaGIST (Almacenamento e procesado de datos xeoespaciais masivos para o transporte urbano intelixente e sustentábel) consiste en definir a arquitectura dun sistema intelixente de transporte urbano que permita a incorporación continua de datos e conte con procesos de aprendizaxe automática, co fin de predicir os fluxos do tráfico ou detectar aquelas zonas do espazo urbano nas que exista unha “degradación de activos” que poida afectar á mobilidade.

Labor do grupo GeoTECH

Co catedrático da Escola de Enxeñaría Forestal Henrique Lorenzo como investigador principal, o grupo GeoTECH (Universidade de Vigo) responsabilizase do subproxecto MaGIST-ERIUM: Intelixencia xeoespacial como soporte á toma de decisións en mobilidade urbana. Este céntrase, por unha banda, no desenvolvemento dun sistema de procesado de datos xeoespaciais e “técnicas de aprendizaxe automática” que permitan “obter medidas da degradación de activos” de infraestruturas relevantes para o transporte, como pavimento ou sinalizacións.
Por outra banda, nunha segunda liña de traballo, o grupo que integran investigadores da Escola de Enxeñería Industrial e da EE Forestal (UVigo) deseñará unha metodoloxía para a caracterización topográfica das “zonas navegábeis” da contorna urbana, o que permitiría a este sistema de transporte intelixente definir “redes de navegación adaptadas a cada modo de mobilidade”. Estes dous obxectivos atópanse así mesmo vinculados ao inicio de dúas teses de doutoramento por investigadores do grupo.
En liñas xerais, sinalan desde o grupo GeoTECH, un sistema intelixente de transporte urbano persegue a “xestión integral do tráfico nunha cidade, optimizando as capacidades existentes e os niveis de servizo”. Coordinado polo Laboratorio de Bases de Datos da UDC, no proxecto coordinado MaGIST, que se estende ata 2023, participan tamén os grupos de investigación en Gráficos por Computador e Enxeñaría de Datos da USC e de Aplicacións e Servizos Telemáticos da Universidade Carlos III.
O seu obxectivo é deseñar un sistema de transporte “eficiente e sustentábel”, actuando a varios niveis e agrupando os resultados dos diferentes subproxectos nunha aplicación móbil e nun “panel de control”, que contribúa á toma de decisións por parte dos xestores públicos, a través da incorporación de datos de tempo real e da “exploración analítica” dos rexistros de eventos previos, de tal xeito que permita analizar tanto datos “que reflicten cambios lentos” na cidade, “como fluxos de información altamente cambiantes”.
Nese senso, proxéctase unha actuación a varios niveis, que abranga a monitoraxe e predición do tráfico e do seu impacto ambiental, tendo en conta que constitúe un dos principais causantes de emisións de óxidos de nitróxeno nas áreas urbanas, así como a definición de “rutas multimodais” que combinen o transporte público “con outros modos de desprazamento” e que se optimizarían seguindo as predicións do tráfico e da calidade do aire. Un terceiro eixo céntrase no seguimento da degradación das infraestruturas, que é un dos obxectivos do subproxecto que coordina Lorenzo.

MaGIST-ELA


Empregando unha aplicación para consultar detalles do tráfico / Imaxe de Santi Alvite (USC)

MaGIST-ELA é outro dos subproxectos, que colle corpo baixo o epígrafe Xeoprocesamento a gran escala para análise exploratorio e baseado na aprendizaxe, cuxos investigadores principais son os profesores da USC José Manuel Cotos Yáñez e José Ramón Ríos Viqueira. O obxectivo principal de MaGIST-ELA é o desenvolvemento de técnicas eficientes de procesamento de consultas sobre data lakes heteroxéneos moi grandes—repositorios de almacenamento centralizado que conteñen Big Data de varias fontes nun formato granular e sen procesar— e a súa aplicación para a resolución da análise xeoespacial.
MaGIST-ELA utilizará a aprendizaxe automática para a monitoraxe e a predición de fluxos de tráfico, e para o seguimento e predición da calidade do aire. A aprendizaxe automática utilizarase tamén para estimar a degradación do pavimento a partir de datos obtidos de dispositivos móbiles. A continuación, deseñaranse técnicas de almacenamento e procesamento aproximado para dar soporte á análise exploratoria de fontes xeoespaciais. Finalmente, aplicará a aprendizaxe automática sobre datos vectoriais e raster mediante o procesamento de conxuntos de consultas.

O CPEIG e o Consello Económico e Social asinaron un convenio de colaboración

Sandra Rivadulla — 2021-07-02T15:00:00Z

O Colexio Profesional de Enxeñaría en Informática de Galicia e o Consello Económico e Social de Galicia asinaron un convenio de colaboración. O acordo, que ten como vixencia un ano, foi formalizado polos presidentes de ambas institucións, Fernando Suárez do CPEIG e Agustín Hernández do CES- Galicia.
O obxectivo é que ambas entidades actúen da forma máis eficaz e eficiente na utilización dos medios humanos, materiais e organizativas de cada unha delas, co fin de beneficiar á cidadanía e a sociedade galega. Así, a colaboración permitirá realizar de maneira conxunta cursos, xornadas, seminarios e outras actividades de divulgación, como a edición de libros e documentos de traballo, ademais de promover a actividade investigadora de ambas as dúas institución.
O presidente do CPEIG, Fernando Suárez, “valora de forma moi positiva este acordo para ambas entidades. De feito, considera que “para o CPEIG é moi importante colaborar cunha entidade como o CES” e tamén destaca que “esta unión é unha mostra da evolución da sociedade, tanto a nivel social como económico”, xa que o impacto que está tendo a dixitalización en todo os sectores posibilita que o CPEIG sexa un actor destacado para colaborar á hora de chegar a todo o ecosistema galego –empresarial, administrativo ou cultural–. Doutra banda, o presidente sinala que este “convenio abre as portas para dar a coñecer o impacto da tecnoloxía en Galicia e permite sentar as bases para que a comunidade poida ser máis dixital e un pouco máis integradora e transparente”.