Código Cero - Diario Tecnolóxico de Galicia

A Deputación da Coruña reforza o servizo de Teleasistencia

Ana Rial — 2020-03-20T13:01:55Z

A Deputación da Coruña reforza estes días o contacto coas 2.483 persoas maiores da provincia que hoxe en día son usuarias da Teleasistencia da entidade provincial, un servizo que afirman “estar funcionando con normalidade”, aínda que cun “especial esforzo” no contacto periódico cos beneficiarios e beneficiarias para verificar o seu estado de saúde e transmitir información sobre a importancia de manter determinadas normas hixiénico-sanitarias e de distanciamento social que contribúan a frear a propagación do coronavirus.
O presidente da institución provincial, Valentín González Formoso, manifestou que “o servizo de Teleasistencia da Deputación está funcionando a pleno rendemento para dar tranquilidade aos nosos maiores que viven sós e ás súas familias, que saben que teñen a alguén ao outro lado do botón vermello as 24 horas do día, os 365 días do ano” e expresou o seu agradecemento aos traballadores e traballadoras polo “importante labor que están desempeñando para acompañar os maiores coruñeses durante esta crise sanitaria.”
O goberno provincial lembra que aínda é posible tramitar novas altas no servizo de Teleasistencia que a Deputación da Coruña presta de xeito gratuíto nos concellos con menos de 50.000 habitantes. As novas altas tramitaranse a través dos Servizos Sociais municipais, en base ás circunstancias sociais e persoais da nova usuaria ou usuario.

Sanidade dispón dun autotest con información sobre o coronavirus na web so SERGAS

Ana Rial — 2020-03-16T17:00:00Z

A Consellería de Sanidade vén de publicar, a través da páxina web do Coronavirus, que o Servizo Galego de Saúde dedica de xeito exclusivo ao coronavirus un autotest para que a cidadanía poida consultar síntomas e resolver dúbidas relacionadas con esta enfermidade.
Coa posta en marcha deste test interactivo, elaborado por persoal sanitario, manifestan que “proporciónase á poboación un sistema áxil e inmediato no que atopar información actualizada sobre cuestións relacionadas co coronavirus.” Ademais apuntan que, o feito de que o test personalice as respostas a través de preguntas concretas, “permite ofrecer recomendacións adaptadas á situación particular de cada persoa.”
O test, que está dispoñible en galego e castelán, presenta catro entradas que formulan as diferentes situacións que poden estar a vivir as persoas que o realizan, así como información sobre as dúbidas máis frecuentes acerca de temas relacionados co coronavirus. No primeiro lugar está a opción para as persoas que teñan síntomas e que estean preocupadas porque cren que poida deberse ao COVID-19. Mediante o recoñecemento dos síntomas que presenta a persoa (tose, dificultade para respirar, febre maior de 38 graos ou sen síntomas) e dun sinxelo interrogatorio danse recomendacións ou indícase como acceder ao sistema sanitario para que sexa atendido por profesionais sanitarios.
A segunda entrada é para aqueles que se atopan illados ou confinados na casa. Neste caso, proporciónanse unha serie de indicacións sobre o que deben facer mentres permanezan na súa vivenda. Tamén se precisa o que deben facer no caso de que estean pendentes de que se lle tomen as mostras para saber se están contaxiados, se están á espera dos resultados das mesmas ou se empeorou a súa clínica desde o confinamento.
A terceira entrada informa a aqueles que deran positivo nesta enfermidade e ofrece as recomendacións a seguir mestres estean confinados ou no caso de que a súa clínica empeorase desde que permanecen no domicilio.
Por último, a cuarta entrada ofrece información sobre as dúbidas máis frecuentes acerca de temas relacionados co COVID-19.
Esta nova ferramenta de información e consulta súmase a outras iniciativas relacionadas coa atención a esta enfermidade, xa postas en marcha desde Consellería de Sanidade, coma o teléfono gratuíto 900400116 que nestes días incrementou a súa demanda asistencial ata nun 60%.
A Consellería de Sanidade solicita, unha vez máis, que se empregue o número 061 só para emerxencias ou casos graves e aconsella chamar aos centros de saúde ou utilizar o referido número gratuíto, que vén de ser reforzado con máis persoal, para facilitar información xeral sobre o coronavirus. Neste número, pódense resolver as dúbidas dos cidadáns ao respecto e tamén consultar sintomatoloxía leve.

O Concello de Ribeira avanza na dixitalización de diversos trámites para a veciñanza

Ana Rial — 2020-03-06T09:30:00Z

A cidadanía ribeirense xa pode consultar online os seus recibos e, incluso, no caso de que non os teñan domiciliados, pagalos sen necesidade de acudir ao Consistorio ou a unha entidade financeira cunha simple tarxeta bancaria de débito ou crédito. Esta foi unha das principais novidades dadas a coñecer por parte da concelleira de Innovación Tecnolóxica e Transparencia, Ana Barreiro, quen explicou os avances que se están impulsando desde o Concello en materia de administración electrónica e sustentable.
Para tal fin, xa está habilitada na páxina web www.ribeira.gal un novo apartado denominado Os teus recibos a 1 click, mediante o cal os contribuíntes poden acceder e consultar o estado dos seus impostos de vehículos, lixo, auga e sumidoiros introducindo unha serie de campos como DNI/CIF ou o número de recibo e o seu importe, datos estes últimos que se poden obter na documentación que remiten os bancos. Deste xeito, non se require autenticación con certificado dixital ou DNI electrónico.
No que respecta aos recibos non domiciliados, poden abonarse telematicamente a través deste mesmo sistema ao incluír unha pasarela de pago que permite cumprimentar este trámite, calquera día da semana e a calquera hora, da mesma forma que se merca nunha tenda online.
Así mesmo, o referido apartado posibilita o pago de recibos que están en recadación executiva, tales coma multas, sancións, etcétera.
Por outra banda, dirixido a persoas que teñen dificultades á hora de manexarse por Internet, a concelleira explicou que, acudindo á Oficina de Atención Cidadá situada no andar baixo do Consistorio, persoal municipal encargarase de asistir presencialmente aos usuarios neste labor. Cómpre lembrar, que cada cuadrimestre se organizan cursos gratuítos de alfabetización dixital encamiñados a acurtar a chamada ‘fenda dixital'.
Ao fío do anuncio destas novas prestacións, Ana Barreiro comunicou que se deixarán de enviar aos fogares os recibos en papel destes tributos, contribuíndo a reducir a pegada de carbono ao eliminar unhas 50.000 impresións anuais e aforrando ao redor de 30.000 euros das arcas públicas.
A edil tamén se referiu a outros avances coma a posibilidade de xestionar, calcular e pagar autoliquidacións a través da sede electrónica: prezo público de actividades culturais, cambio de titularidade en aperturas, escola municipal de música, dereitos de exame, expedición de documentos, ICIO, informacións urbanísticas, licencias de primeira utilización, expedición de licencias de taxi e de cemiterio, uso de instalacións deportivas e taxa por ocupación de subsolo, solo e voo, etcétera.
Outra das novidades ten que ver co pago a provedores porque, tal e como precisou, en aras á transparencia e á seguridade xurídica, os mesmos poden coñecer mediante un click a rastrexabilidade total do gasto desde que se detecta a necesidade ata o pago final. O sistema funciona mediante un circuíto de firmas automatizado polos responsables municipais autorizados, supoñendo un aforro de tempo e unha redución en papel coa conseguinte diminución da pegada de carbono. Cómpre salientar a este respecto que o Concello tramita unhas 5.000 facturas anuais, ao que hai que engadir toda a tramitación previa a cada unha delas: presentación de orzamentos, elaboración de propostas e resolución, entre outras.
Finalmente, a concelleira anunciou que se está traballando noutras futuras accións encamiñadas á transformación dixital coma, por exemplo, a elaboración dunha nova app ou as pantallas informativas que se van instalar en seis puntos do municipio.

A Xunta apoia o proxecto de fábrica intelixente de CONGALSA

Ana Rial — 2020-03-03T21:32:45Z

O conselleiro de Economía, Francisco Conde, visitou este martes as instalacións de CONGALSA na Pobra do Caramiñal, acompañado da directora da Axencia Galega de Innovación-GAIN, Patricia Argerey. Ambos foron recibidos polo director xeral da compañía, Luis Miguel Simarro, e a directora de RREE, Isabel Cañas. Con esta visita, o titular de Industria apoia o proxecto de fábrica intelixente da empresa, denominado Congals4.0, o cal se desenvolverá ata o 2022.
De feito, CONGALSA converteuse nunha das empresas seleccionadas pola Xunta no marco da terceira edición do Programa Fábrica Intelixente, cuxo obxectivo radica en favorecer o avance do tecido industrial galego cara un modelo 4.0. Neste senso, a compañía levará a cabo o seu proxecto en colaboración co Centro Tecnolóxico de Telecomunicacións de Galicia (Gradiant) ao amparo dunha convocatoria subvencionada e impulsada por GAIN, axencia dependente da Consellería de Economía, Emprego e Industria, e co-financiada con cargo a fondos europeos FEDER.
Durante a visita, Luis Miguel Simarro afirmou que a empresa está preparada para “deseñar e consolidar un modelo industrial 4.0 que consiga a maior flexibilidade e transparencia nun entorno e nun sector en constante cambio e hiperconectado.” Máis polo miúdo, o proxecto contribuirá á empresa a converterse nun dos tractores do cambio, cara un modelo fabril intelixente, no sector alimentario galego.
Pola súa parte, Francisco Conde apuntou que, xunto con Gradiant, no marco deste programa CONGALSA está a desenvolver un proxecto para converter as súas instalacións nunha fábrica máis flexible, automatizada e con tecnoloxías que permitan obter datos en tempo real. Conta cun orzamento de 4'9 millóns de euros e nel traballan 19 profesionais; tres dos cales son de nova contratación por parte de CONGALSA. Conde tamén lembrou que a empresa recibe hoxe mesmo unha mención nos premios RSE polo esforzo que está a facer en favor da conciliación dos seus traballadores e traballadoras.
O conselleiro subliñou que a través da innovación esta empresa trata de achegar valor engadido aos seus produtos para estar á vangarda. E lembrou que a Xunta traballa da súa man noutros programas como a aceleradora BBFood, as Unidades Formativas ou en programas de internacionalización.
Trátase, dixo, dunha das empresas do sector galego da alimentación que mellor exemplifica como a transformación dixital se ten convertido nunha necesidade e, á vez, nunha oportunidade para a mellora de procesos.
CONGALSA é unha das empresas de alimentación líderes do mercado galego. A compañía, especializada na elaboración de produtos precociñados ultraconxelados, pechou 2019 cunha facturación de 83 millóns de euros e mobilizou un total de 24'5 millóns de toneladas de produtos nas súas diferentes gamas. Con presencia en 35 países, recentemente formalizou a adquisición da compañía lusa Sulpasteis para fortalecer a súa expansión internacional.

A Asociación Amicos inaugura en Boiro unha aula dixital con numeroso equipamento tecnolóxico

Ana Rial — 2020-01-27T22:00:00Z

Na xornada deste venres 24 celebrouse en Boiro a inauguración da aula dixital na sede local da Asociación Amicos, un espazo interactivo que se levou a cabo grazas á distinción recibida na pasada edición dos VI Premios Solidarios Cenor electrodomésticos.
No 2018, a referida asociación foi galardoada co denominado Hoyo Solidario, cuarto premio de dita convocatoria. A recadación provén dos asistentes máis solidarios de cada unha das probas do XII Circuíto de Golf Cenor Camino de Santiago, ascendendo a contía a 4.493 euros. A achega correspondente traduciuse na adquisición de diverso material tecnolóxico coa finalidade de constituír esta aula, así como contribuír a mellorar a calidade de vida das persoas con necesidades de apoio. Entre os produtos adquiridos en Cenor electrodomésticos figuran un encerado dixital, unha impresora 3D, un ordenador portátil e coa previsión de acadar dúas tabletas máis.
Durante a xornada os participantes foron testemuñas de como o novo equipamento pode facilitar o día a día das persoas que presentan máis necesidades de apoio. Rosa, unha alumna do Centro de Educación Especial, amosou in situ como deseñar un molde que facilita a autonomía á hora de desenvolver actividades da vida cotiá. Coa impresora 3D pódense crear de forma personalizada e a menor custe pezas coma, por exemplo, culleres, ganchos para botóns ou pictogramas en relevo, as cales facilitan tarefas básicas.

A rapazada participante no Nadal Informático de Ribeira recibiu os seus diplomas

Ana Rial — 2020-01-03T21:30:00Z

A Aula CeMIT de Ribeira acolleu este venres 3 de xaneiro a entrega de diplomas aos 18 rapaces e rapazas que, distribuídos en dous grupos, participaron nestas datas nos cursos do Nadal Informático organizados polo Concello. A concelleira de Innovación Tecnolóxica, Ana Barreiro, acompañada do profesor Manuel Bello, encargouse da entrega destes diplomas e desexou que as clases resultasen do agrado dos asistentes.
Once dos cativos participaron na acción formativa Iníciate na informática, dirixido a alumnado con idades comprendidas entre os 7 e 10 anos; mentres que os outros sete fixeron o propio en Retoca as túas fotos, destinado a estudantes de 11 a 14 anos. Ambos cursos foron totalmente gratuítos e desenvolvéronse do 23 de decembro ao 3 de xaneiro.

O proxecto de cartelería dixital de Ribeira xa recibiu sete ofertas

Ana Rial — 2019-12-05T10:43:57Z

A licitación para o subministro, instalación, conexión, posta en servizo e explotación do vindeiro Sistema de Cartelería Dixital de Ribeira xa foi obxecto da presentación dun total de sete ofertas. Este sistema persegue ofrecer á cidadanía do concello barbanzán información relevante sobre eventos, municipal e turística por medio de seis paneis de alta resolución, tres interiores e tres exteriores. A mesa de contratación está mergullada no proceso de adxudicación deste contrato, que é dos denominados chave en man, para asegurar a realización da entrega totalmente equipada e en perfecto estado de funcionamento. O prezo base de licitación son 116.668'20 euros.
Trátanse de pantallas de información de alta resolución e gran formato, intelixentes e conectadas online mediante un reprodutor multimedia de contidos, con capacidade para transmitir fotos, vídeos, arquivos PDF, son, redes sociais e páxinas HTML, entre outros. Ademais, estes taboleiros dixitais estarán controlados mediante unha Plataforma Software de Control e Xestión de Contidos instalada en cloud, ou sexa na nube.
Con este sistema preténdese dispoñer dunha canle de comunicación para transmitir todo tipo de referencias sobre actividades culturais, campañas, eventos, feiras, lugares de interese para visitar, etcétera; así como emitir información procedente da cidadanía coma, por exemplo, actos de asociacións.
Todo indica que os paneis estableceríanse no interior do Concello, na entrada do mercado municipal e no recibidor do complexo polideportivo da Fieiteira. No que respecta ao exterior, colocaranse nas fachadas do Consistorio e da Sala Museo Municipal, así como no entorno da Oficina Municipal de Turismo.
Así mesmo, as pantallas a subministrar deberán integrarse coa estética dos edificios e do lugar en que se dispoñan.
Esta iniciativa enmárcase dentro da EDUSI Máis Ribeira Atlántica 2020, financiada nun 80% polo Fondo Europeo de Desenvolvemento Rexional (FEDER) dentro do Programa Operativo Plurirrexional de España (POPE) 2014-2020. Adscríbese a liña de actuación deste plan denominada Modernización da Administración e Smart Village Ribeira.

Ribeira presenta a súa programación TIC para Nadal: unha videconferencia con Papá Noel e dous cursos para a rapazada

Ana Rial — 2019-12-04T21:00:20Z

A programación informática de Nadal do Concello de Ribeira regresa por estas datas e, como novidade, este ano a aula CeMIT brindará a posibilidade a 80 nenos e nenas ribeirenses pertencentes a dous centros educativos do municipio de falar por videoconferencia con Papá Noel, que os atenderá desde Laponia unha semana antes da súa visita na Noiteboa. A actividade, que está promovida desde a Xunta de Galicia, terá lugar na mañá do 16 de decembro, agardando desde a Concellería de Innovación Tecnolóxica estendela a outros nenos e nenas e a outros colexios en futuras edicións.
Así o explicou a concelleira Ana Barreiro nun acto no que deu a coñecer tamén a organización dos dous cursos gratuítos que se celebrarán nas vacacións e que están orientados á rapazada do municipio no marco do Nadal Informático.
Concretamente, do 23 de decembro ao 3 de xaneiro, en horario de 10.00 a 11.30 horas, desenvolverase o curso Iníciate na informática, dirixido a cativos con idades comprendidas entre os 7 e 10 anos, onde aprenderán a navegar por Internet, facer debuxos ou animar fotografías, entre outros contidos.
Tamén do 23 de decembro ao 3 de xaneiro, pero desde as 12.00 ata as 13.30 horas, terá lugar un segundo curso denominado Retoca as túas fotos, esta vez destinado a alumnado de 11 a 14 anos.
En ambos casos, as inscricións pódense formalizar a partir do 16 de decembro na Aula CeMIT ou a través da web.
Ao finalizar cada acción formativa entregase un diploma aos participantes e un pequeno agasallo sorpresa.